އިޓާލިއަން ލީގުގައި ރޭ ރަށުން ބޭރުގައި ސެލާނިޓާނާ އާ ވާދަކޮށް 2-0 އިން މޮޅުވެ، ނަޕޯލީ ޓޭބަލްގެ އެއްވަނައިގައި 12 ޕޮއިންޓްގެ ލީޑެއް ހޯދައިފި އެވެ.

ރޭގެ މެޗުގައި ނަޕޮލީއަށް ލީޑު ހޯދައިދިނީ ފުރަތަމަ ހާފުގެ އިތުރު ވަގުތުގައި އިޓަލީގެ ޑިފެންޑަރ ޖިއޮވާނީ ޑި ލޮޒާނޯ އެވެ. މިއީ އެޓީމުގެ ކެމަރޫން މިޑްފީލްޑަރ އަންދްރޭ ޒަމްބޯ އަންގުއިސާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. ލީގުގައި އެންމެ ފަހުން ކުޅުނު މެޗުގައި އެޓަލާންޓާ އަތުން 8-2 ބަލި ސެލާނިޓާނާ އިން މި މެޗުގެ ފުރަތަމަ ހާފުގައި ނަޕޯލީ އާއި ދެކޮޅަށް ރަގަޅު ދިފާއީ ކުޅުމެއް ދައްކައިދީފައިވެއެވެ.

ނައިޖީރިއާ ފޯވާޑް ވިކްޓާ އޮސީމެން

ދެވަނަ ހާފު ފެށިގެން ތިންވަނަ މިނިޓުގައި ނަޕޯލީގެ ދެވަނަ ލަނޑު ކާމިޔާބުކޮށްދިނީ އެޓީމުގެ ނައިޖީރިއާ ފޯވާޑް ވިކްޓާ އޮސީމެން އެވެ. މިއީ މިސީޒަނުގައި އިޓާލިއަން ލީގުގައި ކުޅުނު 15 މެޗުގައި އޭނާ ކާމިޔާބުކުރި 13 ވަނަ ލަނޑެވެ. އަދި ރަން ބޫޓު ހޯދުމުގެ ރޭހުގައި އޭނާ އެއްވަނައިގައި އޮތީ އިންޓަ މިލާނުގެ ލައުޓާރޯ މާޓިނޭޒް އާއި އެޓަލާންޓާގެ އަޑެމޯލާ ލުކްމަން އަދި ސްޕީޒިއާގެ އެމްބާލާ އެންޒޯލާ އަށް ވުރެ ހަތަރު ގޯލު ކުރީގަ އެވެ.

މި ނަތީޖާއާ އެކު ނަޕޯލީ ވަނީ މިހާތަނަށް ލީގުގައި ކުޅުނު 19 މެޗުން 50 ޕޮއިންޓް ހަމަކޮށްފަ އެވެ. ދެވަނައިގައި އޮތް އޭސީ މިލާނަށް 18 މެޗުން ލިބިފައި ވަނީ 38 ޕޮއިންޓެވެ. އަދި އިންޓަ މިލާން ތިންވަނައިގައި އޮތީ 18 މެޗުން 37 ޕޮއިންޓް ހޯދައިގެންނެވެ.

އެއްވަނައިގައި ނަޕޯލީ އިން 12 ޕޮއިންޓްގެ ލީޑަކާއެކު އޮތް ނަމަވެސް، އަންގާރަ ދުވަހުގެ ރޭ އޭސީ މިލާނުން ހަތަރު ވަނައިގައި އޮތް ލާޒިއޯ ބަލި ކޮށްފި ނަމަ އެ ފަރަގު ނުވަ ޕޮއިންޓަށް ކުޑަ ކުރެވޭނެ އެވެ.

މި ސީޒަން ގައި ނަޕޯލީ މިހާތަނަށް ލީގުގައި ބަލިވީ އެންމެ މެޗަކުންނެވެ. އެއީ މި އަހަރުގެ ފުރަތަމަ މެޗުގައި އިންޓަ މިލާން އަތުން 1-0 އިންނެވެ. ޑިއޭގޯ މަރަޑޯނާގެ ކެޕްޓަން ކަމުގައި 1986/1987 ސީޒަނާއި 1989/1990 ސީޒަންގައި ނަޕޯލީ އިން އިޓާލިއަން ލީގު ކާމިޔާބުކޮށްފައި ވާއިރު މިފަހަރު ލީގު ކާމިޔާބުކުރާނެ ކަމަށް އެންމެ ބޮޑަށް ބެލެވެނީވެސް އެޓީމެވެ.