ގައުމީ އަންހެން ވޮލީބޯޅަ މުބާރާތުގެ ޗެންޕިއަންކަން އެންމެ ފަހުގެ ރަނަރަޕް ކުލަބް ވެމްކޯ އިން ހޯދައިފިއެވެ. އެޓީމު ޗެންޕިއަންކަން ހޯދީ ފައިނަލުގައި ކްލަބް ވޮލީބޯލް ތިން ސެޓް އެއް ސެޓުން ބަލިކުރުމަށް ފަހުގައެވެ.

ޒުވާނުންގެ މަރުކަޒު އިންޑޯ ކޯޓުގައި ރޭ ކުޅުނު ފައިނަލް މެޗުގެ ފުރަތަމަ ސެޓް ފަސޭހަ ކަމާއިއެކު ކްލަބް ވެމްކޯއިން ކާމިޔާބުކުރީ 25-11 އިންނެވެ. މި ސެޓުގައި އެޓީމުގެ އެ ޓީމުގެ ނޭޕާލް ކުޅުންތެރިޔާ، ޕްރަތީބާ އިތުރުން  އައިޝަތު މާޖިދާގެ ފަރާތުން މޮޅުކުޅުމެއް ފެނިގެންގޮސްފައިވެއެވެ.  ނަމަވެސް ދެވަނަ ސެޓުގައި ވެމްކޯގެ ގިނަ އަދަދެއްގެ ސަޕޯޓަރުންގެ ކުރިމަތީގައި ކްލަބް ވޯލީބޯލްގެ ޒުވާން ކުޅުންތެރިން ވަނީ ވާދަވެރި ކުޅުމަކަށްފަހު 22-25 ދެވަނަ ސެޓް ކާމިޔާބުކޮށްފައެވެ.

ކުލަބް ވެމްކޯގެ ކުޅުންތެރިން ފައިނަލް މެޗަށްފަހު އުފާ ފާޅުކުރަނީ.  ފޮޓޯ: މުހައްމަދު ޝާބިން/ އަދަދު

މިދެޓީމު ލީގު ބުރުގައި ވާދަކުރި މެޗު ތިން ސެޓް އެއް ސެޓުން ކްލަބް ވޮލީބޯލް ކާމިޔާބުކޮށްފައި އޮތުމުން ރޭގެ މެޗުގެ ފޯރި އިތުރަށް ގަދަވެގެންދާނެކަމަށް ކުރިންވެސް އޮތީ ބެލެވިފައެވެ. ނަމަވެސް ތިން ވަނަ ސެޓާއި ހަތަރު ވަނަ ސެޓުގައި ކްލަބް ވޮލީބޯލްގެ ކުޅުންތެރިންގެ ފަރާތުން ގިނަ މިސްޓޭކުތަކެއް ފެނިގެދިޔައިރު މި ދެސެޓުވެސް ކްލަބް ވެމްކޯއިން ހޯދީ ފަސޭހަކަމާއި އެކުގައެވެ.

ތިން ވަނަ ސެޓު 19-25 ން ކުލަބް ވެމްކޯ އިން ކާމިޔާބުކުުމުން ހަތަރު ވަނަ ސެޓުގައި ކުލަބް ވޮލީބޯލް އިން ރަގަޅު ފައިޓެއްދޭނެކަމަށް ބެލެވުނު ނަމަވެސް ވެމްކޯގެ ތަޖުރިބާކާރު ކުޅުންތެރިންގެ ކުރިމަތީގައި ކްލަބް ވޮލީބޯލްގެ ޒުވާން ޓީމަށް މިސެޓުގައި ވާދަވެރި ކުޅުމެއް ދެއްކޭގޮތެއް ނުވިއެވެ. ވެމްކޯގެ ބިދޭސީ ދެކުޅުންތެރިން ކަމަށްވާ ޕްރަތީބާ އަދި ސްޓޭންސީ ފެނާންޑޭސްގެ މޮޅު ކުޅުމާއި އެކު ވެމްކޯ އިން މިސެޓް ކާމިޔާބުކުރީ ފަސޭހަކަމާއި އެކު 25-14 އިންނެވެ.

ފައިނަލް މެޗުގެ މޮޅު ކުޅުންތެރިއާގެ މަގާމާއި މުބާރާތުގެ އެންމެ މޮޅު ބިދޭސީ ކުޅުންތެރިއަކަށް ހޮވުނީ ވެމްކޯގެ ނޭޕާލް ކުޅުންތެރިއާ ޕްރަތީބާ އެެވެ. މިއީ ޕްރަތީބާ، ރާއްޖޭގެ ގައުމީ މުބާރާތް ކާމިޔާބުކުރި ހަތަރު ވަނަ ފަހަރެވެ. މީގެ ކުރިން އޭނާ ވަނީ ، 2016 އާއި 2017 ވަނަ އަހަރު ފުވައްމުލަކު މިސްކިތްމަގު ޓީމާ އެކު ޤައުމީ މުބާރާތުގެ ޗެންޕިއަންކަން ހޯދިއިރު އެންމެ 2019 އަހަރު ޤައުމީ މުބާރާތުގައި ޕޮލިސް ކްލަބުން ކްލަބް ވެމްކޯ ބަލިކޮށް ތަށި ހޯދިއިރު، ޕްރަތީބާ ވަނީ ފައިނަލުގައި މޮޅަށް ކުޅެ، އެ ފަހަރުގެ ފައިނަލުގެ ވެސް މޮޅު ކުޅުންތެރިއާގެ މާގާމު ހޯދައިފައެވެ.

މިއަހަރުގެ ގައުމީ މުބާރާތުގެ އަންހެން ޑިވިޝަންގެ ޑްރީމް ޓީމުގައި ހިމެނެނީ ވެމްކޯގެ މާޖިދާ، އަރީޝާ، ޖޫޒާން އަދި ރިޔާޝާގެ އިތުރުން ކްލަބް ވޮލީބޯލްގެ ޝާނިޔާ، ނަރީމާ އިދުރީސް އަދި ފައިހާ އެވެ.