ލިއޯންގެ ޒުވާން ޑިފެންޑަރ މާލޯ ގުސްޓޯ 26.3 މިލިއަން ޕައުންޑުގެ ޓްރާންސްފާއެއްގައި ޗެލްސީއަށް ސޮއިކޮށްފިކަމަށް އެކުލަބުން ކަށަވަރުކޮށްދީފިއެވެ. ގުސްޓޯ ޗެލްސީއާއި ގުޅިފައި ވަނީ 2030 ވަނަ އަހަރުގެ ޖޫން މަހުގެ ނިޔަލަށެވެ.

ނަމަވެސް ފްރާންސްގެ 21 އަހަރުން ދަށުގެ އިންޓަނޭޝަނަލް ކުޅުންތެރިޔާ 2022-2023 ވަނަ އަހަރުގެ ސީޒަންގެ ބާކީ ބައިގައި ލިއޯން ޓީމާއެކު ލޯނު އުސޫލުން މަޑުކުރާނެ އެވެ. ޗެލްސީ އިން ގުސްޓޯގެ ސޮއި ހޯދީ އެޓީމުގެ މިހާރުގެ ރައިޓް ބެކް ރީސް ޖެމްސްގެ ބެކަޕް ޕްލޭއަރެއްގެ ގޮތުގައެވެ. އަދި އުމުރުން 19 އަހަރުގެ ގުސްޓޯ އަކީ އެޓީމުގެ ޑިފެންސް އިތުރަށް ވަރުގަދަކުރުމަށް ކުރަމުން އައި މަސައްކަތައް މުހިންމު ކުޅުންތެރިއެއްގެ ގޮތުގައި އެކުލަބުން ދެކެއެވެ. 

މާލޯ ގުސްޓޯ ޕީއެސްޖީ އާއި ދެކޮޅަށް ކުޅެނީ

މާލޯ ގުސްޓޯ ގެ އިތުރުން ފުރާންސްގެ ފޯވާޑް ކްރިސްޓޮފާ އެންކުންކޫ ޗެލްސީގެ ޓީމާއި ގުޅޭނީ މި ސީޒަން ނިމުމުންނެވެ. ޖަރުމަންގެ އާރްބީ ލައިޕްޒިގް އަށް ކުޅެމުން އަންނަ އެންކުންކޫގެ ސޮއި ޗެލްސީ އިން ހޯދީ 53 މިލިއަން ޕައުންޑުގެ ޓްރާންސްފާ ފީއަކަށެވެ.

އާދީއްތަ ދުވަހުގެ ހެނދުނު ގުސްޓޯ ވަނީ ޗެލްސީގެ ރަސްމީ އިންސްޓަގްރާމް ޕޭޖުގައި އެ ކްލަބުގެ ސަޕޯޓަރުންނާ މުހާތަބުކޮށްފަ އެވެ. "އޭ ޗެލްސީގެ ސަޕޯޓަރުން، އަހަރެން ވަރަށް އުފާވޭ މިތަނަށް އާދެވުނީމަ. ސަޕޯޓަރުންގެ މެސެޖުތަކަށް ޝުކުރު އަދާކުރަން އަދި ވަރަށް އަވަހަށް ބައްދަލުކުރާނަން...."

މާލޯ ގުސްޓޯ

އުމުރުން 19 އަހަރުގެ ގުސްޓޯ ވަނީ ފާއިތުވެދިޔަ ތިން އަހަރުގެ ތެރޭގައި ލިޔޯންގެ ފުރަތަމަ ޓީމަށް 54 މެޗު ކުޅެދީފައެވެ. އުމުރުން 19 އަހަރުގެ ގުސްޓޯ އަކީ ލިއޯންގެ ފުރަތަމަ އެގާރައިން މިހާރު ގަވާއިދުން ފުރުސަތު ހޯދަމުން އަންނަ އެޓީމުގެ މުހިންމު ކުޅުންތެރިއެކެވެ.

ގުސްޓޯގެ ސޮއި ޗެލްސީ އިން ހޯދިއިރު އިންޓަ މިލާނުން ހޫނު މޫސުމުގައި 12 މިލިއަން ޕައުންޑަށް ސޮއިކުރި ޗެލްސީގެ މިޑްފީލްޑަރު ސެސަރޭ ކަސަޑޭ މި ހަފުތާ ބަންދުގެ ފަހުން ލޯން އެއްބަސްވުމެއްގެ ދަށުން ޗެންޕިއަންޝިޕް ކުލަބް ރީޑިންއާ ގުޅުމަށް މިހާރު ދެ ކުލަބުން ވަނީ އެއްބަސްވެފައެވެ.

ގުސްޓޯ އަކީ ޗެލްސީން ޖެނުއަރީ ޓުރާންސްފާގައި ސޮއިކުރި ހަތް ވަނަ ކުޅުންތެރިޔާއެވެ. އޭގެ ތެރޭގައި ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށް އެތްލެޓިކޯ މެޑްރިޑުން އެޓީމާއި ގުޅުނު ޔޮއާއޯ ފެލިކްސް ވެސް ހިމެނެއެވެ. އަދި ޖެނުއަރީ ޓްރާންސްފާ މާކެޓުގައި ކުޅުންތެރިން ގެނައުމަށް އެކުލަބުން ކުރި ހޭދަ މިހާރުވަނީ 216 މިލިއަން ޕައުންޑަށް އަރާފައެވެ. ނަމަވެސް ޗެލްސީ އިން އަދިވެސް އަންނަނީ އެޓީމުގެ މިޑްފީލްޑް ވަރުގަދަކުރުމަށް އިތުރުު ކުޅުންތެރިއެއް ހޯދުމުގެ މަސައްކަތް ކުރަމުންނެވެ.

މިގޮތުން ބެންފީކާގެ އެންޒޯ ފެނާންޑޭޒް އާއި ބްރައިޓަންގެ މޮއިސްސް ކެއިސެޑޯ އަދި އެވަޓަންގެ އަމާޑޫ އޮނާނާ ފަދަ ކުޅުންތެރިން ގެނައުމަށް އެކުލަބުން މި މަހު ކުރި މަސައްކަތުގައި މިހާތަނަށް އެ ޓީމަށް ވަނީ އެކަށީގެންވާ ކުރިއެރުމެއް ނުލިބިފައެވެ.