ޖަރުމަން ބުންޑެސްލީގާގައި ރޭ އަމިއްލަ ދަނޑުގައި ބަޔާން މިއުނިކް އާއި އެއިންޓްރަކްޓް ފްރޭންކްފާޓް ވާދަކުރި މެޗު 1-1 ގެ ނަތިއްޖާއަކުން އެއްވަރުވެ، ލީގު ތާވަލުގެ ކުރީގައި ބަޔާންގެ ލީޑު އެއްޕޮއިންޓަށް ހަނިވެއްޖެއެވެ.

ވޯލްޑް ކަޕް ފުޓްބޯޅަ މުބާރާތައް ލީގުގެ ކުޅުން މެދުކަޑައިލި އިރު ލީގުތާވަލުގެ ކުރީގައި ހަތް ޕޮއިންޓްގެ ލީޑެއްގައި އޮތް ބަޔާން މިއުނިކު، ލީގުގައި އެންމެ ފަހުން ކުޅުނު ތިން މެޗުވެސް ނިމިފައި ވަނީ 1-1 ގެ ނާތީއްޖާއަކުން އެއްވަރުވެގެންނެވެ.

ރޭގެ މެޗުގައި ބަޔާން މިއުނިކުން ގިނަވަގުތު ބޯޅަގެންގުޅެ މެޗު ޑޮމިނޭޓުކުރި އިރު ފުރަތަމަ ހާފުގެ 34 ވަނަ މިނެޓުގައި ޖަރުމަނުގެ ފޯވާޑް ލެރޯއީ ސާނޭ ވަނީ އެޓީމަށް މެޗުގެ ލީޑު ހޯދައިދީފައެވެ. މިއީ އެޓީމުގެ ތަޖުރިބާކާރު މިޑްފީލްޑަރ ތޯމަސް މުލާ ތަނަވަސްކޮށްދިން ފުރުސަތެއްގައި ސާނޭ ކާމިޔާބުކޮށްދިން ލަނޑެކެވެ.

ރަންޑަލް ކޮލޮ މުއާނީ ލަނޑުޖެހުމަށްފަހު އުފާ ފާޅުކުރަނީ

ފުރަތަމަ ހާފުގައި އެއިންޓްރަކްޓް ފްރޭންކްފާޓްގެ ފަރާތުން އާދައިގެ ކުޅުމެއް ފެނުނު ނަމަވެސް މެޗުގެ ދެވަނަ ހާފުގައި، އެޓީމުން ކުޅުން ރަގަޅުކޮށް ބަޔާންގެ ގޯލަށް ބާރުބޮޑުކުރަން ފެށިއެވެ. އަދި ދެވަނަ ހާފުގެ 69 ވަނަ މިނެޓުގައި އެޓީމުން ލަނޑެއްކާމިޔާބުކޮށް މެޗުގެ ނަތީއްޖާ އެއްވަރުކުރިއެވެ.

މި ލަނޑު އެޓީމަށް ކާމިޔާބުކޮށްދިނީ ފުރާންސްގެ ފޯވާޑް ރަންޑަލް ކޮލޮ މުއާނީ އެވެ. މިއީ އެޓީމުގެ ޖަޕާން މިޑްފީލްޑަރ ދައިޗީ ކަމަޑާ ތަނަވަސްކޮށްދިން ފުރުސަތެއްގައި މުއާނީ ކާމިޔާބުކުރި ލަނޑެކެވެ. މިއާއެކު މެޗުގެ ކުޅުން ނިމިގެން ދިޔައީ ދެޓީމުން ކުރެ ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީއްޖާއަކުން ދެ ޓީމު އެއްވަރުވެގެންނެވެ.

ލީގު ތާވަލުގެ ކުރީގައި ބަޔާން މިއުނިކް މިވަގުތު އޮތީ 18 މެޗުން 37 ޕޮއިންޓާއި އެކުގައެވެ. ދެވަނައިގައި އޮތް ޔޫނިއަން ބާލިން އަށް 18 މެޗުން ލިބިފައިވަނީ 36 ޕޮއިންޓެވެ. އަދި ރޭގެ މެޗުން ލިބުނު އެއް ޕޮއިންޓާއި އެކު 18 މެޗުން 32 ޕޮއިންޓް ހަމަކޮށް އެއިންޓްރަކްޓް ފްރޭންކްފާޓް މިވަގުތު އޮތީ ބުންޑެސްލީގާ ތާވަލުގެ ފަސް ވަނައިގައެވެ.