ދުނިޔޭގެ އެންމެ ގިނަދުވަސްވީ ފުޓްބޯޅަ މުބާރަތް ކަމުގައިވާ އިގިރޭސި އެފްއޭ ކަޕްގެ 152 އަހަރުވީ ދިގު ތާރީޚްގައި އެންމެ ކާމިޔާބު ކުލަބް އާސެނަލް މިއަހަރުގެ މުބާރާތުގެ ހަތަރުވަނަ ބުރުން ކަޓައިފިއެވެ. މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ރޭ ކުޅެވުނު އެފްއޭ ކަޕް ހަތަރުވަނަ ބުރުގެ މެޗުގައި ސިޓީއަތުން އެޓީމު ބަލިވީ 1-0 ން ނެވެ.

ދެޓީމުވެސް ބަދަލުތަކަކާއިއެކު ރޭގެ މެޗު ފެށިއިރު ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓުކުރީ މެންޗެސްޓަރ ސިޓީއިން ނެވެ. ނަމަވެސް މިހާފުގައި ރަގަޅު ހަމަލާތަކެއް އުފައްދާފައި ވަނީ އާސެނަލް އިންނެވެ. މިގޮތުން ފުރަތަމަ ހާފު ފަށައިގެން ފަސްވަނަ މިނެޓުގައި އާސެނަލްގެ ޖަޕާނު ޑިފެންޑަރ ޓަކެހިރޯ ޓޮމިޔާސޫ ފޮނުވާލި ބާރު ހަމަލާ ސިޓީގެ ޖަރުމަން ގޯލްކީއްޕަރު ސްޓެފަން އޮރްޓެގާ ދިފާއުކުރި އިރު އެކާވީސް ވަނަ މިނެޓުގައި އާސެނަލްގެ ބެލްޖިއަމް މިޑްފީލްޑަރ ލިއަންޑްރޯ ޓްރޮސާޑް ފޮނުވާލި ހަމަލާވެސް އޮރްޓެގާ ވަނީ ހުޝިއާރުކަމާއެކު ދިފާއުކޮއްފައެވެ.

އެފްއޭ ކަޕްގެ ހަތަރުވަނަ ބުރުގައި އާސެނަލް އާއި މެންޗެސްޓަރ ސިޓީ ވާދަކުރި މެޗުގެ ތެރެއިން

މިހާފުގައި މެންޗެސްޓަރ ސިޓީއިން އެންމެ ރަގަޅު ފުރުސަތެއް ލިބުނީ އެޓީމުގެ ބެލްޖިއަމް މިޑްފީލްޑަރ ކެވިން ޑި ބްރޭނާ އަށެވެ. ނަމަވެސް އޭނާ ފޮނުވާލި ހަމަލާ އާސެނަލްގެ ގޯލާއި އަމާޒުނުވެ ދަނޑިކައިރިން ދިޔައީ ބޭރަށެވެ. ފުރަތަމަ ހާފު ނިމުމުގެ ކުރިން އާސެނަލްގެ އިގިރޭސި ފޯވާޑް އެޑީ އެންކެޓިއާ ރަގަޅު ހުސްފުރުސަތެއްލިބުނެވެ. ޓްރޮސާޑް ސިޓީގެ ގޯލްކުރިމައްޗަށް ހުރަސްކޮށްދިން ބޯޅައެއް މުޅިން ހުސްކޮށްހުރެ އެންކެޓިއާ ފޮނުވާލުމުން ގޯލާއި އަމާޒުނުވެ ދިޔައީ ބޭރަށެވެ.

ދެވަނަ ހާފުގެ ކުޅުން އާސެނަލް އިން ފެށީ ދެ ބަދަލާއި އެކުގައެވެ. އަދި މިހާފުގައި ސިޓީއިން ވެސް އެޓީމުގެ އެޓޭކުތައް އިތުރަށް ވަރުގަދަކުރިއެވެ. ނަތީއްޖާއެއްްގެ ގޮތުން ދެވަނަ ހާފުގެ 64 ވަނަ މިނެޓުގައި ސިޓީއިން މެޗުގެ ލީޑުނެގިއެވެ. މިލަނޑު އެޓީމަށް ކާމިޔާބުކޮށްދިނީ ނެދަލޭންޑްސްގެ ޑިފެންޑަރ ނަތަން އަކޭ އެވެ. މިއީ އެޓީމުގެ އިގިރޭސި މިޑްފީލްޑަރ ޖެކް ގްރީލިޝް ތަނަވަސްކޮއްދިން ފުރުސަތެއްގައި އަކޭ ކާމިޔާބުކޮށްދިން ލަނޑެކެވެ.

ސިޓީގެ ގޯލައްފަހު އާސެނަލް އިން ބަދަލުތަކެއްގެނެސް މެޗުގެ ނަތީއްޖާ އެއްވަރުކުރެވޭތޯ ވަރަށް މަސައްކަތްކުރިއެވެ. ނަމަވެސް މެޗު ނިމިގެން ދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި 1-0 ން މެންޗެސްޓަރ ސިޓީ މޮޅުވެގެންނެވެ. ރޭގެ މެޗަކީ ގާޑިއޯލާގެ ކޯޗުކަމުގައި މި ދެޓީމު ވާދަކުރި 17 މެޗުގެ ތެރެއިން މެންޗެސްޓަރ ސިޓީ މޮޅުވި 14 ވަނަ މެޗެވެ.