އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ބްރައިޓަން އާއި ވާދަކޮށް 3-0 ގެ ތަފާތުބޮޑު ނަތީއްޖާއަކުން ބަލިވެ ލީގު ތާވަލުގެ އަށް ވަނައަށް ލިވަޕޫލް ވެއްޓިއްޖެއެވެ.

ބްރައިޓަންގެ އެމެކްސް ސްޓޭޑިއަމްގައި މިރޭ ކުޅެވުން މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓްކުރީ ބްރައިޓަން އިން ނެވެ. މިހާފުގައި އެޓީމުން ލިވަޕޫލްގެ ގޯލާ އަމާޒުކޮށް ތިން ހަމަލާއެއް ފޮނުވާލިއިރު، އެޓީމުގެ ގޯލާ އަމާޒުކޮށް ލިވަޕޫލަށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ.

ވެލްބެކް ބްރައިޓަންގެ ތިންވަނަ ލަނޑު ކާމިޔާބުކޮށްދެނީ

މެޗުގެ ދެވަނަ ހާފު ފެށިގެން 8 މިނެޓްތެރޭގައި ބްރައިޓަންގެ އިގިރޭސި މިޑްފީލްޑަރ ސޮލަމަން މާޗު ވަނީ އެޓީމަށް ދެ ލަނޑު ކާމިޔަބުކޮށްދީފައެވެ. ފުރަތަމަ ލަނޑު 47 ވަނަ މިނެޓުގައި ކާމިޔާބުކޮށް ދިންއިރު އޭގެ ހަ މިނެޓް ފަހުން އެޓީމުގެ ދެވަނަ ލަނޑު 53 ވަނަ މިނެޓްގައި އޭނާ ކާމިޔާބުކޮށްދިނީ އެޓީމުގެ އަޔަލޭންޑް ފޯވާޑް އީވާން ފާގަސަން ތަނަވަސްކޮށްދިން ފުރުސަތެއްގައެވެ.

ސޮލޮމަން މާޗު މިރޭގެ މެޗުގައި ދެ ލަނޑު ކާމިޔާބުކޮށްދިން

ބްރައިޓަން އިން ދެ ލަނޑުގެ ލީޑެއްނެގުމުން ލިވަޕޫލުން ބަދަލުތަކެއް ގެނެސް ލަނޑެއްޖެހޭތޯ މަސައްކަތްކުރަމުން ދަނިކޮށް ފަހު ހާފުގެ 81 ވަނަ މިނެޓުގައި ބްރައިޓަންގެ އިނގިރޭސި ފޯވާޑް ޑެނީ ވެލްބެކް ވަނީ އިތުރު ލަނޑެއް ކާމިޔާބުކޮށް މެޗުގެ ނަތީއްޖާ 3-0 އަށް ބަދަލުކޮއްފައެވެ. މިއީ މިރޭގެ މެޗުގައި އެޓީމަށް ދެ ލަނޑު ކާމިޔާބުކޮށްދިން އިގިރޭސި މިޑްފީލްޑަރ ސޮލަމަން މާޗު ތަނަވަސްކޮށްދިން ފުރުސަތެއްގައި ވެލްބެކް ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއި އެކު 18 މެޗުން 30 ޕޮއިންޓު ހަމަކޮށް ބްރައިޓަން އިން ވަނީ ލިވަޕޫލް ފަހަތަށް ޖައްސާލުމަށް ފަހު ލިގު ތާވަލުގެ 7 ވަނައަށް ޖެހިލައިފައެވެ. މިރޭގެ މެޗުން ބަލިވި ލިވަޕޫލް އަށް 18 މެޗުން ލިބިފައިވަނީ 28 ޕޮއިންޓާއި އެކު ލީގު ތާވަލުގެ 8 ވަނައެވެ.