އަރި އަތޮޅުގެ ދެބުރީގެ ރަށްތަކަށް ވޭތިވެދިޔަ ސަރުކާރު ތަކުން ވަރަށް ބޮޑަށް އިހުމާލުވެފައިވާ ކަމަށާ، އެހެންނަމަވެސް މިސަރުކާރުން އެ ރަށްތައް ކުރިއަރުވަން މަސައްކަތް ކުރާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

އެމްޑީޕީ ރިޔާސީ ޕްރައިމަރީގެ ކެމްޕޭނަށް މިއަދު އއ. މާޅޮހަށް ވަޑައިގެން އެރަށުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ވިދާޅުވީ މިސަރުކާރުން މަސައްކަތް ކުރަމުންދަނީ، ތަފާތު ކުރުމެއްނެތި ހުރިހާ ރަށަކަށްވެސް އަސާސީ ޚިދުމަތްތައް ފޯރުކޮށްދިނުމަށް މަސައްކަތް ކުރަމުން ކަމަށެވެ. އެގޮތުން މަތިވެރީ ދާއިރާ އަކީ އާބާދީގެ ގޮތުން މަދު މީސްކޮޅެއް ދިރިއުޅޭ ދާއިރާއެއް ނަމަވެސް، ތަފާތު ކުރެމެއްނެތި ޚިދުމަތްތައް ފޯރުކޮށްދެއްވަމުންދާ ކަމަށް އެމަނިކުފާނު ވިދާޅުވިއެވެ.

އެހެންނަމަވެސް، ވޭތުވެ ދިޔަ ސަރުކާރުތަކުން މި ދާއިރާއިން ރަށްތަކަށް މާބޮޑަށް އަޅާ ނުލައްވާ ކަމަށްވެސް އެމަނިކުފާނު ވިދާޅުވި އެވެ. 

"ހުރިހާ ރަށެއްގެ ބޯފެނާއި ނަރުދަމާގެ ނިޒާމަކީ ބޭނުންޖެހިފައި އޮތް ކަމެއް. ލަފާފުރުން ދަތި އެތައް ރަށެއް މިދާއިރާގައި އެބައޮތް ސިއްހީ ހިދުމަތް ބޭނުންވެފައި ހުރި އެތައް ރައްޔިތުންނެ އެބަތިބި ތައުލީމު ދަރިންނަށް ދިނުމަށްޓަކައި ރަށުގައި ތިބެގެން ދިރިއުޅުން ބިނާކުރުމަށްޓަކައި ބޭނުންވާ އެތައް ރައްޔިތުންނެއް މިދާއިރާގައި އެބަތިބި" ރައީސް ވިދާޅުވިއެވެ.

މިއާއެކު ރައީސް ޞާލިހު ވިދާޅުވީ އަރި އަތޮޅަކީ ޓޫރިޒަމްގެ އެންމެ ބޮޑު ހަބު ކަމަށާއި އަރި އަތޮޅު އުތުރު ބުރި އާއި ދެކުނު ބުރިއަށްވެސް ކުރީގެ ސަރުކާރުތަކުން ވަރަށް ބޮޑަށް އިހުމާލުވެފައިވާކަމަށެވެ.

"އަރި އަތޮޅަކީ ޓޫރިޒަމްގެ އެންމެ ބޮޑު ހަބު. ދެވަނަ މާސްޓާ ޕްލޭނާއެއްގޮތައް ތަރައްގީކުރަންފެށި ޓޫރިޒަމް ޒޯން މީ ދައުލަތަށް އެންމެގިނަ ފައިސާ ޓެކްސްގެ ގޮތުގައި ދައްކާ ދާއިރާ އަރި އަތޮޅަކީ އެހެންނަމަވެސް މިއަތޮޅުގައި އަރި އަތޮޅުގެ ދެބުރީގެ ރަށްތައް މިހިސާބުގައި، މިހާހިސާބަށް އައި އިރުގައި ޓޫރިޒަމަށް 50 އަހަރު ފުރުނު އިރުގައި އޮންނަން ޖެހޭ ސަބަބެއް ނެތް ޒަރީރު އެ ވިދާޅުވީ ވޭތުވެ ދިޔަ 40 އަހަރުތެރޭގައި ނުކުރެވި ހުރި މަސައްކަތް މި ހަތަރު އަހަރު ދުވަސް ތެރޭގައި ކުރާ ވަހަކަ އިހުމާލެއް ބަޔަކާ ދޭތެރޭ ވެވޭނީ މިވަރަށް ނޫންތޯ."

"އަޅުގަނޑުމެންނަށް އެކަން ބަލާކަށް ތިބެވޭކަށް ނެތް. ފުރަތަމަ ދުވަހުންވެސް އަޅުގަނޑުމެން މަސައްކަތް ފެށީ، މިހެން ހުރި ރަށްރަށަށް ބޭނުންވޭފައި ހުރި އަސާސީ ޚިދުމަތްތައް ފޯރުކޮށްދިނުމަށް." ރައީސް ވިދާޅުވިއެވެ.

ރައީސް ޞާލިހް ވިދާޅުވީ، ސަރުކާރުގެ ވިސްނުމަކީ އެމީހެއްގެ ސިޔާސީ ވިސްނުން ހުރިގޮތް ނުބަލާ އަދަދަށް ނުބަލާ ކޮންމެ މީހަކަށް އެބޭނުންވާ އަސާސީ ހިދުމަތްތައް ފޯރުކޮށްދިނުން ކަމަށާއި އިރާދަކުރެއްވިއްޔާ މިމަސައްކަތާއިގެން ދާނީ ކުރިއަށްކަމަށެވެ.