ރައީސުލްޖުމްހޫރިއްޔާ ކަމުގެ މަގާމުގައި ހުންނަ ބޭފުޅެއް، އެޓޯލް މިނިސްޓަރަށްވެ މާލޭ ސިޓީ ކައުންސިލްގެ ބާރު ކަނޑުވާލުމަކީ ގާނޫނީ ކުށެއް ކަމަށް ކުރީގެ ނައިބު ރައީސް އަދި ގާނޫނީ ވަކީލު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ވިލިމާލޭގެ ވެއްޓާއި ގުޅޭގޮތަށް ބަގީ ޚިދުމަތް ފެށުމަށް މާލޭ ސިޓީ ކައުންސިލުން ތައްޔާރުވެފައި ވަނިކޮށް އެ ރަށުގައި މިނީބަސް ފެށުމަށް ސަރުކާރުން ނިންމުމާއި ގުޅިގެން، ކައުންސިލުން ނުރުހުން ފާޅުކުރަމުން ދަނިކޮށް ސަރުކާރުގެ ކުންފުނި އެމްޓީސީސީން ވަނީ ބަސްތައް ވިލިމާލެއަށް އަރުވާފަ އެވެ.
އެކަމާއި ގުޅިގެން ނުރުހުން ފާޅުކޮށް ޑރ. ޖަމީލް ކުރެއްވި ޓުވީޓެއްގައި އޭނާ ވަނީ ވިލިމާލެއަށް ސިޓީ ކައުންސިލްގެ ބާރު ނުހިނގާ ޤާނޫނެއް އޮތީތޯ ރައީސް އިބްރާހިމް މުހައްމަދު ޞާލިހު ގެ އަރިހުން ސުވާލު ކުރައްވާފައެވެ.
އަދި ރައީސް ޞާލިހު، ގާނޫނު ތަކަށް ގޮންޖައްސަވަނީ ރައީސަކަށް ވީތީ ބޭނުން ގޮތެއް ހެދުމުގެ ބާރު އޮތް ކަމަށް ދެއްކިގެންތޯވެސް އޭނާ ސުވާލުކުރެއްވިއެވެ.
"ވަކި ކަމަކަށް ބެލުމެއްނެތް. ޤާނޫންތަކަށް ރައީސް ޞާލިހު ގޮންޖަހަނީ ރައީސަކަށްވީތީބޭނުން ގޮތެއް ހެދުމުގެ ބާރު އޮތް ކަމަށް ދެއްކިގެން؟ ވިލިމާލެއަށް ކައުންސިލްގެ ބާރު ނުހިނގާ ޤާނޫނެއް އޮތީ؟ ރައީސް އެޓޯލް މިނިސްޓަރވެ މާލޭ ސިޓީ ކައުންސިލްގެ ބާރު ކަނޑުވާލުމަކީ ކުށެއް. ޢައިރު ގާނޫނީކަމެއް" ޑރ. ޖަމީލް ވިދާޅުވި އެވެ.
ވިލިމާލޭގައި ބަގީގެ ޚިދުމަތް ދިނުމަށް ޓްރާންސްޕޯޓް މިނިސްޓްރީއިން ވަނީ 2022 ވަނަ އަހަރުގެ ސެޕްޓެމްބަރު 25 ގައި ރަސްމީ ސިޓީއަކުން މާލެ ސިޓީ ކައުންސިލަށް އެ ހުއްދަވެސް ދީފައެވެ.
އަދި ސިޓީ ކައުންސިލުން އެ ޚިދުމަތްދޭން ނިންމީ އޮންނަ ނިޒާމުގެ ތެރެއިން ސަރުކާރާއި ގުޅިގެން ކަމަށް މާލެސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވަނީ ވިދާޅުވެފަ އެވެ. އެހެން ނަމަވެސް އެ ޚިދުމަތް ފެށުމުގެ ފަހު މަރުހަލާގައި އޮއްވާ ކުއްލިއަކަށް ސަރުކާރުގެ ކުންފުނި އެމްޓީސީސީއިން ވިލިމާލޭގައި ބަހުގެ ޚިދުމަތްދޭން ނިންމުމަކީ ރައްޔިތުންގެ ފައިސާ އިސްރާފުކުރުން ކަމަށް ޑރ މުއިއްޒު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
