އިގިރޭސި ޕްރެމިއާ ލީގުގައި މެންޗެސްޓަރ ސިޓީ އާއި ވުލްވްސް ވާދަކުރި މެޗު 3-0 ން ކާމިޔާބުކޮށް މެންޗެސްޓަރ ސިޓީ އިން އެއްވަނައިގައި އޮތް އާސެނަލް އާއި ދެމެދުގައިވާ ފަރަގު ދެ ޕޮއިންޓަށް ކުޑަކޮށްފިއެވެ.

މެންޗެސްޓަރ ސިޓީގެ އިއްތިހާދު ސްޓޭޑިއަމްގައި މިރޭ ކުޅެވުނު މެޗުގައި އެޓީމުގެ ފުރަތަމަ ލަނޑު ފުރަތަމަ ހާފުގެ 40 ވަނަ މިނެޓުގައި ކާމިޔާބުކޮށްދިނީ އެޓީމުގެ ނޯވޭ ފޯވާޑް އެރްލިންގް ހާލަންޑް އެވެ. މިއީ އެޓީމުގެ ބެލްޖިއަމް މިޑްފީލްޑަރ ކެވިން ޑި ބްރޭނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިރޭގެ މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ މެންޗެސްޓަރ ސިޓީ އިން މެޗު ޑޮމިނޭޓުކުރި އިރު މިހާފުގައި ވުލްވްސް ޓީމަށް ސިޓީގެ ގޯލަށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ.

ހާލަންޑް ސިޓީގެ ތިން ވަނަ ލަނޑު ކާމިޔާބުކޮށްދެނީ

ދެވަނަ ހާފުގެ 50 ވަނަ މިނެޓުގައި ސީޓިގެ ދެވަނަ ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން ހާލަންޑްއެވެ. އަދި އޭގެ ހަތަރު މިނެޓު ފަހުން ހާލަންޑް ވަނީ އިތުރު ލަނޑެއް ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މިއީ އެޓީމުގެ އަލްޖީރިއާ ފޯވާޑް ރިޔާދު މަހްރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިއީ މި ސީޒަނުގައި މެންޗެސްޓަރ ސިޓީއާއި ގުޅުނުފަހުން ޕްރެމިއާ ލީގުގައި ހާލަންޑް ކާމިޔާބުކުރި ހަތަރުވަނަ ހެޓްރިކެވެ. އަދި މިރޭ ކާމިޔަބުކުރި ތިން ލަނޑާއި އެކު މިސީޒަނުގައި ޕްރެމިއާލީގުގައި އޭނާ ކާމިޔާބުކުރި ލަނޑުގެ އަދަދު ވަނީ 25 އަށް އަރާފައެވެ.

މިރޭގެ މެޗުން ލިބުނު ތިން ޕޮއިންޓައި އެކު މެންޗެސްޓަރ ސިޓީއިން ވަނީ ލީގުގައި ކުޅުނު 20 މެޗުން 45 ޕޮއިންޓް ހޯދާފައެވެ. އެޓީމު ތާވަލުގެ ދެވަނައިގައި އޮތް އިރު އެއްވަނައިގައި އޮތީ 18 މެޗުން 47 ޕޮއިންޓް ހޯދާފައިވާ އާސެނަލް އެވެ. މިރޭގެ މެޗުން ބަލިވި ވުލްވްސް އޮތީ 20 މެޗުން ލިބުނު 17 ޕޮއިންޓާއި އެކު ތާވަލުގެ 17 ވަނައިގައެވެ.