މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގެ ވޯޓުލުން ކުރިއަށް ދާއިރު، ޑިމޮކްރަސީގެ ރޫހާއި ޚިލާފު އެއްވެސް ކަމެއް ނުކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އިލްތިމާސް ކުރައްވައިފި އެވެ. 

އެކަމާއި ގުޅޭގޮތުން ރައީސް ޞާލިހުގެ ކެމްޕޭނު ޓީމުން ނެރުނު ބަޔާނެއްގައި ބުނެފައިވަނީ އެމްޑީޕީގެ ރިޔާސީ ޕްރއިމަރީއަކީ ޕާޓީގެ އެންމެހާ ހަމަތަކާއި އުސޫލުތައް ނަގަހައްޓާ ފުރިހަމަ ޑިމޮކްރެޓިކް އިންތިޚާބަކަށް ހެދުމަށް ރައީސް ޞާލިހު އިރުޝާދުދެއްވާ ކަމަށެވެ. 

އެތެރޭގެ މި އިންތިޚާބަށްފަހު މުޅި ޕާޓީ އެކުގައި ކުރިއަށް ގޮސް، މިއަހަރު ބޭއްވޭ ރިޔާސީ އިންތިޚާބު ކާމިޔާބުކުރުމަށް ޒާތީ ތައައްސުބާއި އެކަށީގެން ނުވާ ބަހުރުވައާއި، ޒުވާބާއި ޖަދަލުގެ ތެރެއަށް ނުވެއްޓި ތިއްބެވުމަށް ރައީސް ޞާލިހު އިލްތިމާސްކޮށްފައިވާކަމް އެ ބަޔާނުގައި ފާހަގަކޮށްފައި ވެއެވެ. 

Advertisement

އޭގެ އިތުރުން އެތެރޭގެ އިންތިޚާބު ގަޑުބަޑު ކުރުމަށް ވާދަވެރި ކެންޑިޑޭޓާއި އެ ކެންޑިޑޭޓުގެ ކެމްޕޭނު ޓީމުން މަސައްކަތް ކުރަމުން ދިއުމަކީ ހިތާމަކުރައްވާކަމެއްކަމަށް ރައީސް ޞާލިހު ވިދާޅުވެފައިވާކަމަށް އެ ބަޔާނުގައި ވެއެވެ. 

އެއާއެކު އެތެރޭގެ މި އންތިޚާބަކީ ޑިމޮކްރަސީގެ ރޫހާއި އެއްގޮތަށް ކުރިއަށް ގެންދެޥޭ ކާމިޔާބު އިންތިޚާބަކަށް ހެދުމަށް މަސައްކަތްކޮށްދެއްވުމަށް ރައީސް ޞާލިހު އެދިލައްވާފައިވާކަންވެސް އެ ބަަޔާނުގައި ފާހަގަކޮށްފައި ވެއެވެ.