ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ތަފާތުބޮޑުކޮށް މޮޅުވާނެކަމުގެ ޔަގީންކަން އޮތްކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ ވިދާޅުވެއްޖެ އެވެ.
ރިޒާ މިފަދައިން ވިދާޅުވެފައިވަނީ ހުކުރު ދުވަހުގެރޭ ކާނިވާގައި އޮތް ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން ނެވެ.
ރިޒާ ވިދާޅުވިގޮތުގައި ހއ ތުރާކުރުން ފެށިގެން އައްޑޫ ސިޓީއާއި ހަމަޔަށް ކޮންމެ ރަށަކުންވެސް ރައީސް ޞާލިހަށް ބޮޑުތަނުން ތާއީދު އެބައޮތެވެ. ރައްޔިތުން ތިބީ ގޮތް ނިންމައިގެން ކަމަށާއި، ރައްޔިތުން ބޭނުންވަނީ އެމްޑީޕީއާއެކު ކުރިއަށް ދާންކަމަށް ރިޒާ ވިދާޅުވިއެވެ.
އަދި ރައްޔިތުން ރައީސް ޞާލިހާއެކު ކުރިއަށްދާން ބޭނުންވާ އެންމެ ބޮޑު ސަބަބަކީ ބޮޑު ރަށެއް ކުޑަ ރަށެއް ބެއްލެވުމެއްނެތި ރަށްތަކަށް ޚިދުމަތްކޮށްދެއްވާތީ ކަމަށް ރިޒާ ވިދާޅުވިއެވެ.
"އިއްޒަތްތެރި ރައީސް! މަނިކުފާނުގެ މި ޕްރައިމަރީ 28 ވަނަ ދުވަހު މި އެމްޑީޕީގެ މެމްބަރުން ވިދާޅުވަނީ މި ޕްރައިމަރީގައިވެސް އަދި ކުރިއަށް އޮތް ދައުރުގައިވެސް ތިމަންނަމެން ނިންމައިގެން މި ތިބީ ފަހަތަށް ދާ ގޮތަކަށް ނޫނޭ.. ކުރިއަށް ދާ ގޮތަށޭ.."
މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ
ރައީސް ޞާލިހުގެ ވެރިކަމުގެ ފަސް އަހަރުގައި މީގެ 50 އަހަރު ކުރިން ނުލިބުނު ހިތްހަމަޖެހުމާއި އުފާވެރިކަން ރައްޔިތުން ތަޖުރިބާކޮށްފައިވާކަމަށް ރިޒާ ވިދާޅުވި އެވެ.
އެގޮތުން މިހާތަނަށް 1350އަށްވުރެ ގިނަ ޕްރޮޖެކްޓު މި ސަރުކާރުން މިހާރުވެސް ހިންގަމުންދާކަމަށް އޭނާ ވިދާޅުވިއެވެ. އަދި ވިދާޅުވީ ރައީސް ޞާލިހަށް ދެވަނަ ދައުރެއްދޭން ރައްޔިތުން ބޭނުންވަނީ އެ މަޝްރޫއުތައް ނުހުއްޓި ކުރިއަށް ގެންދިއުމަށް ބޭނުންވާތީ ކަމަށެވެ.
Advertisement
This content is created and paid for by advertisers and does not involve Voice Journalists
