އެމްޑީޕީގެ ރިޔާސީ ޕްރައިމަރީ ތަފާތު ބޮޑުކޮށް ކާމިޔާބު ކުރެވޭނެކަމުގެ ޔަގީންކަން އޮތްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ. 

މި އިންތިޚާބުގައި ވޯޓުލެއްވުމަށްފަހު ނޫސްވެރިންނަށް ދިން ބަސްދީގަތުމެއްގައި ރައީސް ޞާލިހު ވަނީ މި އިންތިޚާބު އޮޅުވާލުމަށް މަސައްކަތް ކުރައްވާކަމަށް އެމަނިކުފާނާއި ވާދަވެރި ކެންޑިޑޭޓު ރައީސް މުހައްމަދު ނަޝީދާއި އެމަނިކުފާނުގެ ކެމްޕޭނު ޓީމުން ކުރައްވާ ތުހުމަތުތައް ދޮގު ކުރައްވާފައެވެ. 

އެކަމާއި ގުޅިގެން ރައީސް ޞާލިހު ވިދާޅުވީ އެމްޑީޕީގެ އެތެރޭގެ މި އިންތިހާބަކީ ރާއްޖޭގެ ޑިމޮކްރަސީގެ ހަޔާތަށް ވެސް މުހިންމު މަންޒަރެއް ފެނިގެންދާނެ އިންތިހާބަކަށް ވެގެންދާނެކަމަށެވެ.

ސުލްހަވެރިކަމާ އެކު މި ވޯޓު ނިމޭނެ ކަމަށް އުއްމީދުކުރައްވާ ކަމަށާއި އެއާއެކު ދެން އޮތީ ކުރިއަށް އޮތް ރިޔާސީ އިންތިިހާބަށް އެކުގައި މަސައްކަތް ކުރުން ކަމަށް ރައީސް ޞާލިހު ވިދާޅުވިއެވެ. 

މި އިންތިޚާބު "ޑަބަލް ޑިޖިޓު" ގެ ތަފާތަކުން މޮޅުވާނެކަމުގެ ޔަގީންކަން އޮތްކަމަށް ރައީސް ޞާލިހު ވަނީ ވިދާޅުވެފަ އެވެ.

ރައީސް ޞާލިހު އިތުރަށް ވިދާޅުވީ އެތެރޭގެ އިންތިޚާބަށްފަހު ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތްތައްވެސް މިހާރު ކުރެވެމުން ދާ ކަމަށެވެ. 

އެގޮތުން އެމްޑީޕީގެ އާންމު މެމްބަރުންގެ އިތުރުން ތަފާތު ދާއިރާތަކުގައި މަސައްކަތް ކުރައްވާ އެކި އެކި ފަރާތްތަކުގެ ވިސްނުން ހުރި ގޮތް ދެނެގަނެ، އެމީހުންގެ ތާއީދު ހޯދުމަށް މަސައްކަތް ކުރުމަކީ ވަރަށް މުހިންމު ކަމެއްކަމަށާއި، އިންތިޚާބަށްފަހު އެ މަސައްކަތްތައް ފައްޓަވާނެކަމަށް އެމަނިކުފާނު ވިދާޅުވި އެވެ.