ޒެމްބިއާގެ ފުޓުބޯޅަ ކުޅުންތެރިޔާ ކެނެޑީ މުސޮންޑާ އަށް ޓެންޒޭނިއާ ލީގުގައި ދެއްކި ކުޅުމަށް އިނާމެއްގެ ގޮތުގައި ފަސް ޓްރޭގެ ކުކުޅު ބިސް ލިބިއްޖެ އެވެ.

މުސޮންޑާ ދާދި ފަހުން ވަނީ ޒެމްބިއާގެ ލީގު ޗެންޕިއަން ޕަވާ ޑައިނަމޯސް ދޫކޮށް ޓެންޒޭނިއާ ލީގު އެއްވަނައިގައި މިވަގުތު އޮތް ޔަންގް އެފްރިކަންސް އެސްސީ އަށް ބަދަލުވެފަ އެވެ. ޒެންބިއާ ލީގުގައި ޕަވާ ޑައިނަމޯސްއަށް ކުޅުނު ހަ މެޗުގައި 10 ލަނޑު ކާމިޔާބުކޮށްދީފައިވާ މުސޮންޑާގެ އާ ކްލަބަށް އެންމެ ފަހުން ކުޅެދިން މެޗުގައި ދެއްކި މޮޅު ކުޅުމަށް އިނާމެއްގެ ގޮތުގައި ކުކުޅު ބިސް ޓްރޭތަކެއް ދޭ މަންޒަރު މީސް މީޑިއާގައި އަންނަނީ ދައުރުވަމުންނެވެ.

ޓެންޒޭނިއާގެ މިޑިއާތަކުން ރިޕޯޓްކޮއްފައިވާ ގޮތުގައި މުސޮންޑާއަށް އިނާމެއްގެ ގޮތުގައި ލިބުނު ފަސް ކުކުޅު ބިސް ޓްރޭގެ ތެރެއިން ދެ ޓްރޭ އެއް ދީފައި ވަނީ ދާދި އެ މެޗުގައި ޖެހި ގޯލަކަށް ކަމަށާއި އަނެއް ތިން ޓްރޭ އަކީ މެޗުގައި ދެއްކި މޮޅު ކުޅުމުގެ ސަބަބުން މެޗުގެ މޮޅުކުޅުންތެރިއާގެ މަގާމަށް ލިބުނު އިނާމެއް ކަމަށެވެ.

Advertisement

ޒެމްބިއާގެ ފުޓުބޯޅަ ކުޅުންތެރިޔާ ކެނެޑީ މުސޮންޑާ

ޔަގީނުން ވެސް މިއީ ފުޓްބޯޅަ މެޗެއްގެ މޮޅުކުޅުންތެރިއާގެ މަގާމަށް ދެވުނު ވަރަށް ތަފާތު އެވޯޑެކެވެ.  ނަމަވެސް ޓެންޒޭނިއާ ފަދަ ފަގީރު ގައުމެއްގައި ކުކުޅު ބިހަކީ ވަރަށް އަގުބޮޑު އެއްޗެކެވެ. އަދި ވަކީން ހާއްސަކޮށް ފަސް ބިސް ޓްރޭއަކީ ވަރަށް ބޭނުންތެރި އަގުހުރި އިނާމެކެވެ. ޕްރެމިއާ ލީގުގައި ދެވޭ ޕްލާސްޓިކް ޓްރޮފީއަށްވުރެ މި ކުޅުންތެރިންނަށް ހުރިހާ ގޮތަކުންވެސް މި އެވޯޑްގެ އަގު މާބޮޑެވެ.

ޕޮލެންޑުގެ ލީގު މެޗެއްގެ މޮޅު ކުޅުންތެރިއާގެ މަގާމަށް ދެވުނު އިނާމާއެކު

މިއީ ފުޓްބޯޅަ މެޗެއްގެ މޭން އޮފް ދަ މެޗުގެ މަގާމަށް މިފަދަ އެވޯޑެއް ދެވުނު ފުރަތަަމަ ފަަހަރެއް ނޫނެވެ. މީގެ ކުރިން އެފްރިކާގެ ބައެއް ގައުމުތަކުގެ އިތުރުން ޔޫރަޕްގެ ގައުމެއް ކަމަށްވާ ޕޮލެންޑުގައި ވެސް ލީގު މެޗެއްގެ މޮޅު ކުޅުންތެރިއާގެ މަގާމަށް ކުކުޅެއް ދީފައި ވެއެވެ.