ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ކެމްޕެއިން ކޮށްދޭ މީހުންނާ ދިމާކޮށް ހަމަނުޖެހުން އުފައްދަން ބަޔަކު މަސައްކަތް ކުރަމުންދާ ކަަމަށާ އެކަން ހަރުކަށި އިބާރާތުން ކުށްވެރި ކުރައްވާ ކަމަށް އެމަނިކުފާނުގެ ކެމްޕެއިންގައި އިސްކޮށް ހަރަކާތްތެރިވާ ކިނބިދޫ ދާއިރާގެ މެންބަރު މުހައްމަދު ނާޝިޒް ވިދާޅުވެއްޖެ އެވެ.

ނާޝިޒު މިފަދައިން ވިދާޅުވީ، ރައްޔިތުން މަޖިލީހުގެ ތުޅާދޫ ދާއިރާގެ މެންބަރު ހިސާން ހުސެއިން ބ. ތުޅާދޫއަށް ވަޑައިގަތުމުން ގިނަ ބަޔަކު ނިކުމެ މުޒާހަރާކުރުމުން އެކަމަށް ތާއީދު ކޮށް، އެމްޑީޕީގެ ޕްރައިމަރީގައި ވާދަކުރައްވާ އެޕާޓީގެ ރައީސް މުހައްމަދު ނަޝީދުގެ ސަޕޯޓަރުން ޝުޢޫރު ފާޅުކުރަމުންދަތީ އެކަމަށް ރައްދު ދެއްވައި ކުރެއްވި ޓްވީޓެއްގައެވެ. 

ނާޝިޒް ވިދާޅުވީ، އެމްޑީޕީގެ ޕްރައިމަރީތަކުގައި އަަބަދުވެސް ވާދަވެރި ކެންޕެއިނެއް ހިނގާ ކަމަށެވެ. އަދި ދުވަހަކުވެސް ހަމަޖެހުން ނަގާލަން މިހާތަނަށް މަސައްކަތް ކޮށްފައި ނުވާ ކަމަށާ އެހެންނަމަވެސް މިފަހަރުގެ ރިޔާސީ ޕްރައިމަރީ ތަފާތު ކަމަށް އޭނާ ވިދާޅުވިއެވެ. އެގޮތުން މިހާރު ފެންނަނީ ރައީސް ޞާލިހަށް ކެމްޕެއިން ކޮށްދޭ މީހުންނާ ދިމާކޮށް ކުރީން އޮތް ރީތި އުސޫލުތައް މުގުރާލާ ހަމަނުޖެހުން އުފައްދަން ބަޔަކު މަސައްކަތް ކުރާ މަންޒަރު ކަމަށް ވިދާޅުވިއެވެ.

Advertisement

މީގެ އިތުރުން ވެސް ނާޝިޒު ކުރެއްވި ޓްވީޓެއްގައި އޭނާ ވަނީ ވާދަވެރި ރައީސް ޞާލިހު ގެ ކެންޑިޑޭޓު ރައީސް ނަޝީދަށް ތާއީދުކުރާ މީހުންގެ ފަރާތުން އެފަދަ ހުތުރު ޢަމަލު ތަކަށް ތާއީދު ކޮށް، އެކަން ޕްރޮމޯޓް ކުރުން ހަރުކަށި އިބާރާތުން ކުށްވެރި ކުރައްވާ ކަމަށެވެ. 

ހިސާން މިއަދު ތުޅާދޫއަށް ވަޑައިގަތުމާއެކު ގިނަ ރައްޔިތުންތަކެއް ނިކުމެ ވަނީ ނުރުހުން ފާޅުކޮށް މުޒާހަރާކޮށްފައެވެ. އަދި އެ މީހުންވަނީ ހިސާންގެ ފަހަތުން އަޑުގަދަ ކުރަމުން ހިނގާ މި ސަރުކާރުގެ ނުފުއްދި ހުރި ވައުދުތަކުގެ ވާހަކަވެސް ދައްކާފައެވެ.