އިޓާލިއަން ލީގު ޗެންޕިއަން އޭސީ މިލާން ފަސޭހަކަމާއި އެކު 3-0 ން ބަލިކޮށް ސްޕަކަޕް ޗެންޕިއަންކަން އިންޓަރ މިލާނުން ހޯދައިފިއެވެ. މިއީ މި މުބާރާތުގެ ޗެންޕިއަން އިންޓަ މިލާނުން ހޯދި 7 ވަނަ ފަހަރެވެ.

ސައުދީ އަރަބިއާގެ ވެރިރަށް ރިޔާޒްގެ ކިންގް ފަހުދު އިންޓަނޭޝަނަލް ސްޓޭޑިއަމްގައި ރޭ ކުޅެވުނު އިޓާލިއަން ސްޕަ ކަޕްގެ ފައިނަލް މެޗުގެ ވަރަށް ކުރީކޮޅު އިންޓަރ މިލާނުން ލަނޑެއް ކާމިޔާބުކޮށް މެޗުގެ ލީޑު ނެގިއެވެ. މިލަނޑު ފުރަތަމަ ހާފުގެ 10 ވަނަ މިނެޓުގައި އެޓީމަށް ކާމިޔާބުކޮށްދިނީ އިޓަލީގެ ޑިފެންޑަރ ފެޑެރިކޯ ޑިމާކޯ އެވެ. މިއީ އެޓީމުގެ އިޓަލީ މިޑްފީލްޑަރ ނިކޮލޯ ބަރޭލާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޒެކޯ އަދި މާޓިނޭޒް ލަނޑުޖެހުމަށް ފަހު އުފާ ފާޅުކުރަނީ

މެޗުގެ ފުރަތަމަ ހާފުގައި އިންޓަރ މިލާނުގެ ފަރާތުން ތަފާތު މޮޅުކުޅުމެއް ފެނިގެންދިޔަ މި މެޗުގައި އެޓީމުގެ ލީޑު ފުޅާކޮށްދިނީ ތަޖުރިބާކާރު ފޯވާޑް އެޑިން ޒެކޯ އެވެ. މިއީ ފުރަތަަމަ ހާފުގެ 21 ވަނަ މިނެޓުގައި އެޓީމުގެ ޑިފެންޑަރ އަލެސެންޑްރޯ ބެސްޓޯނީ ތަނަވަސްކޮށްދިން ފުރުސަތެއްގައި ޒެކޯ ކާމިޔާބުކޮށްދިން ލަނޑެކެވެ. މިއާއެކު ފުރަތަމަ ހާފުގެ ކުޅުން ނިމުނީ 2-0 ން އިންޓަރ މިލާން ކުރީގައި އޮވެގެންނެވެ.

މެޗުގެ ދެވަނަ ހާފުގައި އޭސީ މިލާންނުން ކުޅުން ރަގަޅުކޮށް މިހާފުގައި ރަގަޅު ހަމަލާތަކެއް އުފެއްދޭތޯ މަސައްކަތްކުރި ނަމަވެސް ދެވަނަ ހާފުގެ 77 ވަނަ މިނެޓުގައި އިންޓަރ މިލާނުން އެޓީމުގެ ތިން ވަނަ ލަނޑު ކާމިޔާބުކުރިއެވެ. މިލަނޑު އެޓީމަށް ކާމިޔާބުކޮށްދިނީ އާޖެންޓީނާގެ ވޯލްޑްކަޕް ތަރި ލައުޓާރޯ މާޓިނޭޒް އެވެ. މިއީ އެޓީމުގެ ސްލޮވާކިއާ ޑިފެންޑަރ މިލާން ސްކްރިނިއާރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ރޭގެ މެޗަކީ އިޓަލީގެ އެންމެ ވާދަވެރި ދެ ކުލަބުގެ މެދުގައި ކުޅެވުނު 234 ވަނަ މެޗެވެ. އަދި މިވަގުތު އިޓާލިއަން ލީގުގެ ދެ ވަނައިގައި އޭސީ މިލާން 18 މެޗުން 38 ޕޮއިންޓާއި އެކު އޮތްއިރު، 18 މެޗުން 37 ޕޮއިންޓާއި އެކު ލަނޑުގެ ތަފާތުން އިންޓަރ މިލާން މިވަގުތު އޮތީ ލީގުތާވަލުގެ ހަތަރު ވަނައިގައެވެ.