އިޓަލީގެ ސްޕެޒިއާއަށް ކުޅެމުން އަންނަ ޕޮލެންޑުގެ ޑިފެންޑަރ ޖަކޫބް ކިވިއާ އިގިރޭސި ޕްރެމިއާ ލީގު އެއްވަނައިގައި މިވަގުތު އޮތް އާސެނަލް އާއި ގުޅުމަށް އެއްބަސްވެއްޖެއެވެ.

އުމުރުން 22 އަހަރުގެ ޖަކޫބް ކިވިއާ އާސެނަލް އާއި ގުޅުނީ 2027 ވަނަ އަހަރުގެ ނިޔަލަށް 21 މިލިއަން ޕައުންޑްގެ ޓްރާންސްފާފީ އެއްގައެވެ. އަދި މި އެއްބަސްވުމުގައިވާ ގޮތުން ކުލަބުން ބޭނުންވެއްޖެނަމަ މި މުއްދަތު އިތުރު 12 މަސް ދުވަހަށް އިތުރުކުރެވިދާނެއެވެ.

ޖަކޫބް ކިވިއާ އިޓާލިއަން ލީގުގައި އިންޓަ މިލާން އާއި ދެކޮޅަށް ކުޅެނީ

މި ޓްރާންސްފާ އާއި ބެހޭގޮތުން ވަހަކަ ދައްކަމުން އާސެނަލްގެ ސްޕޯޓިން ޑިރެކްޓަރު އެޑޫ ބުނީ ޖަކޫބް ކިވިއާގެ ސޮއިކޮށް ނިމުމުން ވަރަށް އުފާވާ ކަމަށެވެ. އޭނާއަކީ ޒުވާން ހުނަރުވެރިއެއް ކަމަށާއި އޭނާ އަކީ އާސެނަލް އިން މޮނިޓާ ކުރަމުން އައި ހުނަރުވެރި ޒުވާން ކުޅުންތެރިއެއްކަމަށެވެ. އަހަރެމެން އެންމެންވެސް މިހާރު މިބަލަނީ ޖަކޫބާއެކު މަސައްކަތްކޮށް، އާސެނަލްއާއި އެކީގައި އޭނާގެ ކުރިއެރުން ދެމެހެއްޓެނިވި ގޮތެއްގައި ކުރިއަށް ދާތަން ދެކެން. އަދި ކުލަބުގެ ފަރާތުން ޖަކޫބާއަށް މަރުހަބާ ކިޔާކަމަށެވެ.

ލީގުގައި އެންމެ ފަހުން އާސެނަލް އަމިއްލަ ދަނޑުގައި މެންޗެސްޓަރ ޔުނައިޓެޑާއި ވާދަކޮށް 3-2 ން މޮޅުވި މެޗު ބެލުމަށް ޖަކޫބާ ވަނީ އާސެނަލްގެ ދަނޑަށް ޒިޔާރަތްކޮއްފައެވެ.

ޖަކޫބް ކިވިއާ ވޯލްޑް ކަޕްގައި ފުރާންސް އާއި ދެކޮޅަށް ކުޅެނީ 

ޕްރެމިއާ ލީގު ތާވަލުގެ އެއްވަނައިގައި އެއް މެޗު މަދުން ކުޅެ މިވަގުތު ފަސް ޕޮއިންޓްގެ ލީޑެއްގައި އާސެނަލް އޮތްއިރު އެޓީމު އިތުރަށް ވަރުގަދަކުރުމަށް ޖެނުއަރީ ޓްރާންފާގައި މިއީ އެޓީމަށް ގެނެވުނު ދެ ވަނަ ކުޅުންތެރިއާ އެވެ. މީގެ ކުރިން އެޓީމުން ވަނީ ބްރައިޓަންގެ ބެލްޖިއަމް މިދްފީލްޑަރ ލިއަންޑްރޯ ޓްރޮސާޑްގެ ސޮއި 21 މިލިއަން ޕައުންޑަށް ހޯދާފައެވެ.

މި ސީޒަނުގައި އާސެނަލްގެ ފަހަތުގައި ވިލިއަމް ސާލިބާގެ އިތުރުން ގެބްރިއަލް މަގަލްހޭސް މޮޅުކުޅުމެއްދަށްކަމުން އަންނައިރު، ނިމިދިޔަ ގަތަރު ވޯލްޑް ކަޕްގައި ޕޮލެންޑްގެ ހުރިހާ މެޗެއް ފެށި ކިވިއާގެ ފަރާތުން މިދެކުޅުންތެރިންނަށް ރަގަޅު ޗެލެންޖެއް ފެނިގެންދާނެކަަމަށް އާސެނަލް އިން ގަބޫލުކުރެއެވެ.