ސްޕެނިޝް ސުޕަ ކަޕް ފައިނަލުގައި ވަދަވެރި ރެއާލް މެޑްރިޑް 3-1 ބަލިކޮށް މުބާރާތުގެ ޗެންޕިއަންކަން 14 ވަނަ ފަހަރަށް ބާސެލޯނާއިން ހޯދައިފިއެވެ.

ސައުދި އަރަބިއާގ ވެރިރަށް ރިއާޒުގެ ކިންގް ފަހުދު އިންޓަނޭޝަނަލް ސްޓޭޑިއަމްގައި ރޭކުޅެވުނު ފައިނަލް މެޗުގައި ރެއާލް މެޑްރިޑުގެ ފަރާތުން ވަރަށް އާދައިގެ ކުޅުމެއް ފެނުނު އިރު މެޗު ފެށުނީއްސުރެ ބާސެލޯނާއިން ވަނީ މެޗު ޑޮމިނޭޓުކޮށް ރެއާލްގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.

ލެވަންޑޮސްކީ ބާސާގެ ދެވަނަ ލަނޑު ކާމިޔަބުކޮށްދެނީ

މިގޮތުނަ ފުރަތަމަ ހާފުގެ 13 ވަނަ މިނެޓުގައި ރެއާލްގެ ޕެނަލްޓީ އޭރިއާ ބޭރުން ބާސާގެ ފޯވާޑް ލެވަންޑޮސްކީ ފޮނުވާލި ބާރު ހަމަލާ ރެއާލްގެ ކީއްޕަރު އަތުގައި ޖެހިފައި އަމާޒުވީ ގޯލުގެ އަރިމަތީ ދަނޑިއަށެވެ. އަދި ދެވަނަ ފަހަރަށް އެބޯޅަ ލިބުނީ މުޅިން ހުސްކޮށް ހުރި ބާސާގެ ޒުވާން ޑިފެންޑަރ އަލެޖަންޑްރޯ ބަލްޑޭ އަށެވެ. ނަމަވެސް އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ބޭރަށެވެ.

ޕެޑްރީ ބާސާގެ ތިން ވަނަ ލަނޑު ކާމިޔާބުކޮށްދެނީ

ރޭގެ މެޗުގައި ބާސެލޯނާއިން ލީޑު ނެގީ ފުރަތަމަ ހާފުގެ 33 ވަނަ މިނެޓުގައި ރެއާލްގެ ޑިފެންޑަރުން ހެދި މިސްޓޭކެއްގެ ފައިދާނަގައި ލެވަންޑޮސްކީ ތަނަވަސްކޮށްދިން ފުރުސަތެއްގައި ޒުވާން މިޑްފީލްޑަރ ގާވީ އެވެ. އަދި ފުރަތަމަ ހާފުގެ 45 ވަނަ މިނެޓުގައި ބާސާގެ ލީޑު ފުޅާކޮށްދިނީ ލެވަންޑޮސްކީއެވެ. މިއީ ގާވީ ތަނަވަސްކޮށްދިން ފުރުސަތެއްގައި ރެއާލްގެ ގޯލްއޭރިއާ ތެރޭގައި މުޅިން ހުސްކޮށްހުރެ ލެވަންޑޮސްކީ ކާމިޔާބުކޮށްދިން ގޯލެކެވެ.

ފުރަތަމަ ހާފުގައި ރެއާލްގެ ފަރާތުން ވަރަށް އާދައިގެ ކުޅުމެއް ފެނިގެން ދިޔައިރު ދެވަނަ ހާފުގައިވެސް ގިނަވަގުތު ބޯޅަގެންގުޅެ މެޗު ޑޮމިނޭޓުކުރީ ބާސެލޯނާއިން ނެވެ. ނަމަވެސް މިހާފުގައި ރެއާލް މެޑްރިޑުން ކުރިއަށްޖެހި ލަނޑެއްކާމިޔާބުކުރެވޭތޯ ވަރަށް މަސައްކަތްކުރިއެވެ. މި މެޗުގައި ބާސެލޯނާގެ ތިން ވަނަ ލަނޑު ޕެޑްރީ ކާމިޔާބުކޮށްދިނީ ދެވަނަ ހާފުގެ 69 ވަނަ މިނެޓުގައި ގާވީ ރެއާލް މެޑްރިޑް ގޯލުކުރިމައްޗަށް ހުރަސްކޮށްދިން ބޯޅައެއް މުޅިން ހުސްކޮށްހުރެ ގޯލްތެރެއަށް ފޮނުވާލައިގެންނެވެ.

ބެންޒެމާ ރެއާލްގެ ހަމައެކަނި ލަނޑު މިމެޗުގައި ކާމިޔާބުކޮށްދިނުމަށް ފަހު

ރެއާލް މެޑްރިޑުން މި މެޗުގައި ކާމިޔާބުކުރި ހަމައެކަނި ލަނޑު ދެވަނަ ހާފުގެ އިތުރު ވަގުތުތެރޭގައި ކާމިޔާބުކޮށްދިނީ ކަރީމް ބެންޒެމާއެވެ. މިއީ ބަދަލުކުޅުންތެރިއެއްގެ ގޮތުގައި ކުޅެން ނުކުތް ސްޕެއިންގެ މިޑްފީލްޑަރ ޑެނިއަލް ސެބަލޯސް ތަނަވަސްކޮށްދިން ފުރުސަތެއްގައި ބެންޒެމާ ކާމިޔާބުކޮށްދިން ލަނޑެކެވެ. 

މީއީ ބާސެލޯނާގެ ކޯޗު ޒަވީ އެޓީމާއި ހަވާލުވި ފަހުން އެޓީމަށް ކާމިޔާބުކުރެވުނު ފުރަތަމަ ތައްޓެވެ. އަދި މެސީ އެޓީމު ދޫކޮށް ޕީއެސްޖީއަށް ބަދަލުވި ފަހުން ބަސެލޯނާއިން މުބާރާތެއް ކާމިޔާބުކުރި ފުރަތަމަ ފަހަރުވެސްމެއެވެ.