މެލޭޝިއާގެ ކުއާލަލަމްޕޫރުގައި ހުންނަ އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ހައުސްގައި ބުރާސްފަތި ދުވަހު ބެއްވުނު ގުރުނެގުމުގެ ރަސްމިއްޔާތުގައި، އަންނަ އޭޕްރީލް މަހު ބާއްވާ އޭއެފްސީ ވިމެންސް އޮލިމްޕިކް ކޮލިފައިން މުބާރާތުގެ ފުރަތަމަ ބުރުގައި ރާއްޖޭގެ އަންހެން ފުޓްބޯޅަ ޓީމު މިޔަންމާ، އީރާން އަދި ބަންގްލަދޭޝް އާއި އެއްގުރޫޕެއްގައި ހިމެނިއްޖެއެވެ.
ގްރޫޕް ބީގައި ހިމެނޭ ދިވެހިރާއްޖެ އީރާން، ބަންގުލަދޭޝް އަދި މިޔަންމާ ބައްދަލުކުރާ މެޗު އޮންނާނީ އަންނަ އޭޕްރީލް މަހުގެ ތިން ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށް ސެންޓްރަލައިޒްޑް ދަނޑެއްގަ އެވެ. މެޗުތައް ކުޅޭނެ ތަން އިއުލާނު ކުރާނީ ފަހުންނެވެ.
ދިވެހިރާއްޖޭގެ އަންހެން ފުޓްބޯޅަ މިވަގުތު އޮތީ ފީފާ ރޭންކިންގެ 159 ވަނައިގަ
ދިވެހިރާއްޖޭގެ އަންހެން ފުޓްބޯޅަ މިވަގުތު އޮތީ ފީފާ ރޭންކިންގެ 159 ވަނައިގައެވެ. އަދި މިގުރޫޕުގައި ހިމެނޭ މިޔަންމާ މިވަގުތު އޮތީ ފީފާ ރޭންކިންގެ 48 ވަނައިގައެވެ. އީރާން 68 ވަނާގައި އޮތްއިރު ބަންގުލަދޭޝް އޮތީ 140 ވަނައިގައެވެ.
ފުރަތަމަ ބުރުގައި އޭޝިއާގެ 26 ޓީމެއް ކުޅޭނެ އެވެ. އެއީ ހަތަރު ޓީމުގެ ފަސް ގުރޫޕަކާއި ތިން ޓީމުގެ ދެ ގްރޫޕަކަށް ބަހާލައިގެންނެވެ. ފުރަތަމަ ބުރުން ގްރޫޕް ކާމިޔާބުކުރާ ހަތް ޓީމު އޭޝިއާގެ އެންމެ މަތީ ރޭންކިންގެ ފަސް ޓީމު ކަމަށްވާ އުތުރު ކޮރެއާ، ޖަޕާން، އޮސްޓްރޭލިއާ، ޗައިނާ އަދި ދެކުނު ކޮރެއާއާ އެކު އޮކްޓޯބަރު މަހު ބާއްވާ ޕެރިސް 2024 ގެ އޮލިމްޕިކް އަންހެން ފުޓްބޯޅަ ކޮލިފައިންގެ ދެ ވަނަ ބުރުގައި ބައިވެރިވާނެ އެވެ.
2023 ވަނަ އަހަރުގެ ނޮވެމްބަރު-ޑިސެމްބަރު މަހު ބާއްވާ ފައިނަލް ބުރުގައި ޕެރިސް 2024 އޮލިމްޕިކްސްގެ ދެ ޖާގައަށް ވާދަކުރާނީ ގްރޫޕް ޗެމްޕިއަން ތިން ޓީމާއި ދެވަނަ ބުރުން އެންމެ މޮޅު އެއް ރަނަރަޕް ޓީމެވެ.
Advertisement
This content is created and paid for by advertisers and does not involve Voice Journalists
