އިގިރޭސި ޕްރެމިއާ ލީގުގައި ރޭ ރަށުން ބޭރުގައި ކްރިސްޓަލް ޕެލަސް އާއި ވާދަކޮށް 1-1 ން އެއްވަރުވެ ލިގުތާވަލުގެ ދެވަނައަށް އެރުމަށް ލިބުނު ފުރުސަތު މެންޗެސްޓަރ ޔުނައިޓެޑުން ނަގާލައިފިއެވެ.

ލަނޑަނުގެ ސެލްހަރސްޓް ޕާކްގައި ރޭކުޅެވުނު މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ ރަގަޅު ހަމަލާތަކެއް އުފެއްދީ މެންޗެސްޓަރ ޔުނައިޓެޑުން ނެވެ. ވޯލްޑް ކަޕް ފުޓްބޯޅަ މުބާރަތައް ފަހު ރޭގެ މެޗާއި ހަމައަށް ކުޅުނު ހުރިހާ މެޗަކުން މޮޅުވަމުން އައި މެންޗެސްޓަރ ޔުނައިޓެޑަށް ރޭގެ މެޗުގައި ލީޑު ނަގައިދިނީ ފުރަތަމަ ހާފުގެ އެންމެ ފަހު މިނެޓުގައި ޕޯޗުގަލްގެ މިޑްފީލްޑަރ ބުރޫނޯ ފެނާންޑެޒް އެވެ. 

ބުރޫނޯ ފެނާންޑޭޒް މެންޗެސްޓަރ ޔުނައިޓެޑުގެ ގޯލް ކާމިޔާބުކޮށްދެނި

އެންމެ ފަހުން މެންޗެސްޓަރ ސިޓީއާ ދެކޮޅަށް ކުޅުނު މެޗުގައި ވެސް ލަނޑުޖެހި ފެނާންޑޭޒް މި ލަނޑު ކާމިޔާބުކޮށްދިނީ ޑެންމާކުގެ ތަޖުރިބާކާރު މިޑްފީލްޑަރ ކްރިސްޓިއަން އެރިކްސަން ތަނަވަސްކޮށްދިން ފުރުސަތެއްގައެވެ. މި ލަނޑާއި އެކު ފުރަތަމަ ހާފުގެ ކުޅުން ނިމިގެން ދިޔައީ 1-0 ން މެންޗެސްޓަރ ޔުނައިޓެޑު ކުރީގައި އޮވެގެންނެވެ.

ލީގުގައި މެންޗެސްޓަރ ޔުނައިޓެޑުން ފުރަތަމަ ސްކޯކުރި އެންމެ ފަހުގެ 10 މެޗުންވެސް އެޓީމު މޮލުވެފައިވާއިރު މެޗުގެ ދެވަނަ ހާފަށް އެޓީމުން ނުކުތީ އިތުބާރާއެކުއެވެ. ނަމަވެސް ދެވަނަ ހާފުގައި އަމިއްލަ ސަޕޯޓަރުންގެ ކުރިމަތީގައި ކްރިސްޓަލް ޕެލަސްގެ ކުޅުންތެރިން ވަނީ ވާދަވެރި ކުޅުމަކަށް ފަހު މެޗުގެ އިތުރު ވަގުތުގައި ލަނޑެއް ކާމިޔާބުކޮށް މެންޗެސްތަރ ޔުނައިޓެޑުގެ މޮޅުވުމުގެ ސިލްސިލާ ނިމުމަކަށް ގެނެސްފައެވެ.

ފަހުވަގުތު ލަނޑުޖެހުމަށް ފަހު ކްރިސްޓަލް ޕެލަސް ކުޅުންތެރިން އުފާ ފާޅުކުަރަނީ

ކްރިސްޓަލް ޕެލަސްއަށް މެޗުގެ ނަތީއްޖާ އެއްވަރުކޮށްދިން ލަނޑު ދެވަނަ ހާފުގެ 91 ވަނަ މިނެޓުގައި އެޓީމަށް ލިބުނު ހިލޭ ޖެހުމަކުން ކާމިޔާބުކޮށްދިނީ އެޓީމުގެ ފުރާންސް މިޑްފީލްޑަރ މައިކަލް އޮލީސް އެވެ. ރޭގެ މެޗުން މުހިންމު ދެ ޕޮއިންޓް ގެއްލުމުގެ އިތުރުން މެންޗެސްޓަރ ޔުނައިޓެޑަށް ވަނީ އިތުރު މައްސަލައެއްވެސް ކުރިމަތިވެފައެވެ. އެއީ މި މެޗުގައި ދެއްކި ރީނދޫ ކާޑާއި އެކު ފަސް ރީނދޫ ކާޑު ހަމަވެ، އަންނަ އާދިއްތަ ދުވަހު ލީގުގެ އެއްވަނާގައި އޮތް އާސެނަލް އާއި ދެކޮޅަށް ކުޅޭ މެޗަށް ބުރެޒިލްގެ މިޑްފީލްޑަރ ކަސަމިރޯ ވަނީ ސަސްޕެންޑުވެފައެވެ.

ރޭގެ މެޗުން ލިބުނު އެއް ޕޮއިންޓާއި އެކު 19 މެޗުން މެންޗެސްޓަރ ޔުނައިޓެޑަށް ލިބިފައި ވަނި 39 ޕޮއިންޓައި އެކު ލީގު ތާވަލުގެ ތިން ވަނައެވެ. ދެވަނައިގައި އޮތް ސިޓީއަށް 18 މެޗުން 39 ޕޮއިންޓް ލިބިފައިވާއިރު އެޓީމަށް ތާވަލުގެ ދެވަނަ ލިބެނީ ލަނޑުގެ ތަފާތުންނެވެ. ފަހުވަގުތު ކާމިޔާބުކުރި ލަނޑާއި އެކު ލިބުން އެއް ޕޮއިންޓައި އެކު 19 މެޗުން 23 ޕޮއިންޓް ހަމަކޮށް ކްރިސްޓަލް ޕެލަސް މިވަގުތު އޮތީ ޕްރެމިއާ ލީގު ތާވަލުގެ 12 ވަނައިގައެވެ.