ފީފާގެ "ދަ ބެސްޓް" ގެ ނަމުގައި 2016 ވަނަ އަހަރު ދުނިޔޭގެ ފުޓްބޯޅައިގެ މައި އިދާރާ ފީފާއިން ކޮންމެ އަހަރަކު ދޭންފެށި "ދަ ބެސްޓް" އެވޯޑަށް ނޮމިނޭޓުވެފައިވާ ކުޅުންތެރިންގެ ލިސްޓް އެ އިދާރާއިން އާންމުކޮށްފައިވާއިރު މި އެވޯޑް އެންމެ ފުރަތަމަ ދެ އަހަރު ހޯދި ކްރިސްޓިއާނޯ ރޮނާލްޑޯ 2022 ވަނަ އަހަރުގެ އެވޯޑަށް ނޮމިނޭޓްވި 14 ކުޅުންތެރިންގެ ތެރޭގައި ނުހިމެނެއެވެ.

ރޮބަޓް ލެވަންޑޯސްކީ

2016 އަދި 2017 ވަނަ އަހަރު ފީފާ "ދަ ބެސްޓް" އެވޯޑް ހޯދާފައި ވަނީ އޭރު ރެއާލް މެޑްރިޑަށް ކުޅެމުން ދިޔަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއެވެ. އަދި ޖެހިގެން އައި 2018 ވަނަ އަހަރުވެސް ރޮނާލްޑޯއަށް މި އެވޯޑް ލިބޭނެކަމަށް ގިނަބަޔަކު އުންމީދު ކުރިއެވެ. ނަމަވެސް ރޮނާލްޑޯ ފަހަތައް ޖައްސާލުމަށް ފަހު އެވޯޑް ހޯދީ 2018 ވަނަ އަހަރު ރަޝިއާގައި ބޭއްވުނު ވޯލްޑް ކަޕް ފުޓްބޯޅަ މުބާރާތުގައި ކްރޮއޭޝިއާ ޓީމު ފައިނަލަށް ގެންގޮސްދިއުމުގައި މުހިންމު ދައުރެއް އާދާކޮށްދިން އެޓީމުގެ ކެޕްޓަން ލޫކާ މޮޑްރިޗު އެވެ.

Advertisement

ލޫކާ މޮޑްރިޗު

2019 ވަނަ އަހަރު "ދަ ބެސްޓް އެވޯޑް" ބާސެލޯނާ އަދި އާޖެންޓީނާގެ ލިއޮނަލް މެސީ ފުރަތަމަ ފަހަރަށް ހޯދި އިރު 2020 އަދި 2021 ވަނަ އަހަރު މި އެވޯޑް ހޯދައިފައި ވަނީ އޭރު ބަޔާން މިއުނިކަށް ކުޅެމުންއައި ޕޮލެންޑްގެ ފޯވާޑް ރޮބަޓް ލެވަންޑޯސްކީ އެވެ.

ލިއޮނަލް މެސީ

މިދިޔަ އަހަރުގެ ފީފާގެ "ދަ ބެސްޓް" އެވޯޑް ދިނުމަށް ހަމަޖެހިފައިވަނީ 27 ފެބްރުއަރީ 2023 ގައެވެ. އަދި ފީފާ ވެބްސައިޓް މެދުވެރިކޮށް ސަޕޯޓަރުންނަށް މި އެވޯޑަށް ވޯޓު ލުމުގެ ފުރުސަތު މިހާރުވަނީ ހުޅުވާލެވިފައެވެ.

2022 ވަނަ އަހަރުގެ ފީފާ ދަ ބެސްޓް އެވޯޑަށް ނޮމިނޭޓުވެފައިވާ 14 ކުޅުންތެރިން

2022 ވަނަ އަހަރުގެ ފީފާ ދަ ބެސްޓް އެވޯޑަށް ނޮމިނޭޓުވެފައިވާ 14 ކުޅުންތެރިންނަކީ ޖޫލިއަން އަލްވަރޭޒް (އާޖެންޓީނާ / ރިވާ ޕްލޭޓް / މެންޗެސްޓާ ސިޓީ )، ޖޫޑް ބެލިންހަމް (އިންގްލެންޑް / ބޮރޫޝިއާ ޑޯޓްމަންޑް )، ކަރީމް ބެންޒެމާ (ފްރާންސް / ރެއާލް މެޑްރިޑް )، ކެވިން ޑި ބްރޭނާ (ބެލްޖިއަމް / މެންޗެސްޓާ ސިޓީ )، އެރްލިންގް ހާލަންޑް (ނޯވޭ / ބޮރޫޝިއާ ޑޯޓްމަންޑް / މެންޗެސްޓާ ސިޓީ )، އަޗްރާފް ހަކީމީ (މޮރޮކޯ / ޕީއެސްޖީ )، ރޮބަޓް ލެވަންޑޯސްކީ (ޕޮލެންޑް / ބަޔާން މިއުނިކް / ބާސެލޯނާ)، ސަޑިއޯ މާނޭ (ސެނެގާލް / ލިވަޕޫލް  /  ބަޔާން މިއުނިކް)، ކިލިއަން އެމްބާޕޭ (ފްރާންސް / ޕީއެސްޖީ)، ލިއޮނަލް މެސީ (އާޖެންޓީނާ / ޕީއެސްޖީ)، ލޫކާ މޮޑްރިޗް (ކްރޮއޭޝިއާ / ރެއާލް މެޑްރިޑް )، ނޭމާ (ބްރެޒިލް / ޕީއެސްޖީ)، މުހައްމަދު ސަލާހު (މިސްރު / ލިވަޕޫލް )، ވިނިސިއަސް ޖޫނިއާ (ބްރެޒިލް / ރެއާލް މެޑްރިޑް ) އެވެ.