އިގިރޭސި ޕްރެމިއާ ލީގުގައި ވާދަވެރި މެންޗެސްޓަރ ސިޓީ 2-1 ބަލިކޮށް މެންޗެސްޓަރ ޔުނައިޓެޑް ޕްރެމިއާ ލީގު ތާވަލުގެ ދެވަނާގައި އޮތް ސިޓީއާއި ދެމެދުގައިވާ ފަރަގު އެއް ޕޮއިންޓަށް ކުޑަކޮއްފިއެވެ.

މެންޗެސްޓަރ ޔުނައިޓެޑުގެ އޯލްޑް ޓްރެފޯޑްގައި މިރޭ ކުޅެވުނު މެޗުގެ ފުރަތަމަ ހާފުގައި ދެޓީމުގެ ފާރާތުންވެސް ފެނިގެން ގޮސްފައިވަނީ ވަރަށް އާދައިގެ ކުޅުމެކެވެ. މި ހާފުގައި ގިނަވަގުތު ބޯޅަ ގެންގުޅެ ސިޓީ އިން މެޗު ޑޮމިނޭޓުކުރި ނަމަވެސް އެޓީމަށް މެންޗެސްޓަރ ގެ ގޯލާ އަމާޒުކޮށް ފޮނުވާލެވުނީ އެންމެ ހަމަލާއެކެވެ. 

ޖެކް ގްރީލިޝް މިރޭގެ މެޗުގައި ސިޓީގެ ހަމައެކަނި ލަނޑު ކާމިޔާބުކޮށްދެނީ

މިރޭގެ މެޗުގެ ދެވަނަ ހާފުގައި ސިޓީއަށް މެޗުގެ ލީޑު ހޯދައިދިނީ ބަދަލު ކުޅުންތެރިއެއްގެ ގޮތުގައި ކުޅެންނުކުތް އިގިރޭސި މިޑްފީލްޑަރ ޖެކް ގްރީލިޝް އެވެ. މިއީ ދެވަނަ ހާފުގެ 60 ވަނަ މިނެޓުގައި އެޓީމުގެ ބެލްޖިއަމް މިޑްފީލްޑަރ ކެވިން ޑި ބްރޭނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ގޯލެކެވެ.

މެންޗެސްޓަރ ސިޓީ ކުރީގައި އޮވެ މެޗު ނިމެންދަނިކޮށް ދެވަނަ ހާފުގެ 78 ވަނަ މިނެޓުގައި ޔުނައިޓެޑަށް މެޗުގެ ނަތީއްޖާ ހަމަހަމަކޮށްދިނީ އެޓީމުގެ ޕޯޗުގަލް މިޑްފީލްޑަރ ބްރޫނޯ ފެނާންޑޭޒް އެވެ. މިއީ ބްރެޒިލްގެ މިޑްފީލްޑަރ ކަސަމީރޯ ތަނަވަސްކޮށްދިން ފުރުސަތެއްގައި ފެނާންޑޭޒް ކާމިޔާބުކޮށްދިން ގޯލެކެވެ.

ބްރޫނޯ ފެނާންޑޭޒް މެންޗެސްޓަރ ޔުނައިޓެޑަށް މެޗުގެ ނަތީއްޖާ އެއްވަރުކޮށްދިން ލަނޑު ކާމިޔާބުކޮށްދެނީ

މިރޭގެ މެޗުން މެންޗެސްޓަރ ޔުނައިޓެޑު މޮޅުވި ލަނޑު ފަހު ހާފުގެ 82 ވަނަ މިނެޓުގައި ކާމިޔާބުކޮށްދިނީ މިވަގުތު އާދަޔާ ޚިލާފު ރަގަޅު ފޯމެއްގައި ކުޅެމުން އަންނަ އިގިރޭސި ފޯވާޑް މާކަސް ރަޝްފޯޑް އެވެ. މިއީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އާޖެންޓީނާގެ ޒުވާން ފޯވާޑް އަލެޖަންޑްރޯ ގާނާޗޯ ތނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މެންޗެސްޓަރ ޔުނައިޓެޑް އެންމެ ފަހުން ކުޅުނު ހަތް މެޗުގައި މާކަސް ރަޝްފޯޑް 8 ލަނޑު ކާމިޔާބުކޮށްދީފައިވާއިރު، މިރޭގެ މެޗުން ލިބުނު ތިން ޕޮއިންޓާއި އެކު 18 މެޗުން 38 ޕޮއިންޓް ހަމަކޮށް މެންޗެސްޓަރ ޔުނައިޓެޑު ވަނީ ދެވަނާގައި އޮތް މެންޗެސްޓަރ ސިޓީ އާއި ދެމެދުގައިވާ ފަރަގު އެއް ޕޮއިންޓަށް ކުޑަކޮށްފައެވެ.

މިރޭގެ މެޗުން ބަލިވި ނަމަވެސް މެންޗެސްޓަރ ސިޓީ އަދިވެސް އޮތީ ލީގު ތާވަލުގެ ދެވަނާގައެވެ. 18 މެޗުން އެޓީމަށް 39 ޕޮއިންޓް ލިބިފައިވާއިރު، އެއް ވަނާގައި އޮތީ 17 މެޗުން 44 ޕޮއިންޓާއި އެކު އާސެނަލްއެވެ.