ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމުގައިވާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ ފުރަތަމަ މެޗުގައި އުތީމާއި ދެކޮޅަށް ނުކުންނަ ހޯރަފުށީ ފުޓްސަލް ޓީމު، މި އަހަރުގެ މުބާރާތައް ނުކުންނަނީ މުބާރާތް ކާމިޔާބުކުރުމަށް ފުރިހަމައަށް ތައްޔާރުވެގެންކަމަށް އެޓީމުގެ މެނޭޖަރު ބުނެފިއެވެ.
ވޯއިސް އަލް މައުލޫމާތް ދެމުން ހޯރަފުށީ ފުޓްސަލް ޓީމުގެ މެނޭޖަރު އުސައިދު މޫސާ ބުނީ، މި އަހަރުގެ މުބާރާތައް އެޓީމު ވަރަށް ރަގަޅަށް ތައްޔާރުވެފައިވާ ކަމަށެވެ. އެންމެ ފަހުން ކުޅުނު މުބާރާތުގެ އަތޮޅު ބުރު ފައިނަލުގައި ހޯރަފުށި ބަލިވީ އިހަވަންދޫ އަތުންނެވެ. އަދި ޒޯން ބުރާ ހަމައިން އެޓީމު މުބާރާތާއި އަލްވަދާއު ކިޔަންޖެހުނު އިރު، މިފަހަރުގެ ޓީމު ނުކުންނަނީ އެ މުބާރާތުގެ ތަޖުރިބާގެ އަލީގައި ބޮޑެތި ބަދަލުތަކަކާއި އެކުގައެވެ.
ހޯރަފުށީ ޓީމުގެ ޕްރެކްޓިސްގެ ތެރެއިން
އުސައިދު އިތުރަށް ވާހަކަ ދައްކަމުން ބުނީ މިދިޔަ އަހަރުގެ ޑިސެންބަރު މަހުތެރޭގައި މުބާރާތައް ތައްޔާރުވާން އެޓީމުން މަސައްކަތް ފަށައިފި ކަމަށާއި މިފަހަރު ހޯރަފުށި ޓީމުގެ ހުރިހާކަމެއްވެސް ކުރިއަށް ދަނީ ސީދާ އެރަށު ކައުންސިލްގެ ބެލުމުގެ ދަށުންކަމަށެވެ. "ކުރީ މުބާރާތުގައިވެސް ބައިވެރިވީ ކައުންސިލް ނަމުގައި އެކަމަކު އެފަހަރު އަމިއްލަ ފާރާތަކުން ޓީމު މެނޭޖުކުރީ ނަމަވެސް މިފަހަރު ސީދާ ކައުންސިލްގެ ބެލުމުގެ ދަށުން ވަރަށް ފޯރީގައި ތައްޔާރީތައް ކުރިއަށް މިދަނީ " މިފަހަރު އެޓީމު ކޯޗަކަށް ހަމަޖައްސާފައި ވަނީ ރާއްޖޭގެ ފުރަތަމަ ޑިވިޝަނުގައި ކުރިން ކުޅެފައިވާ އެރަށަށް ނިސްބަތްވާ ތަޖުރިބާކާރު ކޯޗެކެވެ.
ހޯރަފުށީ ޓީމުގެ ޕްރެކްޓިސްގެ ތެރެއިން
އަހުމަދު ސުޖާއުގެ ކޯޗު ކަމުގައި ހޯރަފުށި މުބާރާތަށް ނުކުންނައިރު އެޓީމުގެ ފުރަތަމަ ޓާގެޓަކީ މުބާރާތުގެ އަތޮޅު ބުރު ކާމިޔާބުކުރުމެވެ. އެއައްފަހު ޒޯން ބުރު އަދި ފައިނަލް ބުރުގައި ވާދަކޮށް ރާއްޖޭގެ ޗެންޕިއަންކަން ހޯދުން އުންމީދަކީ އުސައިދު ބުންޏެވެ.
މި އަހަރުގެ މުބާރާތުގައި ހޯރަފުށި ހިމެނުނީ ހއ. އަތޮޅުގެ ގުރޫޕް ދޭއް ގައެވެ. މިގުރޫޕްގައި ދެން ހިމެނެނީ އުތީމް، ވަށަފަރު އަދި އިހަވަންދޫ އެވެ. ފުރަތަމް މެޗުގައި ހޯރަފުށި ފެބުރުއަރި 5 ވަނަ ދުވަހު ނުކުންނާނީ އުތީމާއި ދެކޮޅަށެވެ. އަދި ދެވަނަ މެޗުގައި ފެބުރުއަރީ 7 ވަނަ ދުވަހު އެޓީމު ނުކުންނާނީ ވަށަފަރު ފުޓްސަލް ޓީމާއި ދެކޮޅަށެވެ. އަދި ގުރޫޕް ފަހު މެޗުގައި ފެބްރުއަރީ 10 ވަނަ ދުވަހު އެޓީމު ނުކުންނާނީ އެންމެ ފަހުުގެ ހއ. އަތޮޅު މުބާރާތުގެ ޗެންޕިއަން އިހަވަންދު އާއި ދެކޮޅަށެވެ.
Advertisement
This content is created and paid for by advertisers and does not involve Voice Journalists
