އެމްއެމްޕީއާރުސީގެ ޚިޔާނާތުގައި ބައިވެރިވިކަމުގެ ކުށް ޗާބިތުވެފައިވާ ކުރީގެ ނައިބުރައީސް އަހުމަދު އަދީބުގެ ގާނޫނީ ވަކީލެއްގެ ގޮތުގައި މަސައްކަތްޕުޅު ކުރައްވާފައި އޮތުމަކީ، އެ ޙިޔާނާތުގައި ހިމެނޭ މައްސަލައެއްކަމަށް ވާ ފުއްގިރި މައްސަލަ ބައްލަވާ ފަނޑިޔާރުކަމުން ނަތާޒުލްވާން ޖެހޭ ސަބަބެއް ނޫންކަމަށް މިހާރު އެ މައްސަލަ ބައްލަވާ އަލީ ނަދީމު ވިދާޅުވެއްޖެ އެވެ. 

ނަދީމު އެ މައްސަލައާއި ހަވާލުވެވަޑައިގެން އެންމެ ފުރަތަމަ ބޭއްވި އަޑުއެހުމުގައި ދިފާއުން ވަނީ ފަނޑިޔާރު ނަދީމު އެ މައްސަލައިން ނަތާޒުލްވުމަށް އެދިވަޑައިގެންފަ އެވެ. 

ނަދީމްއަކީ މީގެ ކުރިން އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ އަހުމަދު އަދީބުގެ ލޯޔަރެއްގެ ގޮތުގައި ހުންނެވި ބޭފުޅަކަށްވާތީ އެ އަޑުއެހުމުގައި ދިފާއީ ވަކީލުން ވަނީ ފަނޑިޔާރު ނަދީމް އެ މައްސަލައިން ތަނާޒުލްވުމަށް ހުށައަޅުއްވާފައެވެ.

Advertisement

އަދީބުގެ ވަކީލެއްގެ ގޮތުގައި ހުންނެވި ބޭފުޅަކު އެމްއެމްޕީއާރުސިއާއި ގުޅުން ހުރި އެ މައްސަލައިގެ ފަނޑިޔާރެއްގެ ގޮތުގައި ހުންނެވުމަކީ މަސްލަހަތު ފުށޫއަރާނެ ކަމެއްކަން ދިފާއީ ވަކީލުން ފާހަގަކުރެއްވި އެވެ. 

ފުއްގިރި މައްސަލައިން ފަނޑިޔާރު ނަދީމް ނަތާޒުލްވުމަށް ދިފާއީ ވަކީލުން އެދިފައިވަނީ އެ މައްސަލައިގައި ހިމެނޭ އަހުމަދު ކުރިކް ރިޒާ މީގެ ކުރިން އައްޔަން ކުރެއްވި ގާނޫނީ ވަކީލަކީ ޒިޔަތުގެ ވަކީލެއްގެ ގޮތުގައި ހަރަކާތްތެރިވެފައިވާ ފަރާތެއްކަން ފާހަގަކޮށް ދައުލަތުން ކުރި އިއުތިރާޒާއި ގުޅޭގޮތުން އޭރު މައްސަލަ ބެއްލެވި އިސްގާޒީ ޝަކީލު ނިންމެވީ ގާނޫނީ ވަކީލު ޔާމީން މައްސަލައިގައި ތަނާޒުލްވާން ޖެހޭ ކަމަށެވެ.

އެހެންކަމަށް ވުމުން، ގާޒީ ނަދީމް ވެސް މައްސަލައިން ތަނާޒުލްވާން ޖެހޭ ކަމަށް ދިފާއީ ވަކީލުން ވަނީ ވިދާޅުވެފައެވެ.

އެހެން ނަމަވެސް މިއަދުގެ އަޑުއެހުމުގައި ނަދީމު ވިދާޅުވީ އަދީބަށް ގާނޫނީ ލަފާދެއްވި ނަމަވެސް ފުއްގިރި މައްސަލައިގެ ފަނޑިޔާރުކަން ކުރުމަކީ މަސްލަހަތު ފުށޫއަރާނެ ކަމެއްކަމަށް ގަބޫލުފުޅު ނުކުރައްވާކަމަށެވެ. 

ނަދީމު ވިދާޅުވީ ފަނޑިޔާރުން ބައްލަވާ މައްސަލަތަކުން ތަނާޒުލްވާން ޖެހެނީ ދެ ސަބަބެއް މެދުވެރިވެގެންނެވެ. ފުރަތަމަ ކަމަކީ ދައުވާ ކުރެވޭ މައްސަލައިގެ ތަހުގީގު މަރުހަލާއިން ފެށިގެން ދައުވާ ކުރުމާ ހަމައަށް ބައިވެރިވުމެއް އޮތުމެވެ. އަދި ދެވަނަ ކަމަކީ ދައުވާ ލިބޭ މީހެއްގެ ވަކީލެއްގެ ގޮތުގައި މަސައްކަތް ކުރުން ނުވަތަ ގާނޫނީ ހިދުމަތް ފޯރުކޮށްދީފައި ވުމެވެ. 

އަދީބުގެ މައްސަލައެއްގައި އެފަދަ ކަމެއް ކުރައްވާފައި ނުވާނެކަމަށް ނަދީމު ވިދާޅުވިއެވެ. އަދީބަށް ގާނޫނީ ލަފާ ދެއްވީ މީގެ 7 އަހަރު ކުރިން ކަމަށާއި، އެއީ ބަންދު މައްސަލައެއްގައި ކަމަށާއި، އެއްވެސް ކުށަކާއި ގުޅިގެން އަދީބުގެ ގާނޫނީ މަސައްކަތެއް ކޮށްފައި ނުވާނެކަމަށް ނަދީމު ވަނީ ވިދާޅުވެފައެވެ. 

އެއާއެކު ފަނޑިޔާރު ނިންމެވީ ފުއްގިރި މައްސަލައިން އޭނާ ތަނާޒުލް ވާން ޖެހޭފަދަ އެއްވެސް ހާލަތެއް ނެތް ކަމަށެވެ. މިއަދުގެ އަޑުއެހުމުގައި ނަދީމު އިތުރަށް ވިދާޅުވީ މި މައްސަލަ އޭނާ ބެއްލެވުމަކުން އަދީބަށް ލިބޭނެ އެއްވެސް މަންފާއެއް ނެތްކަމަށެވެ. އަދި މައްސަލައިގައި ނިންމާނީ ދައުލަތުން ދައުވާ އުފުލާފައިވާ ފަރާތްތަކުގެ މައްޗަށް ދައުވާ ސާބިތުވާކަން ނުވަތް ނުވާކަން ކަމަށާއި، މައްސަލަ ބައްލަވާނީ އިންސާފުވެރި ކަމާއެކުގައި ކަމަށް ނަދީމު ވަނީ ވިދާޅުވެފަ އެވެ.