މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ނޫން އެންމެން އެމްޑީޕީއާއި ދެކޮޅުވުމަކީ ޕާޓީގެ އާންމު މެމްބަރުންގެ ކުށެއް ނޫންކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ ހުކުރު ދުވަހުގެ ރޭ ކާނިވާ ސަރަހައްދުގައި އޮތް އެމަނިކުފާނުގެ ކެމްޕޭނު ޖަލްސާގައި ވާހަކަދައްކަވަމުން ނެވެ.
ރައީސް ޞާލިހު ވިދާޅުވީ އެމްޑީޕީ އެކަހެރިވެ ބާކީ ވުމަކީ އާންމު މެމްބަރުންގެ ކުށެއް ނޫންކަމަށެވެ. މާޒީގައި އެފަދަ ކަންކަން ދިމާވެފައިވާކަމަށާއި، އެކަމުގެ ސަބަބުން އާންމު މެމްބަރުންނަށް ނިކަމެތިކަން ތަޖުރިބާކޮށްފައިވާ ކަމަށް އެމަނިކުފާނު ވިދާޅުވިއެވެ.
"އެމްޑީޕީ ނޫން އެންމެން އެމްޑީޕީއާއި ދެކޮޅުވެރިވެ އެމްޑީޕީ އެކަނިވެ މަގުމަތިވާން ޖެހުމަކީ އެމްޑީޕީގެ މެމްބަރުންގެ ކުށެއް ނޫން. ރާއްޖޭގައި އޮތް އެންމެ ބޮޑު ސިޔާސީ ޕާޓީއަށް ފުރުސަތު ގެއްލިއްޖެނަމަ ކަން ދިމާވާ ދެރަ ގޮތް އަޅުގަނޑުމެން ތަޖުރިބާކޮށްފިން"
ރައީސް ޞާލިހު
އެމްޑީޕީގެ ވެރިކަން ދެމެހެއްޓުމަށް ކޯލިޝަން ދެމެހެއްޓުން މުހިންމުކަމަށް ރައީސް ޞާލިހު ގެންދަވަނީ ވަކާލާތުކުރައްވަމުން ނެވެ. އެގޮތުން ކޯލިޝަނަކާއި ނުލާ އެއްވެސް ސިޔާސީ ޕާޓީއަކަށް ވެރިކަމަށް އާދެވިދާނެކަމަށް އެމަނިކުފާނު ގަބޫލުފުޅެއް ނުކުރައްވައެވެ.
މާޒީގެ ތަޖުރިބާއަށް ބަލާއިރު، މި އިންތިޚާބުގައި ރައީސް ޞާލިހާއި ވާދަކުރައްވަން ނިކުމެވަޑައިގެން ހުންނެވި މަޖިލީހުގެ ރައީސް މުހައްމަދު ނަޝީދަށް ވެރިކަން ގެއްލުނީވެސް ކޯލިޝަން ދަމަހައްޓަން އެނގިނުލެއްވުމުން ކަމަށާއި، އަދި 2013 ވަނަ އަހަރުގެ ރިޔާސީ އިންތިޚާބުވެސް ނަޝީދަށް ގެއްލުނީ އެމަނިކުފާނާއި އެއްގަލަކަށް އަރާނެ ސިޔާސީ ޕާޓީއެއް ނެތުމުންކަމަށް ރައީސް ޞާލިހު ވަނީ ވިދާޅުވެފައެވެ.
އެހެން ވުމުގެ ސަބަބުން، އެމްޑީޕީގެ އާންމު މެމްބަރުންނަށް ގިނަ ދުވަސްތަކެއް ވަންދެން މަގުމަތީގައި ތިބެން ޖެހުނު ކަމަށާއި، އަނބުރާ އެ މާޒީ އިޔާދަވާން އާންމު މެމްބަރުން ބޭނުން ނުވާކަމަށް ރައީސް ޞާލިހު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
