އިގިރޭސި ޕްރެމިއާ ލީގުގައި މެންޗެސްޓަރ ޔުނައިޓެޑާއި އާސެނަލް ވަދަކުރި މެޗުގެ ފަހުވަގުތު ކާމިޔާބުކުރި ލަނޑާއި އެކު 3-2 ން މޮޅުވެ ލީގުގެ އެއްވަަނައިގައި އާސެނަލް އިން ފަސް ޕޮއިންޓްގެ ލީޑެއްނަގައިފިއެވެ.

އާސެނަލްގެ އެމިރޭޓް ސްޓޭޑިއަމްގައި މިރޭ ކުޅެވުނު މެޗުގައި ފުރަތަމަ ލަނޑުޖަހައި ލީޑު ހޯދީ މެންޗެސްޓަރ ޔުނައިޓެޑުންނެވެ. މި ލަނޑު ފުރަތަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ އިގިރޭސި ފޯވާޑް މާކަސް ރަޝްފޯޑް އެވެ. މިއީ އެޓީމުގެ ޕޯޗުގަލް މިޑްފީލްޑަރ ބްރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އާސެނަލް އަށް މެޗުގެ ނަތީއްޖާ އެއްވަރުކޮށްދިނީ ފުރަތަމަ ހާފުގެ 24 ވަނަ މިނެޓުގައި އިގިރޭސި ފޯވާޑް އެޑީ އެންކެޓިއާ އެވެ. މިއީ އެޓީމުގެ ސުވިޒަލެންޑް މިޑްފީލްޑަރ ގްރެނިޓް ޒަކާ ތަވަނަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ.

މާކަސް ރަޝްފޯޑް ޔުނައިޓެޑުގެ ފުރަތަމަ ލަނޑު ކާމިޔާބުކޮށްދިނުމަށް ފަހު އުފާ ފާޅުކުރަނީ

ދެވަނަ ހާފު ފެށިގެން 53 ވަނަ މިނެޓުގައި އާސެނަލްއަށް މި މެޗުގައި ފުރަތަމަ ފަހަރަށް ލީޑު ހޯދައިދިނީ އެޓީމުގެ އިގިރޭސި މިޑްފީލްޑަރ ބުކަޔޯ ސަކާ އެވެ. މިއީ އެޓީމުގެ ޖަޕާން ޑިފެންޑަރ ޓަކެހިރޯ ޓޮމިޔާސޫ ތަނަވަސްކޮށްދިން ފުރުސަތެއްގައި ސަކާ ކާމިޔާބުކޮށްދިން ލަނޑެކެވެ.

އާސެނަލް އިން ލީޑުނެގިތާ ހަ މިނެޓުފަހުން މެންޗެސްޓަރ ޔުނައިޓެޑުގެ ޑިފެންޑަރ ލިސެންޑްރޯ މާޓިނޭޒް ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީއްޖާ އެއްވަރުކޮށްދީފައެވެ. މި މެޗުން އާސެނަލް މޮޅުވި ލަނޑު މެޗުގެ 90 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑުވެސް ކާމިޔާބުކޮށްދިން އެޑީ އެންކެޓިއާ އެވެ. 

މިރޭގެ މެޗުން ލިބުނު ތިން ޕޮއިންޓާއި އެކު ލީގުގައި ކުޅުނު 19 މެޗުން އާސެނަލް އަށް ވަނީ 50 ޕޮއިންޓު ލިބިފައެވެ. މިރޭގެ މެޗުން ބަލިވި މެންޗެސްޓަރ ޔުނައިޓެޑް 20 ލިބުނު 39 ޕޮއިންޓާއި އެކު އެޓީމު މިވަގުތު އޮތީ ލީގު ތާވަލުގެ ހަތަރު ވަނައިގައެވެ.