އިގިރޭސި ޕްރެމިއާ ލީގުގައި ނެރެމުން އަންނަ ދަށް ނަތީއްޖާތަކުގެ ސަބަބުން، މިދިޔަ އަހަރުގެ ޖެނުއަރީ މަހު އެވަޓަންގެ ކޯޗުކަމާ ހަވާލުވި، ކުރީގެ ޗެލްސީގެ ކޯޗު ފްރޭންކް ލަމްޕާޑް މަގާމާއި ހަވާލުވިތާ އަހަރެއް ވެސް ނުވަނީސް އެވަޓަންގެ ކޯޗުގެ މަގާމުން ވަކިކޮށްފި އެވެ. 

އުމުރުން 44 އަހަރުގެ ލަމްޕާޑް އެވަޓަންގެ ކޯޗުކަމާ ހަވާލުވީ އޭރު އެޓީމުގެ ކޯޗުގެ މަގާމުގައި ހުރި ސްޕެއިންގެ ތަޖުރިބާކާރު ކޯޗު ރަފޭލް ބެނިޓޭޒެ މަގާމުން ވަކިކުރުމަށް ފަހުގައެވެ. ލަމްޕާޑް އެވަޓަން އާއި ހަވާލުވިއިރު އެޓީމު އޮތީ ރެލިގޭޝަން ޒޯނުގައެވެ. ނަމަވެސް ލީގު ފަހުމެޗުތަކުގައި ރަގަޅު ނަތީއްޖާތަކެއް ނެރެ މިދިޔަ ސީޒަން އެޓީމުން ނިންމާލީ ލީގު ތަވަލުގެ 16 ވަނައިގައެވެ.

ފްރޭންކް ލަމްޕާޑް ޗެލްސީގެ އޯލްޓައިމް ޓޮޕް ސްކޯރާ

ޕްރެމިއާ ލީގުގައި އެންމެ ފަހުން އެވަޓަން ކުޅުނު 12 މެޗުގެ ތެރެއިން ނުވަ މެޗުން އެޓީމު ބަލިވެފައިވާ އިރު، އެޓީމު މިވަގުތު އޮތީ ވިހި ޓީމު ހިމެނޭ ލީގު ތާވަލުގެ 19 ވަނައިގައެވެ. އަދި މި ސީޒަނުގައި އެޓީމު ލީގުގައި ކުޅުނު 20 މެޗުން 15 ޕޮއިންޓް ލިބިފައި ވާއިރު ލީގު ތާވަލުގެ ފުލުގައި އޮތް ސައުތުހެމްޓަންއަށް ވެސް އެ އަދަދަށް ޕޮއިންޓް ލިބިފައިވެއެވެ.  އެވަޓަން އަށް 19 ވަނަ ލިބެނީ ގޯލުގެ ތަފާތުންނެވެ.

މިދިޔަ ފަސް ވަރަކަށް އަހަރު ތެރޭގައި އެވަޓަން އިން ބޮޑެތި ހޭދަތަކެއް ކޮށްފައިވާއިރު އެޓީމުން ނެރެމުން އަންނަ ދަށް ނަތީއްޖާތަކުގެ ސަބަބުން އެވަޓަންގެ ބޯޑާއި ސަޕޯޓަރުންނާ ދެމެދުގައި ވެސް މިހާރު ވަނީ ހިޔާލު ތަފާތުވުންތަކެއް އުފެދިފައެވެ. އަދި ލީގުގައި  ސައުތުހެމްޓަންއާ ދެކޮޅަށް ކުޅެ އެވަޓަން ބަލިވި މެޗަށްފަހު ސަޕޯޓަރުން މުޒާހަރާވެސް ކޮށްފައިވާ އިރު، އެ މުޒާހަރާތައް ރޫޅާލަންޖެހުނީ ފުލުހުން ބާރުގެ ބޭނުންކޮށްގެންނެވެ.

ކުޅުންތެރިއެއްގެ ގޮތުގައި ޗެލްސީގެ އިތުރުން މެންޗެސްޓަރ ސިޓީއަށް ވެސް ކުޅެފައިވާ ލަމްޕާޑަކީ ޗެލްސީގެ އޯލްޓައިމް ޓޮޕް ސްކޯރާއެވެ. އެވަޓަންގެ ކޯޗުކަމުގެ މަގާމާއި ހަވާލުވުމުގެ ކުރިން ލަމްޕާޑް ވަނީ ޑާބީ ކައުންޓީގެ އިތުރުން ޗެލްސީއަށްވެސް ކޯޗުކަން ކޮށްދީފައެވެ.