އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް 11 އަހަރަށް ޖަލަށް ލުމަށް ކުރި ހުކުމަކީ ހަރާމް ހުކުމެއް ކަމަށް ބުނެ އިދިކޮޅުން އަޑު އުފުލާއިރު، "ހަރާމް ޙުކުމް" ކިޔުން ހުއްޓުވަން ޖުޑީޝަލް ސަރވިސް ކޮމިޝަން، ޖޭއެސްސީން ފުލުހުންނަށް ހުށަހަޅާފައިވާ ކަމަށް އެ ކޯލިޝަނުން ބުނެފިއެވެ. 

ރައީސް ޔާމީން މިނިވަންކުރުމަށް ގޮވާލާައި 3 ފެބުރުއަރީވާ ހުކުރު ދުވަހުގެ ހަވީރު 4:00 ގައި މާލޭގައި އިދިކޮޅު ކޯލިޝަނުން ކުރިއަށް ގެންދިޔުމަށް ރާވާފައިވާ "ބުންވަރު" ހިނގާލުމަށް ފުލުހުންގެ އެއްބާރުލުން ދޭނެ ކަމަށް ރަސްމީކޮށް ހާމަކޮށްފައި ވޭތޯ "ވޮއިސް" އިން ކުރި ސުވާލަށް ޖަވާބު ދެއްވަމުން އިދިކޮޅު ހަރަކާތު ކޮމިޓީގެ ރައީސް މުހައްމަދު އިސްމާއިލް ވިދާޅުވީ، އެ އެއްވުމާއި ގުޅޭގޮތުން ވާހަކަ ދެއްކެވުމަށް އޭނާ އާއި އިދިކޮޅުގެ ބައެއް އިސް މެންބަރުން މިއަދު ފުލުސް އޮފީހަށް ހާޒިރު ކޮށްފައިވާ ކަމަށެވެ.   

އަދި އެ ހިނގާލުން ބޭއްވޭނެ ރޫޓާއި، އެނޫންވެސް ކަންކަން އެ ބައްދަލުވުމުގެ ތެރެއިން ފުލުހުން ކިޔައިދެއްވާފައިވާ ކަމަށާ، މީގެ ކުރިން ފަހަރު ތަކެކޭ އެއްފަދައިން މިފަހަރުވެސް، ފުލުހުންގެ އެ އިރުޝާދާއި ޚިލާފަށް ހިނގާލުމުގެ ތެރެއިން ކަންކަން ކުރިއަށް ނުދާނެ ކަމުގެ ޔަގީންކަން ފުލުހުންނަށް ދެއްވާފައިވާނެ ކަމަށް އޭނާ ވިދާޅުވި އެވެ. 

Advertisement

އެހެން ނަމަވެސް އެ އިހްތިޖާޖުގެ ތެރެއިން ހަރާމް ހުކުމެއް ނުކިޔޭނެ ކަމަށް ފުލުހުން އަންގާފައިވާ ކަމަށާ، ފުލުހުންގެ އެ އެންގެވުމަށް އިޖާބަ ނުދެއްވާނެ ކަމަށްވެސް އިދިކޮޅުން ހާމަކޮށްފައިވާނެ ކަމަށް މުހައްމަދު އިސްމާއިލް ވިދާޅުވި އެވެ. އަދި އިދިކޮޅުން ކުރިއަށް ގެންދާ މި ހިނގާލުމާއި، އެހެނިހެންވެސް ހަރަކާތްތަކުގެ މައިގަނޑު މަގުސަދަކީ ވެސް  ރައީސް ޔާމީން އަށް ކޮށްފައިވާ ހުކުމަކީ ހަރާމް ހުކުމެއް ކަމަށް ގަބޫލު ކުރާތީ އެކަމާއި ދެކޮޅަށް އަޑު އުފުލަން ހިންގޭ ހަރަކާތްތަކެއް ކަމަށްވާއިރު، އެ ހަރަކާތްތަކުގެ ތެރެއިން އެފަދައިން ގިނަ ގިނައިން ގޮވާނެ ކަންވެސް ފުލުހުންނަށް އަންގާފައިވާނެ ކަމަށް އޭނާ ވިދާޅުވި އެވެ. 

ހަރާމް ހުކުމް ކިޔުން ހުއްޓުވުމަށް ޖޭއެސްސީން ފުލުހުންނަށް މައްސަލަ ހުށަހެޅި މައްސަލަ އާއި ގުޅިގެން އިތުރަށް ވާހަކަ ދައްކަވަމުން ޕީއެންސީގެ ނައިބް ރައީސް އިބްރާހިމް ޝުޖާއުވެސް ވަނީ، ތަހުޒީބު ހުރިހާ ގައުމެއްގައިވެސް ކޯޓުން ކުރާ ހުކުމާއި މެދު ހިތްހަމަ ނުޖެހޭނެ ނަމަ އެ ވާހަކަ ދެއްކުމުގެ ހައްގު އޮންނަ ކަމަށެވެ. އެހެންކަމުން، ރައީސް ޔާމީން އަށް ކުރި ހުކުމުގެ މައްސަލަ އަދި އޮތީ ދަށު ކޯޓު މަރުހަލާގައި ކަމަށްވާއިރު، އެ ހުކުމާއި މެދު ހިތްހަމަ ނުޖެހުން ފާޅުކުރުމަކީ، ޚިޔާލުފާޅުކުރުމުގެ މިނިވަންކަމުގެ ގާނޫނުގެ ދަށުން ކޮންމެ ރައްޔިތަކަަށް ވެސް ލިބިފައިވާ ހައްގެއް ކަމަށެވެ.  

ވ. އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ އެމަނިކުފާނުގެ މައްޗަށް 11 އަހަރުގެ ޖަލުހުކުމެއް ކްރިމިނަލް ކޯޓުން ކުރުމާއި ގުޅިގެން އެއީ ހަރާމް ހުކުމެއް ކަމަށް ބުނެ އިދިކޮޅުން މިހާރުވެސް އަންނަނީ ސިލްސިލާ ކޮށް، ކޮންމެ ރެއަކު މާލޭގައި މުޒާހަރާ ކުރަމުންނެވެ.