ދުނިޔޭގެ އެންމެ މުސާރަ ބޮޑު ފުޓްބޯޅަ ކުޅުންތެރިއާގެ ގޮތުގައި ސައުދިއަރަބިއާގެ އަލް ނަސްރު އަށް ބަދަލުވި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެޓީމަށް ކުޅެދިން ފުރަތަމަ މެޗުގައި މިރޭ އަމިއްލަ ދަނޑުގައި އަލް އިއްތިފާގް އާއި ވަދަކޮށް 1-0 ން އެޓީމު މޮޅުވެއްޖެއެވެ.

މިރޭގެ މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ އަލް ނަސްރު އިން މެޗު ޑޮމިނޭޓުކުރި ނަމަވެސް މިހާފުގައި ލަނޑުޖަހާނެ މަގިނަ ފުރުސަތުތަކެއް އެޓީމަށް ހޯދިފައެއްނުވެއެވެ.  މިރޭގެ މެޗުގައި ފެނިގެން ދިޔަ ހަަމައެކަނި ލަނޑު ފުރަތަމަ ހާފުގެ 31 ވަނަ މިނެޓުގައި އެޓީމަށް ކާމިޔާބުކޮށްދިނީ ބްރެޒިލްގެ މިޑްފީލްޑަރ އެންޑަސަން ޓަލިސްކާ އެވެ. މިއީ މިސީޒަނުގައި ލީގުގައި ކުޅުނު 12 މެޗުގައި އޭނާ ކާމިޔާބުކުރި 12 ވަނަ ލަނޑެވެ. އަދި މިވަގުތު ސައުދީ ލީގުގެ އެންމެ ގިނަ ލަނޑުޖެހި ކުޅުންތެރިންގެ ލިސްޓުގެ އެންމެ ކުރީގައިވެސް އުޅެނީ ޓަލިސްކާ އެވެ.

މިރޭގެ މެޗުގެ އަލް ނަސްރު ޓީމުގެ ފުރަތަމަ އެގާރަ

މިރޭގެ މެޗުގެ ދެވަނަ ހާފުގައި އަލް ނަސްރު އިން ކުޅުން ރަގަޅުކޮށް ގިނަ ފުރުސަތުތަކެއް ތަނަވަސްކުރި ނަމަވެސް މި މެޗުގައި އެޓީމަށް އިތުރު ލަނޑެއް ކާމިޔާބު ކުރެވިފައެއް ނުވެއެވެ. މިރޭގެ މެޗުގައި އެޓީމުގެ ކެޕްޓަން ބޭންޑް އަޅައިގެން ކުޅުނު ކުރިސްޓިއާނޯ ރޮނާލްޑޯއަށް ލަނޑެއް ކާމިޔާބު ނުކުރެވުނު ނަމަވެސް މި މެޗުގައި ރޮނާލްޑޯގެ ފަރާތުން ރަގަޅު ކުޅުމެއް ފެނިގެންގޮސްފައިވާއިރު މިރޭގެ މެޗުބެލުމަށް ދަނޑަށް ވަދެތިބި އަލް ނަސްރުގެ ސަޕޯޓަރުންގެ ފަރާތުން ރޮނާލްޑޯއަށް ހޫނު ތަރުހީބެއް ލިބިިގެން ގޮސަފައިވެއެވެ.

މިރޭގެ މެޗުން ލިބުނު ތިން ޕޮއިންޓާއި އެކު ސައުދީ ޕްރޮފެޝަނަލް ލީގުގެ އެއްވަނައިގައި އަލް ނަސްރު އޮތީ ކުޅުނު 14 މެޗުން ލިބުނު 33 ޕޮއިންޓާއި އެކުގައެވެ. ދެވަނަގައި އޮތް އަލް ހިލާލް އަލް 15 މެޗުން ލިބިފައިވަނީ 32 ޕޮއިންޓެވެ. އަދި މިރޭގެ މެޗުން ބަލިވި އަލް އިއްތިފާގް މިވަގުތު އޮތީ 14 މެޗުން ލިިފައިވާ 16 ޕޮއިންޓާއި އެކު ތާވަލުގެ 10 ވަނައިގައެވެ.