ވޯލްޑް ކަޕް ފުޓްބޯޅަ މުބާރާތައް ފަހު ލިއޮނަލް މެސީ ކުޅުނު ފުރަތަމަ މެޗުގައި ކާމިޔާބު ކުރި ލަނޑާއި އެކު 2-0 ން އެންގާސް ބަލިކޮށް ފުރާންސް ލިގު ތާވަލުގެ ކުރީގައި ޕީއެސްޖީ އިން ހަ ޕޮއިންޓްގެ ލީޑެއް ނަގައިފިއެވެ.

ޕީއެސްޖީގެ ދަނޑުގައި ރޭ ކުޅެވުނު މެޗުގައި ފުރަތަމަ ހާފުގެ ފަސް ވަނަ މިނެޓުގައި އެޓީމަށް ލީޑުނަގައިދިނީ ފުރާންސްގެ ޒުވާން ފޯވާޑް ހޫގޯ އެކިޓިކޭ އެވެ. މިއީ އެޓީމުގެ ފުރާންސް ޑިފެންޑަރ ނޯޑީ މުކިއެލޭ ތަނަވަސްކޮށްދިން ފުރުސަތެއްގައި އެކިޓިކޭ ކާމިޔާބުކޮށްދިން ލަނޑެކެވެ. ފުރަތަމަ ހާފުގައި ގިނަވަގުތު ބޯޅަ ގެންގުޅެ މެޗު ދޮމިނޭޓުކުރީ ފީއެސްޖީ އިން ނެވެ. ނަމަވެސް މިހާފުގައި އެޓިމަށް މާގިނަ ހަމލާތަކެއް އުފެއްދިފައި ނުވާއިރު އެންގާސް ޓީމަށް ވެސް މިހާފުގައި ޕީއެސްޖީގެ ގޯލާ އަމާޒުކޮށް އެންމެ ހަމަލައެއްވެސް ފޮނުވާލެވިފައެއް ނުވެއެވެ.

ޕީއެސްޖީ ކުޅުންތެރިން ލަނޑުޖެހުމަށް ފަހު އުފާ ފާޅުކުރަނީ

ދެވަނަ ހާފުގައި އެންގާސް ޓީމުން ކުޅުން ރަގަޅުކޮށް ޕީއެސްޖީގެ ގޯލައް ނުރައްކާތެރި ހަމަލާތަކެއް ފޮނިވާލިއެވެ. ނަމަވެސް އެޓީމަށް އެއިން ފުރުސަތެއްގެ ބޭނުން ނުހިފި އުޅެނިކޮށް ޕީއެސްޖީ އިން ދެވަނަ ހާފުގެ 72 ވަނަ މިނެޓުގައި އެޓީމުގެ ލީޑު ފުޅާކުރިއެވެ. މިލަނޑު އެޓީމަށް ކާމިޔާބުކޮށްދިނީ މެސީއެވެ. މިއީ ވެސް މިރޭގެ މެޗުގައި މޮޅު ކުޅުމެއް ދެއްކި އެޓީމުގެ ފުރާންސް ޑިފެންޑަރ ނޯޑީ މުކިއެލޭ ތަނަވަސްކޮށްދިން ފުރުސަތެއްގައި މެސި ކާމިޔާބުކޮށްދިން ލަނޑެކެވެ.

ދެވަނަ ހާފުގެ 84 ވަނަ މިނެޓްގައި ނޭމާ ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށް ފަހު ރެފްރީ ނިންމީ އެއީ އޮފްސައިޑް ގޯލެއްކަމަށެވެ.

މިރޭގެ މެޗުން ލިބުނު ތިން ޕޮއިންޓާއި އެކު 18 މެޗުން 47 ޕޮއިންޓް ހަމަކޮށް ޕީއެސްޖީ އޮތީ ލީގު ތާވަލުގެ ކުރީގައި 6 ޕޮއިންޓުގެ ލީޑަކާއެކުއެވެ. ދެވަނާގައި އޮތް ލެންސް އަށް 18 މެޗުން ލިބިފައިވަނީ 42 ޕޮއިންޓެވެ. އަދި މިރޭގެ މެޗުން ބަލިވި އެންގާސް އޮތީ 18 މެޗުން ލިބުނު 8 ޕޮއިންޓާއި އެކު ލީގު ތާވަލުގެ ފުލުގައެވެ.