އިގިރޭސި ޕްރެމިއާ ލީގުގައި ރޭ ރަށުން ބޭރުގައި ވާދަވެރި ޓޮޓެންހަމް 2-0 ން ބަލިކޮށް ލީގު ތާވަލުގެ ކުރީގައި އާސެނަލް އިން 8 ޕޮއިންޓްގެ ލީޑެއް ނަގައިފިއެވެ. ލީގުގައި އެންމެފަހުން ލީގުގައި ކުޅުނު ފަސް މެޗުގެ ތެރެއިން ހަތަރު މެޗުން އާސެނަލް މޮޅުވެފައިވާ އިރު، އެޓީމަށް ވަނީ 18 މެޗުން 47 ޕޮއިންޓް ލިބިފައެވެ.

ފުރަތަމަ ހާފުގެ 14 ވަނަ މިނެޓުގައި އާސެނަލް އިން ލަނޑެއް ކާމިޔާބުކޮށް މެޗުގެ ލީޑު ނެގިއިރު، މި ލަނޑަކީ ޓޮޓެންހަމްގެ ގޯލްކީޕަރު ހޫގޯ ލޮރިސް އަތުން ބައިކޮޅަށް ވަން ގޯލެކެވެ. އާސެނަލްގެ އިގިރޭސި ފޯވާޑް ބުކަޔޯ ސަކާ އަރިމަތިން ގޯލުކުރިމައްޗަށް ހުރަސްކުރި ބޯޅައެއް ޓޮޓެންހަމްގެ ޑިފެންޑަރެއް ފައިގައި ޖެހިފައި ގޯލަށް ވަނީ ލޮރިސްގެ އަތު ތެރެއިންނެވެ.

މާޓިން އޮޑެގާޑު ލަނޑުޖެހުމަށްފަހު އުފާ ފާޅުކުރަނީ

މީގެ އިތުރުން ފުރަތަމަ ހާފުގައި އާސެނަލްގެ ޒުވާން ފޯވާޑް އެޑްވާޑް އެންކެޓިއާ ފޮނުވާލި ނުރައްކާތެރި ހަމަލާއެއް ލޮރިސް ދިފާއު ކުރި އިރު، ހާފު ނިމެން ނުވަ މިނެޓަށް ވެފައި ވަނިކޮށް، އެޓީމުން ލީޑު ފުޅާކުރިއެވެ. މި ލަނޑު އެޓީމަށް ކާމިޔާބުކޮށްދިނީ ކެޕްޓަން މާޓިން އޮޑެގާޑު އެވެ. މިއީ އިގިރޭސި ފޯވާޑް ބުކަޔޯ ސަކާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަމަ ހާފުގެ ކުޅުން ނިމުނީ 2-0 ގެ ނަތީއްޖާއަކުން އާސެނަލް ކުރީގައި އޮވެގެންނެވެ.

އާސެނަލް އާއި ޓޮޓެންހަމް ވާދަކުރި މެޗުގެ ތެރެއިން

ދެވަނަ ހާފުގައި ޓޮޓެންހަމުން ކުޅުން ރަނގަޅުކޮށް ނުރައްކާތެރި ހަމަލާތައް އާސެނަލްގެ ގޯލަށް އަމާޒުކޮށް ފެނުވާލިއެވެ.، ހެރީ ކޭންއާއި ރަޔާން ސެސެޔޯން އިތުރުން ހިއުން-މިން ސޮން މިހާފުގައި ފޮނުވާލި ހަމަލާތައް އާސެނަލްގެ ގޯލްކީޕަރު އޭރޮން ރެމްސްޑޭލް ވަނި ހުޝިއާރުކަމާއި އެކު ދިފާއުކޮށްފައެވެ.

މިރޭގެ މެޗުން ލިބުނު ތިން ޕޮއިންޓާއި އެކު 18 މެޗުން ލިބުނު 47 ޕޮއިންޓާއި އެކު އާސެނަލް މިވަގުތު އޮތީ ލީގު ޓާވަލުގެ އެއްވަނައިގައި އެވެ. ދެވަނައިގައި އޮތް މެންޗެސްޓާ ސިޓީން 18 މެޗުން ލިބިފައިވަނީ 39 ޕޮއިންޓެވެ. ސިޓީން މި ހަފުތާގައި ކުޅުނު މެޗުގައި ވާދަވެރި މެންޗެސްޓާ ޔުނައިޓެޑް އަތުން ބަލިވެފައިވާ އިރު، ޔުނައިޓެޑް މިވަގުތު އޮތީ ލީގު ތާވަލުގެ ހަތަރު ވަނައިގައެވެ. އެއީ 18 މެޗުން 38 ޕޮއިންޓު ހޯދައިގެންނެވެ. ތިންވަނައިގައި އޮތީ 19 މެޗުން 38 ޕޮއިންޓު ހޯދައިފައިވާ ނިއުކާސަލްއެވެ. މިރޭގެ މެޗުން ބަލިވެ، ޓޮޓެންހަމް ތާވަލުގެ ފަސްވަނައިގައި އޮތީ 19 މެޗުން 33 ޕޮއިންޓާއެކުގައެވެ.