ކުޑަ އަންހެން ކުއްޖަކު ރޭޕު ކުރި މައްސަލައެއް ސާބިތުވި މީހެއް 40 އަހަރު ދުވަހަށް ޖަލަށް ލާން ހުކުމް ކޮށްފިއެވެ. 

2018 ވަނަ އަހަރުގެ ޖަނަވަރީ 6 ވަނަ ދުވަހުގައި އެ ލ.ކަލައިދޫ ވަލު ތެރެއަށް އަންހެންކުއްޖާ ގެންގޮސް ރޭޕުކޮށް އޭނާގެ ބަރަހަނާ މަންޒަރު ރެކޯޑުކޮށް ފޮޓޯނެގި މައްސަލައެއް ފެންމަތިވެފައިވާ އިރު އެ މައްސަލަ އާއި ގުޅިގެން ހައްޔަރުކޮށް ދައުލަތުން ދައުވާ އުފުލާފައިވަނީ ލ.ކަލައިދޫ، މާކަރީލައިޓް މުޙައްމަދު ޝަޒުލީފުގެ މައްޗަށެވެ. 

އޭނާގެ މައްޗަށް ދައުލަތުން އުފުލާފައިވަނީ، ރޭޕުކުރުމުގެ ކުށާއި، ކުޑަކުއްޖަކު މެދުވެރިކޮށް އޮރިޔާން ކާޑު އުފެއްދުމުގެ ކުށުގެ ދައުވާ އެވެ.  

މި ދެ ދައުވާވެސް އޭނާގެ މައްޗަށް ސާބިވާ ކަމަށް ކަނޑައަޅައި މިމަހު 18 ވަނަ ދުވަހު ކްރިމިނަލް ކޯޓުން ކުރި ހުކުމް ގައި ރޭޕުގެ ކުށުގެ ދައުވާ ސާބިތުވުމުން އޭނާ 20 އަހަރަށް ޖަލަށްލާން ހުކުމް ކޮށްފައިވާއިރު، ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށުގެ ދައުވާ ސާބިތުވުމުން ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކުން އަމަލުކުރުމުގެ ޤާނޫނު ދަށުން އޭނާގެ މައްޗަށް 20 އަހަރުގެ ޖަލު ހުކުމެއް އިއްވާފައިވެއެވެ.

މި 40 އަހަރުގެ ޖަލު ހުކުމްގެ ތެތެއިން އޭނާ ތަންފީޒުކުރަންޖެހޭނީ މި މައްސަލައިގެ ތުހުމަތުގައި ބަންދުގައި އޭނާ ހޭދަކުރި 2 އަހަރާއި 1 މަހާއި 14 ދުވަސް އުނިކުރުމަށްފަހު އޮންނަ މުއްދަތެވެ.