އިޓާލިއަން ލީގުގައި މިއަދު ހަވީރު އޭސީ މިލާން އާއި ސަސުއޯލޯ ވަދަކުރި މެޗު 5-2 ގެ ތަފާތު ބޮޑު ނަތީއްޖާއަކުން މޮޅުވެ ސަސުއޯލޯ އިން އެސީ މިލާން ލަދުގަންނަވާލައިފިއެވެ. 

އެންމެ ފަހުގެ ޗެންޕިއަން އޭސީ މިލާންގެ ދަނޑުގައި މިއަދު ކުޅެވުނު މެޗުގެ ފުރަތަމަ ހާފުގެ 8 ވަނަ މިނެޓުގައި އޮލިވިއޭ ޖިރޫޑް ލަނޑެއް ކާމިޔާބުކޮށް އެޓީމަށް ލީޑު ހޯދައިދިނެވެ. ނަމަވެސް ވީއޭއާރު އިން ޗެކްކުރުމަށް ފަހު ރެފްރީ ނިންމީ އެއީ އޮފްސައިޑު ގޯލެއްކަމުގައެވެ. ދެޓީމުގެ ފަރާތުން ފޯރިގަދަ ކުޅުމެއް ފުރަތަމަ ހާފުގައި ފެނިގެން ދިޔައިރު މި މެޗުގައި ފުރަތަމަ ލަނޑުޖަހައި ލީޑް ހޯދީ މިވަގުތު ރެލިގޭޝަނުން ސަލާމަތްވުމަށް މަސައްކަތް ކުރަމުން އަންނަ ސަސުއޯލޯ އިންނެވެ.

ސަސުއޯލޯ ކުޅުންތެރިން ލަނޑުޖެހުމަށް ފަހު އުފާ ފާޅުކުރަނީ

މި ލަނޑު ފުރަތަމަ ހާފުގެ 19 ވަނަ މިނެޓުގައި އެޓީމަށް ކާމިޔާބުކޮށްދިނީ ފުރާންސްގެ ފޯވާޑް ގްރެގޯއިރ ޑެފްރެލް އެވެ. މިއީ އެޓީމުގެ އިޓަލީ ފޯވާޑް ޑޮމެނިކޯ ބެރާޑީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ތިން މިނެޓުފަހުން ބެރާޑީ ތަނަވަސްކޮށްދިން ފުރުސަތެއްގައި އެޓީމުގެ އިޓަލީ މިޑްފީލްޑަރ ޑޭވިޑް ފްރެޓެސީ ވަނީ ލަނޑެއްކާމިޔާބުކޮށް ސަސުއޯލޯގެ ލީޑު ފުޅާކޮށްދީފައެވެ.

ސަސުއޯލޯ އިން ދެ ލަނޑުގެ ލީޑެއްނެގިތާ ތިން މިނެޓު ނުވަނީސް އޭސީ މިލާނުން ލަނޑެއް ކާމިޔާބުކޮށް ފަރަގު ކުޑަކުރިއެވެ. މި ލަނޑު އެޓީމަށް ކާމިޔާބުކޮށްދިނީ އޮލިވިއޭ ޖިރޫޑް އެވެ. މިއީ އެޓީމުގެ ޑިފެންޑަރ ޑޭވިޑް ކަލަބްރިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. ނަމަވެސް އޭގެ އޭގެ 7 މިނެޓު ފަހުން ސަސުއޯލޯ އިން އަންނެއްކާވެސް ލަނޑެއް ކާމިޔާބުކޮށް ދެ ލަނޑުގެ ލީޑެއް ނެގިއެވެ. މި ލަނޑު އެޓީމަށް ކާމިޔާބުކޮށްދިނީ މި މެޗުގައި މޮޅުކުޅުމެއް ދެއްކި އިޓަލީ ފޯވާޑް ޑޮމެނިކޯ ބެރާޑީ އެވެ. މިއީ އެޓީމުގެ އައިވަރީކޯސްޓް މިޑްފީލްޑަރ ހަމްދު ޖޫނިއާ ޓްރައޯރޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެވަނަ ހާފު ފެށިގެން 47 ވަނަ މިނެޓުގައި ސަސުއޯލޯ އިން އިތުރު ލަނޑެއް ކާމިޔާބުކޮށް ނަތީއްޖާގެ ފަރަގު ބޮޑުކޮށްލިއެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އާމަންޑް ލޯރިއެންޓޭ އެވެ. ސަސުއޯލޯ އިން ތިން ލަނޑުގެ ލީޑެއްގައި ވަނިކޮށް އޭސީ މިލާންގެ ފޯވާޑް އެންޓޭ ރެބިކް ދެވަނަ ހާފުގެ 55 ވަނަ މިނެޓުގައި ލަނޑެއް ކާމިޔާބުކޮށް ނަތީއްޖާގެ ފަރަގު ކުޑަކޮށްދިނެވެ. ނަމަވެސް މި ލަނޑުވެސް ވީއޭއާރު އިން ޗެކުކުރުމަށް ފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ.

ސަސުއޯލޯގެ ފަހު ލަނޑު ދެވަނަ ހާފުގެ 79 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގޮތުގައި ކުޅެން ނުކުތް ބުރެޒިލްގެ މިޑްފީލްޑަރ މެތިއަސް ހެންރިކް އެވެ. މި ލަނޑުޖެހުމަށް ވެސް ފުރުސަތު ތަނަވަސްކޮށްދިނީ މިރޭގެ މެޗުގެ މޮޅުކުޅުންތެރިއަކަށް ހޮވުނު ޑޮމެނިކޯ ބެރާޑީ އެވެ. އޭނާ ވަނީ މި މެޗުގައި ލަނޑެއް ކާމިޔާބުކުރުމުގެ އިތުރުން، އިތުރު ތިން ލަނޑު ކާމިޔާބުކުރުމަށް ފުރުސަތު ތަނަވަސްކޮށްދީފައެވެ.

އޭސީ މިލާންގެ ފަހު ލަނޑު 81 ވަނަ މިނެޓުގައި ކާމިޔާބުކޮށްދިނީ ބެލްޖިއަމްގެ ފޯވާޑް ޑިވޮކް އޮރިގީ އެވެ. މިއާއެކު މެޗުގެ ކުޅުން ނިމިގެން ދިޔައީ 5-2 ގެ ތަފާތުު ބޮޑު ނަތީއްޖާއަކުން އޭސީ މިލާން ބަލިވެގެންނެވެ.  މިއަދުގެ މެޗުން މޮޅުވެ ތާވަލުގެ ދެވަނައަށް އެރުމުގެ ފުރުސަތު އޭސީ މިލާން އަށް އޮތް ނަމަވެސް، މި މެޗުން ބަލިވުމާ އެކު އެޓީމު ވަނީ ހަތަރު ވަނައަށް ވެއްޓިފައެވެ. އެއްވަނައިގައި އޮތް ނަޕޯލީއަށް 19 މެޗުން 50 ޕޮއިންޓް ލިބިފައިވާއިރު 20 މެެޗު ކުޅެގެން އޭސީ މިލާން އަށް ލިބިފައިވަނީ 38 ޕޮއިންޓެވެ.

މިރޭގެ މެޗުން މޮޅުވި ސަސުއޯލޯ ވަނީ 20 މެޗުން ލިބުނު 20 ޕޮއިންޓާއި އެކު ލީގުގެ 16 ވަނައަށް ކުރިއަށްޖެހިލާފައެވެ.