ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާހިލަށް ވޯޓު ދޭ ހިތުން މާލޭ ތައްޔިތުން ތިބީ ކެތްމަދުވެފައިކަމަށް މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސެއިން) ވިދާޅުވެއްޖެ އެވެ.
ކާނިވާ ސަރަހައްދުގައި ބޭއްވި ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން އަނދުން ހުސެއިން ވަނީ ރައީސް ސޯލިހަށް އެމްޑީީގެ ޕްރައިމަރީ ކާމިޔާބުކޮށްދިނުމަށް މާލޭ ރައްޔިތުން އެމަނިކުފާނަށް ވޯޓު ދޭން ޖެހޭ ސަބަބުތަކަށް އަލިއަޅުވާލައްވާފަ އެވެ.
އަނދުން ހުސެއިންގެ ވާހަކަފުޅު ފައްޓަވަމުން ވިދާޅުވީ ރައީސް ޞާލިހުގެ ކެމްޕޭނަށް ދޮރުން ދޮރަށް ކުރި ޒިޔާރަތުގައި މާލޭގެ 7 ދާއިރާއެއްގެ ރައްޔިތުން ކަންބޮޑުވުން ފާޅުކޮށްފައިވާކަމަށެވެ.
އެ ދާއިރާތަކުގެ ރައްޔިތުންގެ އެންމެ ބޮޑު ކަންބޮޑުވުމަކީ އެ ދާއިރާތައް ތަމްސީލު ކުރައްވާ މެމްބަރުން ރައީސް ޞާލިހު ދޫކޮށްލާ މި އިންތިޚާބުގައި އެމަނިކުފާނާއި ވާދަކުރައްވާ މަޖިލީހުގެ ރައީސް މުހައްމަދު ނަޝީދާއި ގުޅިވަޑައިގަތުމުން އޮތް ކަންބޮޑުވުންކަމަށް އަނދުން ހުސެއިން ވިދާޅުވިއެވެ. އަދި އެކަމުގެ ސަބަބުން އެ ރައްޔިތުންނަށް ސަރުކާރުން ދޫކުރާ ގޯތި ނުލިބިދާނެކަމުގެ ކަންބޮޑުވުންވެސް ފާޅުކޮށްފައިވާކަމަށް އަނދުން ހުސެއިން ވިދާޅުވިއެވެ.
ރައީސް ޞާލިހާއި ދެކޮޅު މެމްބަރުން ތަމްސީލުކުރައްވާ ދާއިރާތަކުގެ ރައްޔިތުންގެ އެ ކަންބޮޑުވުމާއި ގުޅިގެން އަނދުން ހުސެއިން ވިދާޅުވީ އެ ދާއިރާތަކުގެ މެމްބަރުން ރައީސް ޞާލިހުގެ ފަހަތްޕުޅުގައި ނެތް ނަމަވެސް ރައްޔިތުންނަށް ލިބެން ޖެހޭ ގޯތި ދޫކުރުމުގައި އެމަނިކުފާނު ތަފާތުކުރުމެއް ނުގެންގުޅޭނެކަމުގެ ޔަގީންކަން ދެއްވާކަމަށެވެ.
"އަޅުގަނޑު ދަންނަވާނީ ޔަގީން ކުރައްވާށޭ، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް އިތުބާރުކުރައްވާށޭ.. ތިބޭފުޅުންގެ މެމްބަރުން ކޮންމެތާކު ހުއްޓަސް، ރައީސް ތިބޭފުޅުންނަށް ހައްގުވާ ގޯތި ތިބޭފުޅުން ރަނގަޅަށް ފޯމު ފުރާފައި ރަނގަޅަށް ލާފައި އޮތްކަމަށް ވާނަމަ ދެއްވާނެއޭ"
ހެންވޭރު ދެކުނު ދާއިރާގެ މެމްބަރު އަނދުން ހުސެއިން
އަނދުން ހުސެއިން ވިދާޅުވީ މާލޭގެ ރަށްވެހިންނަށް ގޯތި ދޫކުރުމުގެ މަސައްކަތަކީ ކުރީ ސަރުކާރުތަކުން ދޫކޮށްލާފައިވާ މަސައްކަތެއްކަމަށެވެ.
ޚުދު އެމްޑީޕީގެ ވެރިކަމުގައި ނަޝީދު ހުންނަވައިގެން މާލޭގެ ރައްޔިތުންނަށް އެކަށީގެންވާ މިންވަރަށް ގޯތި ދޫކުރެއްވިފައި ނުވާކަމަށާއި، ބޯހިޔާވަހިކަމުގެ މައްސަލަ ހައްލުކޮށްދެއްވުމަށް އެންމެ މުހިންމު މަސައްކަތްތަކެއް ކުރެވިގެން ދިޔައީ ރައީސް ޞާލިހުގެ ވެރިކަމުގައި ކަމަށް އޭނާ ވިދާޅުވި އެވެ.
"އަޅުގަނޑުމެން އެމްޑީޕީގެ ފުރަތަަމަ ވެރިކަމުގައި މާގިނަ ގޯތި އަޅުގަނޑުމެންނަށް ލިބުނުކަމަށް އުޅެނީ.. ނޫން! 230 ހަކަށް ގޯތި ދެވިގެން އުޅެނީ.. މީ ހިސާބު ނޭނގޭތީ.. މާލޭގެ ރައްޔިތުންނަށް ބޭނުންވަނީ ކިތައް ގޯތިކަން،، ހިސާބު ޖެހި ނޭނގޭވަރު އެއީ. ރައީސް އިބްރާހިމް މުހައްމަދު ސޯލިހު ފައްޓަވަނީވެސް 5000 އިން"
ހެންވޭރު ދެކުނު ދާއިރާގެ މެމްބަރު އަނދުން ހުސެއިން
އަނދުން ހުސެއިން ވިދާޅުވީ ރައީސް ޞާލިހަކީ އެހެން ލީޑަރުންނާއި ތަފާތު ބޭފުޅެއްކަމަށެވެ. އެގޮތުން އެމަނިކުފާނަކީ ހަގީގީ މާނައިގައި ރައްޔިތުންނަށް ފަޚުރުވެރި ދިރިއުޅުމެއް އުޅެވޭނެ ގޮތް ހޯއްދަވާދެއްވުމަށް މަސައްކަތް ކުރައްވާ ލީޑަރެއްކަން މާލޭގެ ރައްޔިތުންވެސް ގަބޫލުކުރާކަމަށް އޭނާ ވިދާޅުވިއެވެ.
އަދި މިފަދަ އެތައް ސަބަބުތަކެއް ހުރުމުން އެމްޑީޕީގެ ރިޔާސީ ޕްރައިމަރީގައި ރައީސް ޞާހިލަށް މާލެއިން ބޮޑު އަގުލަބިއްޔަތެއް ލިބޭނެކަމަށް އުންމީދުކުރައްވާކަން ފާހަގަކުރައްވާ އަނދުން ހުސެއިން ވަނީ 28 ވަނަ ދުވަހު އޮންނަ އެމްޑިޕީގެ ރިޔާސީ ޕްރައިމަރީ ރައީސް ޞާލިހަށް ކާމިޔާބުކޮށް ދެއްވުމަށް މާލޭގެ އެމްޑީޕީގެ މެމްބަރުން ވޯޓުލުމަށް ނިކުތުމަށް އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
