އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން އިއުލާން ކުރައްވާފައިވާ, ރައީސް އިބްރާހިމް މުހައްމަދު ޞާލިހް ބައިވެރިވެވަޑައިގަންނަވާ ކެންޕެއިން ޖަލްސާއެއް ހުކުރު ދުވަހުގެ ރޭ މާލޭގައި ބާއްވާ ގޮތަށް ހަމަޖެހިއްޖެއެވެ.

ރައީސް ސޯލިހްގެ ކެމްޕެއިން ޓީމުން ހާމަކޮށްފައިވާ ގޮތުގައި އެ އިވެންޓް އޮންނާނީ އާޓިފިޝަލް ބީޗް ސަރަހައްދުގައި ހުކުރު ދުވަހުގެ ރޭ 8:30 ވާއިރު އެވެ.

ޕްރައިމަރީގެ ކެމްޕެއިނަށް މާލޭގެ އިތުރުން އަތޮޅު ތެރޭގެ ރަށްތަކަށްވެސް ރައީސް ޞާލިހު އަންނަނީ ދަތުރު ކުރައްވަމުންނެވެ. އެގޮތުން، ފާއިތުވި ހަފްތާގައި އައްޑު އަތޮޅަށް ވަޑައިގެންފައިވާއިރު، އިއްޔެ ވަނީ ހއ. ގެ އަތޮޅު ތަކަށް ވަޑައިގެންފައެވެ.

Advertisement

ރައީސް ޞާލިހު ކުރައްވާ ހުރިހާ ދަތުރުފުޅެއްގައި އަރިހުގައި އެމަނިކުފާނަށް ތާއިދުކުރައްވާ މަޖިލިސް މެމްބަރުންނާއި ސަރުކާރުގެ އިސްވެރިންވެސް އަންނަނީ ބައިވެރިވަމުންނެވެ. އަދި އެމަނިކުފާނު ވަޑައިގަންނަވާ ރަށް ރަށަށް ގިނަ ކަންކަން ކޮށްދެއްވާނެ ކަމަށް އަންނަނީ ވައުދުވެވަޑައިގަންނަވަމުންނެވެ. 

އެމްޑީޕީ ޕްރައިމަރީގައި ރައީސް ޞާލިހާއި ވާދަކުރައްވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އެމަނިކުފާނުވެސް އަންނަނީ އަމަލީގޮތުން މާލެއާއި އަތޮޅު ތެރޭގައި ކެންޕެއިން ހަރަކާތްތައް ބާއްވައި އެ ހަރަކާތް ތަކުގައި ބައިވެރި ވަމުންނެވެ.

މިމަހު 28 ގައި ބާއްވާ އެމްޑީޕީގެ ރިޔާސީ ޕްރައިމަރީ އަކީ ފޯރިގަދަ ޕްރައިމަރީ އަކަށް ވާނެ ކަމަށް ތަޖުރިބާކާރުން ބުނެއެވެ. އަދި މިއީ އެމްޑީޕީގެ ކުރިމަގު ބިނާ ކުރުމަށް މުހިންމު ޕްރައިމަރީ އެއްކަންވެސް ފާހަގަކޮށްލަންޖެހެއެވެ.