ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ރ.ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް މާދަމާ އަށް ތާވަލުކޮށްފި އެވެ. 

ރައީސް ޔާމީންގެ ގާނޫނީ ޓީމުން ހާމަކުރެއްވި ގޮތުގައި އެ މައްސަލައިގެ އަޑުއެހުމެއް މާދަމާ 1:00 ގައި ކްރިމިނަލް ކޯޓުގައި ބޭއްވުމަށް ވަނީ ހަމަޖެހިފަ އެވެ. 

ފުއްގިރި މައްސަލައިގައި ރައީސް ޔާމީންގެ މައްޗަށް ދައުވާ އުފުލީ މިދިޔަ އަހަރު އެވެ. އެމައްސަލައިގެ އަޑުއެހުންތައް ކުރިއަށް ނުގެންގޮސް ގިނަ ދުވަސްތަކެއް ދިގު ދަންމާލުމަށްފަހު އަލުން ޝަރީއަތް ހިންގަން ފެށީ ރައީސް ޔާމީންގެ މައްޗަށް ވ. އާރަށުގެ މުއާމަލާތާއި ގުޅިގެން އުފުލާފައިވާ ދައުވާތައް ސާބިތުވާކަމަށް ކަނޑައަޅާ 11 އަހަރުގެ ޖަލު ހުކުމެއް ކުރި ފަހުންނެވެ. 

Advertisement

ފުއްގިރި މައްސަލައިގައި އެންމެ ފަހުން ބޭއްވި އަޑުއެހުމުގައި، މިހާރު އެ މައްސަލަ ބައްލަވާ ފަނޑިޔާރު އަލީ ނަދީމު މައްސަލައިން ތަނާޒުލްވުމަށް ދިފާއުން ވަނީ އެދިފައެވެ. 

އެފަދައިން ފަނޑިޔާރު ތަނާޒުލްވުމަށް ދިފާއުން އެދުނީ އަލީ ނަދީމަކީ އެމްއެމްޕީއާރުސީގެ ކުށް ސާބިތުވެފައިވާ ކުރީގެ ނައިބުރައީސް އަހުމަދު އަދީބުގެ ގާނޫނީ ވަކީލެއްގެ ގޮތުގައި މަސައްކަތްޕުޅު ކުރައްވާފައިވާ ފަރާތެއް މި މައްސަލައިގެ ފަނޑިޔާރުކަން ކުރުމަކީ މަސްލަހަތު ފުށޫ އަރާ ކަމަކަށް ވާތީކަން ދިފާއުން ވަނީ ފާހަގަކޮށްފަ އެވެ. 

މި މައްސަލައިގައި ހިމެނޭ އަހުމަދު ކުރިކް ރިޒާ މީގެ ކުރިން އައްޔަން ކުރެއްވި ގާނޫނީ ވަކީލަކީ ޒިޔަތުގެ ވަކީލެއްގެ ގޮތުގައި ހަރަކާތްތެރިވެފައިވާ ފަރާތެއްކަން ފާހަގަކޮށް ދައުލަތުން ކުރި އިއުތިރާޒަކާއި ގުޅިގެން އޭރު މައްސަލަ ބެއްލެވި އިސްގާޒީ ޝަކީލު ނިންމެވީ ގާނޫނީ ވަކީލު ޔާމީން މައްސަލައިގައި ތަނާޒުލްވާން ޖެހޭ ކަމަށެވެ.

އެހެންކަމަށް ވުމުން، ގާޒީ ނަދީމް ވެސް މައްސަލައިން ތަނާޒުލްވާން ޖެހޭ ކަމަށް ދިފާއީ ވަކީލުން ވަނީ ވިދާޅުވެފައެވެ.

އެހެން ނަމަވެސް އެންމެ ފަހުން އޮތް އަޑުއެހުމުގައި ފަނޑިޔާރު ނަދީމު ވިދާޅުވީ، އެމަނިކުފާނު އަދީބުގެ ވަކީލެއްގެ ގޮތުގައި މަސައްކަތްޕުޅު ކުރެއްވީ މީގެ 7 އަހަރު ކުރިންކަމަށެވެ. އެއީ ބަންދު މައްސަލައެއްގައި ކަމަށް ވުމުންނާއި، އެއްވެސް ކުށަކާ ގުޅިގެން އަދީބަށް ގާނޫނީ ލަފާދީފައި ނުވާތީ ތަނާޒުލްވާން ޖެހޭ ފަދަ ހާލަތެއް އޮތް ކަމަށް ދެކެވަޑައިނުގަންނަވާކަމަށް ގާޒީ ވިދާޅުވެފައި ވެއެވެ.  

މުޅި މައްސަލަ ދިރާސާ ކުރަން ވަގުތު ބޭނުންވާ ކަމަށާއި، ދެން އަންނަ އަޑުއެހުމުގައި ދިފާއުން ހުށައެޅި ކަންކަމާއި ގުޅޭގޮތުން ގޮތެއް ނިންމަވާނެކަމަށް ނަދީމް ވަނީ ވިދާޅުވެފައެވެ. 

އެހެންކަމުން މާދަމާގެ އަޑުއެހުމުގައި މި މައްސަލައިން ފަނޑިޔާރު ތަނާޒުލްވުމާއި ގުޅޭގޮތުންވެސް ގޮތެއް ނިންމާނެކަމަށް ބެލެވެއެވެ.