މި ސަރުކާރުން ހަނިމާދޫ އިންޑިއާއަށް ވިއްކާލައިފިކަމަށާއި، އެތަނުގައި ތަރައްގީކުރަން އުޅޭ އެއާރޕޯޓު ހޯދަން މީގެ ކުރިން އިންޑިއާގެ ޖީއެމްއާރު ކުންފުންޏަށް ދިން ވަރުގެ ބޮޑު ބަދަލެއް ދޭން ޖެހޭނެކަމަށް މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނައިބުރައީސް މުހައްމަދު ސައީދު ވިދާޅުވެއްޖެ އެވެ.
އިދިކޮޅުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ސައީދު ވިދާޅުވީ ހަނިމާދޫ އިންޓާނޭޝަނަލް އެއާޕޯޓު ޒަމާނީ ފެންވަރަކަށް ތަރައްގީކުރުމުގެ މަޝްރޫއަކީ އިންޑިއާއަށް ބަދަލުދިނުމަށް ހޯދި ފުރުސަތެއް ކަމަށެވެ.
ހަނިމާދޫ އެއާޕޯޓު ތަރައްގީ ކުރި ނަމަވެސް ސަރުކާރުން އެ އަންދާޒާކުރާ މިންވަރާއި ގާތަށްވެސް ފަތުރުވެރިން ނާންނާނެކަމަށް ސައީދު ވިދާޅުވިއެވެ. ފަތުރުވެރިން އިތުރުކުރާ ވާހަކަ ދައްކާއިރު ކޯވިޑާއި ގުޅިގެން ބަންދުކުރި އައްޑޫ ސިޓީގެ ދެ ރިސޯޓުވެސް ސަރުކާރަށް ހުޅުވާދެވިފައި ނުވާކަމަށާއި ހަނިމާދޫގައި އެއާޕޯޓު ތަރައްގީކުރުމުގެ މަގްސަދަކީ ފަތުރުވެރިން އިތުރުކުރުން ނޫންކަމަށް އޭނާ ވިދާޅުވިއެވެ.
" ދެން މި ބުނަނީ އެއް މިލިއަން ފަތުރުވެރިން ރާއްޖެ ގެންނަންވެގެންނޭ، ބުނާއިރު އައްޑޫއަށް މި އުޅެނީ ފަތުރުވެރިކަމަށް ހުޅުވި ރިސޯޓުތައް.. މި ހުޅުވައިގެން ހިންގި ރިސޯޓުތައްވެސް.. ކޮވިޑާއި ގުޅިގެން ލެއްޕި ރިސޯޓުތައް.. ހިންގި ރިސޯޓުތައްވެސް ނުހުޅުވިގެން މި އުޅެނީ.. ވެލާނާ އިންޓަނޭޝަނަލް އެއަރޕޯޓަށް 1 މިލިއަން ފަތުރުވެރިން ގެންނަން ކިތައް މިލިއަން ނެގިތޯ؟ 30..40..50 އަހަރު ވެގެން މިޔޮއް ދިޔައީ ރާއްޖޭގެ ޓުއަރިޒަމަށް 50 އަހަރު މިވީ އަދި ކިރިޔާ 2 މިލިއަން ފަތުރުވެރިން އައީ"
ޕީއެންސީގެ ނައިބުރައީސް މުހައްމަދު ސައީދު
ކުރީގެ އިކޮނޮމިކް މިނިސްޓަރުކަންވެސް ކުރައްވާފައިވާ ސައީދު ވިދާޅުވީ ދިވެހިރާއްޖެއަށް އަންނަ ފަތުރުވެރިންގެ އަދަދު ދެ މިލިއަނަށް އެރުވުނީ ރައީސް އަބްދުﷲ ޔާމީން އަބްދުލްގައްޔޫމުގެ ޒައާމަތުގައި ކުރެއްވި ބުރަ މަސައކަތްޕުޅުގެ ސަބަބުންކަމަށެވެ. އެގޮތުން އެއާޕޯޓު ތަރައްގީކުރުމަށް އިންޑިއާގެ ޖީއެމްއާރު ކުންފުންޏަށް ރައީސް ޔާމީންގެ ޒައާމަތުގައި ބޮޑު ބަދަލެއް ދޭން ޖެހުނުކަން ސައީދު ފާހަގަކުރެއްވިއެވެ.
އެއާއެކު އޭނާ ވިދާޅުވީ ހަނިމާދޫ އެއާޕޯޓަކީވެސް ޖީއެމްއާރަށް ދިވެހިންގެ މައި ދޮރޯށި ވިއްކާލުން ފަދަ ޖަރީމާއެއް ކަމަށެވެ. މިފަހަރު އެ އެއާޕޯޓު ވިއްކާލާފައިވަނީ ވާދަވެރި ސިޔާސީ ލީޑަރު ޖަލުގައި ބަހައްޓައިގެން ކަމަށާއި، ދެން އެ އެއާޕޯޓު ހޯދަން ބޮޑު ބަދަލެއް އިންޑިއާއަށް ދޭން ޖެހޭނެކަމަށް ސައީދު ވިދާޅުވިއެވެ.
"މީގެ ކުރިން ޖީއެމްއާރަށް ކޮމްޕެންސޭޝަނެއް ދީފައި އޮއްވާ އިދިކޮޅު ލީޑަރު، ރައީސް ޔާމީން ހައްޔާރުކޮށްފައި އަނެއްކާ ދެވަަނަ ކޮންޕެންސޭޝަނެއް މި ހޯދީ ހަނިމާދޫ މެދުވެރިކޮށް"
ޕީއެންސީގެ ނައިބުރައީސް މުހައްމަދު ސައީދު
ހަނިމާދޫގައި އިންޑިއާ ސިފައިން ގާއިމުވެ ތިބުމާއި ގުޅިގެންވެސް އިދިކޮޅުން ގެންދަނީ ކަންބޮޑުވުން ފާޅުކުރަމުންނެވެ.
އެއާޕޯޓު ތަރައްގީކުރުމަށް ހަނިމާދޫއިން މީހުން ދިރިއުޅޭ ސަރަހައްދުން 4 ލައްކަ އަކަފޫޓުގެ ބިން ދޫކުރުމާއި ގުޅިގެން ހަނިމާދޫ ރައްޔިތުން މީގެ ކުރިން މުޒާހަރާވެސް ކޮށްފައިވެއެވެ.
ހަނިމާދޫ އެއާޕޯޓު ތަރައްގީކުރުމުގެ މަޝްރޫއަކީ 2.1 ބިލިއަން ރުފިޔާގެ މަޝްރޫއެކެވެ. އޭގެ ތެރެއިން 800 މިލިއަން ރުފިޔާއަކީ އިންޑިއާގެ ލޯނު އެހީއެވެ.
އިގްތިސާދީގޮތުން ދަތި މިހާލަތުގައި ބޮޑު ލޯނެއް ނަގައިގެން އެފަދަ މަޝްރޫއެއް ހިންގަމުންދާތީ އިދިކޮޅުން ގެންދަނީ ފާޑުކިޔުންތައް އަމާޒުކުރަމުންނެވެ. އަދި 2.1 ބިލިއަން ރުފިޔާއަކީ ހަނިމާދޫ އެއާޕޯޓު ވަރުގެ 3 އެއާޕޯޓު އެޅޭނެ ފައިސާކަން އެ ފަރާތްތައް ފާހަގަކުރައްވަ އެވެ.
Advertisement
This content is created and paid for by advertisers and does not involve Voice Journalists
