ފުރާންސް ކަޕްގެ ދެވަނަ ބުރުގައި ހަވަނަ ޑިވިޝަންގެ ޕޭސް ޑި ކެސެލް 7-0 ބަލިކޮށް މުބާރާތުގެ ކުއާޓާ ފައިނަލުގެ ޖާގައެއް ޕީއެސްޖީ އިން ހޯދައިފިއެވެ.

2018 ވަނަ އަހަރު އުފެދުނު ޕޭސް ޑި ކެސެލް އިން ފުރާންސް ކަޕްގެ ދެވަނަ ބުރުގެ ފުރުސަތު ހޯދީ ހަތަރު ވަނަ ޑިވިޝަނުގެ ވަސްކޭހާލް ޕެނަލްޓީގައި 2-1 ން ބަލިކުރުމަށް ފަހުގައެވެ. މިރޭގެ މެޗަށް ޕީއެސްޖީ އިން ވަރުގަދަ ޓީމެއް ނެރެފައިވާއިރު ފުރަތަމަ އެގާރައިގައި ނޭމާގެ އިތުރުން އެމްބާޕޭ ހިމެނުނު އިރު އޭޓީމުގެ އާޖެންޓީނާގެ ތަރި މެސީ މިމެޗުގެ ސްކޮޑުގައި ނުހިމެނެއެވެ.

އެމްބާޕޭ މިރޭގެ މެޗުގައި ފަސް ލަނޑު ކާމިޔާބުކުރި

މިރޭގެ މެޗުގެ ފުރަތަމަ ހާފުގެ 10 ވަނަ މިނެޓުގައި އެމްބާޕޭ ލަނޑެއް ކާމިޔާބުކޮށް ޕީއެސްޖީއަށް ލީޑު ހޯދައިދިނެވެ. ނަމަވެސް ރެފްރީ ނިންމީ އެއީ އޮފްސައި ގޯލެއްކަމަށެވެ. ފުރަތަމަ ހާފުގެ 29 ވަނަ މިނެޓާއި ހަމައަށް ޕޭސް ޑި ކެސެލްގެ ކުޅުންތެރިން ޕީއެސްޖީގެ ވަރަގަދަ އެޓޭކުތައް ހުއްޓުވުމުގައި ކާމިޔާބު ހޯދިއެވެ. ނަމަވެސް ފުރަތަމަ ހާފުގެ ފަހު 15 މިނެޓުތެރޭގައި އެމްބާޕޭގެ ހެޓްރިކާއި އެކު ޕީއެސްޖީއިން ހަތަރު ލަނޑު ކާމިޔާބުކުރިއެވެ.

ޕީއެސްޖީގެ ފުރަތަމަ ލަނޑު އެމްބާޕޭ 29 ވަނަ މިނެޓުގައި ކާމިޔާބުކުރި އިރު އެތީމުގެ ދެވަނަ ލަނޑު 33 ވަނަ މިނެޓުގައި ކާމިޔާބުކޮށްދިނީ ނޭމާއެވެ. އަދި އޭގެ މިނެޓެއްފަހުން އެމްބާޕޭ ޕީއެސްޖީގެ ތިންވަނަ ލަނޑު ކާމިޔާބުކޮށްދިން އިރު، އެމްބާޕޭ މިމެޗުގައި އޭނާގެ ހެޓްރިކް ފުރިހަމަކުރީ ފުރަތަމަ ހާފުގެ 40 ވަނަ މިނެޓުގައި ކާމިޔާބުކުރި ލަނޑުންނެވެ. މިއާއެކު ފުރަތަމަ ހާފުގެ ކުޅުން ނިމިގެން ދިޔައީ 4-0 ޕީއެސްޖީ ކުރީގައި އޮވެގެންނެވެ.

މެޗުގެ ދެވަނަ ހާފުގައި ޕީއެސްޖީއިން އިތުރު ތިން ލަނޑު ކާމިޔާބުކޮށްފައިވާއިރު، އެޓީމުގެ ފަސް ވަނަ ލަނޑު ދެވަނަ ހާފުގެ 56 ވަނަ މިނެޓުގައި ކާމިޔާބުކޮށްދިނީ ފުރަތަމަ ހާފުގައި ހެޓްރިކް ހެދި އެމްބާޕޭއެވެ. އެޓީމުގެ ހަ ވަނަ ލަނޑު 64 ވަނަ މިނެޓުގައި ސްޕެއިންގެ މިޑްފީލްޑަރ ކާލޯސް ސޮލަރ ކާމިޔާބުކޮށްދިން އިރު ޕީއެސްޖީގެ ފަހު ލަނޑު 79 ވަނަ މިނެޓުގައި ކާމިޔާބުކޮށްދިނީ އެމްބާޕޭއެވެ.

މުބާރާތުގެ ކުއާޓާ ފައިނަލުގައި އަންނަ ފެބުރުއަރީ މަހުގެ 9 ވަނަ ދުވަހު ޕީއެސްޖީ ނުކުންނާނީ މާސޭ އާއި ދެކޮޅަށެވެ.