ކޮޕާ އިޓާލިއާ ދެވަނަ ބުރުގައި 10 ކުޅުންތެރިންނާއި އެކު ކުޅުނު ޓޮރީނޯ އަތުން 1-0 ން ބަލިވެ ލީގު ޗެންޕިއަން އޭސީ މިލާން މުބާރާތުން ކަޓައިފިއެވެ.

ފުރަތަމަ ހާފުގައި ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ، މި ހާފުގެ 12 ވަނަ މިނެޓުގައި ޓޮރީނޯގެ ސާބިއާ މިޑްފީލްޑަރ ސަސާ ލުކިޗް އޭސީ މިލާނުގެ ޕެނަލްޓީ އެރިއާތެރެއަށް ވަދެ ފޮނުވާލި ނުރައްކާތެރި ހަމަލާ އެޓީމުގެ ރޫމޭނިއާ ގޯލްކީއްޕަރު ސިޕްރިއަން ތަތަރުސާނޫ ވަނީ ހުޝިއާރުކަމާއެކު ދިފާއުކޮއްފައެވެ. މި ހާފުގައި އެސީ މިލާނުން އެންމެ ރަގަޅު ފުރުސަތެއް ލިބުނީ އެޓީމުގެ ބެލްޖިއަމް މިޑްފިލްޑަރ ޗާލްސް ޑި ކެޓެލޭރޭ އަށެވެ. ކޯނަރަކުން ޓޮރީނޯގެ ގޯލުކުރިމައްޗަށް ހުރަސްވި ބޯޅައެއް އޭނާ ބޮލުން ކުރިއަށް ފޮނުވާލުމުން އަމާޒުވީ ގޯލުގެ އަރިމަތީ ދަނޑިއަށެވެ.

ޓޮރީނޯގެ އައިވަރިކޯސްޓް ޑިފެންޑަރ ކޮފީ ޖިދްޖީ އަށް ރެފްރީ ރަތް ކާޑު ދައްކަނީ 

މެޗުގެ ދެވަނަ ހާފުގައި އޭސި މިލާނުން ޓޮރީނޯގެ ގޯލައް ގިނަ ހަމަލާތަކެއްފޮނުވަލިއެވެ. އަދި ދެވަނަ ހާފުގެ 70 ވަނަ މިނެޓުގައި ޓޮރީނޯގެ އައިވަރިކޯސްޓް ޑިފެންޑަރ ކޮފީ ޖިދްޖީ އޭސީ މިލާންގެ ކުޅުންތެރިއަކަށް ކުރި ނުރައްކާތެރި ފައުލަކާއި ގުޅިގެން މެޗުގެ ވަނީ އޭނާއަށް ދެވަނަ ރީނދޫކާޑާއެކު ރަތް ކާޑެއްދައްކައި ދަނޑުން ފޮނުވާލާފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުންތެރިއެއް މަދުކޮށެވެ.

މެޗުގެ 90 މިނެޓް ކުޅުން ހަމަވިއިރު ދެޓީމު 0-0 ން އެއްވަރުވެފައި އޮތުން ނަތީއްޖާނެރުމަށް ކުޅެވުނު 15 މިނެޓުގެ ދެ ހާފުގެ ތެރެއިން ދެވަނަ ހާފުގައި، މެޗުގެ 114 ވަނަ މިނެޓުގައި ޓޮރީނޯގެ ހަމައެކަނި ލަނޑު ކާމިޔާބުކޮށް ދިނީ ފުރާންސްގެ މިޑްފީލްޑަރ މިޝޭލް އެޑޯޕޯ އެވެ. މިއީ އެޓީމުގެ ފުރާންސް މިޑްފީލްޑަރ ބްރަޔަން ޖެފްޓޭ ބަޔޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެން ދިޔައީ 1-0 ން ޓޮރީނޯ މޮޅުވެގެންނެވެ.