އެމްޑީޕީގެ ރިޔާސީ ޕްރައިމަރީއަށް ތައްޔާރު ވުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ކުރައްވާ ކެމްޕޭނުގެ ފަހު ޖަލްސާ އައްޑޫ ސިޓީގައި ބޭއްވުމަށް ހަމަޖައްސައިފިއެވެ.
ރައީސް ޞާލިހުގެ ކެމްޕޭން ޖަލްސާ އަންނަ ބުރާސްފަތި ދުވަހު އައްޑޫގައި ބޭއްވުމަށް ހަމަޖެހިފައި ވާއިރު، މި މަހުގެ 13 ވަނަ ދުވަހުވެސް އެމަނިކުފާނު އައްޑޫއަށް ވަޑައިގެންނެވިއެވެ.
ރައީސްގެ އެ ދަތުރުފުޅުގައި ވަނީ އައްޑޫގައި ޑޯޓުޑޯ ކެމްޕޭން ކުރައްވާފައެވެ.
އެދަތުރު ފުޅުގައި ފޭދޫ ސްކޫލުގެ 50 ވަނަ އަހަރީ ދުވަހުގެ ޖަލްސާގައި ބައިވެރިވެވަޑައިގަންނަވައި ފުލުހުންގެ 34 ވަނަ ޕޮލިސް އިނިޝިއަލް ޓްރެއިނިން ކޯހުގެ ދަސްވެނިމުގެ ރަސްމިއްޔާތުގައިވެސް ބައިވެރިވެ ވަޑައިގެންނެވިއެވެ.
އަދި އައްޑޫ ހިތަދޫގެ އުސްގަނޑަ ބީޗުގައި ރައީސް ޞާލިހަށް ތާއީދު ކުރައްފާ ފަރާތްތަކާ ބައްދަލު ކުރައްވާފައި ވެއެވެ.
މިމަހު 28 ގައި މި ޕްރައިމަރީ އޮންނައިރު، ރައީސް ޞާލިހާއި، އެމަނިކުފާނާއި ވާދަކުރައްވާ ކުރީގެ ރައީސް މުހައްމަދު ނަޝީދު ވެސް ވިދާޅުވަމުން އަންނަނީ އެ ދެބޭފުޅުންނަށްވެސް ޕްރައިމަރީ ކާމިޔާބު ކުރެވޭނެ ކަމުގެ ޔަގީންކަން އޮތް ކަމަށެވެ.
އަދި ރައީސް ޞާލިހު ދެވަނަ ދައުރަކަށް ކުރިމަތި ލެއްވީ އެމްޑީޕީ އަށް ވެރިކަން ހޯދައި ދެއްވަން ކަމަށް އެމަނިކުފާނު ވިދާޅުވާއިރު، ރައީސް ނަޝީދު ވިދާޅުވީ ރައީސް ޞާލިހު ރިޔާސީ އިންތިހާބުގައި ވާދަކުރައްވާނަމަ ފުރަތަަމަ ބުރުން އެމްޑީޕީ ބަލިވާނެކަމަށެވެ.
Advertisement
This content is created and paid for by advertisers and does not involve Voice Journalists
