ބްރައިޓަންގެ ބެލްޖިއަމް މިޑްފީލްޑަރ ލިއަންޑްރޯ ޓްރޮސާޑް 27 މިލިއަން ޕައުންޑުގެ އެއްބަސްވުމެއްގެ ދަށުން ޕްރެމިއާ ލީގު ތާވަލުގެ އެއްވަނައިގައި މިވަގުތު އޮތް އާސެނަލް އާއި ގުޅިއްޖެއެވެ.
ޓްރޮސާޑްގެ އެޖެންޓް އާއި ހަވާލާދީ މީޑިއާތަކުން ރިޕޯޓް ކޮއްފައިވާގޮތުގައި، އުމުރުން 28 އަހަރުގެ މިޑްޕީލްޑަރ އާއި ބްރައިޓަންގެ މިހާރުގެ ކޯޗު ޒާބީއާ ދެމެދު އުފެދުނު ހިޔާތާފާތުވުން ތަކެއްގެ ސަބަބުން އޭނާ ހުރީ ކުލަބް ދޫކޮށްލަން ބޭނުންވެފައެވެ. ބެލެވޭ ގޮތުގައި ޓްރޮސާޑް އާ ކޯޗާ މައްސަލަ ޖެހުނީ ޓީމު ސެލެކްޝަންގެ ތެރެއިން ޖެހުނު މައްސަލަތަކެއްގެ ތެރޭގައެވެ. އަދި އެ މައްސަލަ އިތުރަށް ގޯސްވީ، ހުއްދަނެތި ތަމްރީނުތައް ދޫކޮށް ދިޔުމުން ކަމަށް ނޫސްތަކުން ރިޕޯޓްކޮއްފައި ވެއެވެ.
ލިއަންޑްރޯ ޓްރޮސާޑް ލަނޑުޖެހުމަށް ފަހު އުފާ ފާޅުކުރަނީ
އާސެނަލުން ޓްރޮސާޑް ގެންދަން މަސައްކަތް ފެށީ، ޝަކްތާ ޑޮނެސްކަށް ކުޅެމުން ދިޔަ ޔުކްރެއިންގެ ވިންގް، މައިހައިލޯ މުޑްރީކް ގެންދަން ކުރި މަސައްކަތް ނާކާމިޔާބުވުމުންނެވެ. މުޑްރީކް އާސެނަލްގެ ހުށަހެޅުން ގަބުލުކުރުމަށްފަހު، ފަހުވަގުތު އޭނަގެ ނިންމުން ބަދަލުކޮށް ދިޔައީ ވާދަވެރި ޗެލްސީއަށެވެ.
ޓްރޮސާޑަކީ މި ސީޒަނުގައި ބްރައިޓަން ޓީމުގައި އެންމެ ފޯމު ރަނގަޅުކޮށް ހުރި އެއް ކުޅުންތެރިޔާއެވެ. އޭނާ ވަނީ މި ސީޒަނުގައި ބްރައިޓަން އަށް ލީގުގައި ހަތް ގޯލް ޖަހައިދީ، ތިން އެސިސްޓް ފުރިހަމަ ކޮށްދީފައެވެ.
ޓްރޮސާޑްގެ ކުޅުން ސީޒަނުގައި އެންމެ ފާހަގަކޮށްލެވުނީ ލިވަޕޫލާ ދެކޮޅަށް ބްރައިޓަނުން ލީގުގައި ކުޅުނު މެޗުގައެވެ. އެ މެޗު 3-3 އިން އެއްވަރުވެފައިވާ އިރު، މެޗުގައި ޓްރޮސާޑް ވަނީ ބްރައިޓަނަށް ހެޓްރިކް ހަދައިދީފައެވެ.
Advertisement
This content is created and paid for by advertisers and does not involve Voice Journalists
