އިގިރޭސި ޕްރެމިއާ ލީގުގައި މިރޭ ފުލަމް އާއި ވާދަކޮށް 1-0 ން މޮޅުވެ ޓޮޓެންހަމް ހޮޓްސްޕާސް އިން ލީގުގެ ހަތަރު ވަނައިގައި އޮތް މެންޗެސްޓަރ ޔުނައިޓެޑާއި ދެމެދުގައިވާ ފަރަގު ތިން ޕޮއިންޓަށް ކުޑަކޮށްފިއެވެ.

ފުލަމް ދަނޑުގައި ކުޅެވުނު މިރޭގެ މެޗުގައި ފެނިގެން ދިޔަ ހަމައެކަނި ލަނޑު ފުރަތަމަ ހާފުގެ އެންމެ ފަހު މިނެޓުގައި އެޓީމަށް ކާމިޔާބުކޮށްދިނީ އިގިރޭސި ފޯވާޑް ހެރީ ކޭން އެވެ. މިއީ އެޓީމުގެ ކޮރެއީ ފޯވާޑް ހެއުން-މިން ސޮން ތަނަވަސްކޮށްދިން ފުރުސަތެއްގައި ކޭން ކާމިޔާބުކޮށްދިން ލަނޑެކެވެ.

މިރޭގެ މެޗުގައި ކޭން ކާމިޔާބުކުރި ލަނޑާއި އެކު އޭނާ ވަނީ، ޓޮޓެންހަމް ގެ ތާރީޚުގައި އެޓީމަށް އެންމެ ގިނަ ލަނޑު ކާމިޔާބުކޮށްދީފައިވާ ޖިމީ ގްރީވްސްގެ ރެކޯޑާއި އަރާ ހަަމަކޮށްފައެވެ. ޗެލްސީން ކެރިއަރު ފެށި ޖިމީ ގްރީވްސް ވަނީ 1961 ވަނަ އަހަރުން ފެށިގެން 1970 ވަނަ އަހަރާ ހަމައަށް ސްޕާސް އަށް ކުޅުނު 379 މެޗުގައި 266 ލަނޑު ކާމިޔާބުކޮށްފައެވެ.

Advertisement

ޓޮޓެންހަމް ކެޕްޓަން އެކުލަބުގެ ލެޖެންޑް ޖިމީ ގްރީވްސް އާއިއެކު

ޕްރެމިއާ ލީގުގައި ޓޮޓެންހަމް އަަށް ކުޅެދިން 300 ވަނަ މެޗުގައި ކާމިޔާބުކުރި ލަނޑާއި އެކު އުމުރުން 29 އަހަރުގެ ފޯވާޑް ވަނީ ޕްރެމިއާ ލީގުގައި 199 ލަނޑު ކާމިޔާބުކޮށްފައެވެ. އަދި އޭނާ އަކީ 1992 ވަނަ އަހަރު ޕްރެމިއާ ލީގު މިހާރުގެ ފޯމެޓަށް ރީބްރޭންކުރި ފަހުން ލީގުގައި ތިން ވަނައަށް އެންމެ ގިނަ ލަނޑުޖެހި ކުޅުންތެރިއާ އެވެ. ޕްރެމިއާ ލީގު ތާރީޚުގައި އެންމެ ގިނަ ލަނޑު ޖަހާފައިވާ ދެ ކުޅުންތެރިންނަކީ އެލަން ޝިއަރާ 260 ލަނޑު، އަދި ވޭން ރޫނީ 208 ލަނޑެވެ.

މިރޭގެ މެޗުން ލިބުނު ތިން ޕޮއިންޓާއި އެކު މިޒީސަނުގައި ކުޅުން 21 މެޗުން ޓޮޓެންހަމް އަށް ވަނީ 36 ޕޮއިންޓް ލިބިފައެވެ. ލީގުގެ ފަސް ވަނައިގައި އެޓީމު އޮތްއިރު ތިންވަނަ އަދި ހަތަރު ވަނައިގައިވާ ނިއުކާސަލް އަދި މެންޗެސްޓަރ ޔުނައިޓެޑަށް ލިބިފައިވަނީ 39 ޕޮއިންޓެވެ. ގޯލުގެ ތަފާތުން ނިއުކާސަލް ތިންވަނައިގައި އޮތްއިރު ޔުނައިޓެޑު އޮތީ ހަތަރު ވަނައިގައެވެ. މިރޭގެ މެޗުން ބަލިވި ފުލަމް އަށް 21 މެޗުން 31 ޕޮއިންޓު ލިބިފައިވާއިރު، އެޓީމު އޮތީ 7 ވަނައިގައެވެ.