އެމްއާރުއެމުން ރައީސް ޞާލިހަށް ތާއީދު ނުކުރަން ނިންމިކަމަށް ބުނެ ފަތުރަނީ ދޮގު ޚަބަރެއް: އެމްއާރުއެމް
ކުރިއަށް އޮތް ރިޔާސީ އިންތިޚާބުގައި މޯލްޑިވްސް ރިފޯމު މޫވްމަންޓު (އެމްއާރުއެމް) އިން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ތާއީދު ނުކުރަން ނިންމިކަމަށް ބުނެ ފަތުރަމުންދަނީ ދޮގު ޚަބަރެއްކަމަށް އެ ޕާޓީއިން ބުނެފިއެވެ.
އެކަމާއި ގުޅޭގޮތުން އެ ޕާޓީއިން ނެރުނު ބަޔާނެއްގައި ބުނެފައިވަނީ ކުރިއަށް އޮތް ރިޔާސީ އިންތިޚާބުގައި އެމްއާރުއެމުން ރައީސް ޞާލިހަށް ތާއީދު ނުކުރަން ނިންމިކަމަށް "ދެންމެ" އޮންލައިން ނޫހުގައި ލިޔެފައިވާ ޚަބަރަކީ ދޮގު ޚަބަރެއް ކަމަށެވެ.
އެ ޚަބަރުގައި ހަވާލާދީފައި އެވަނީ މޯލްޑިވްސް ރިފޯމް މޫވްމަންޓްގެ ރަސްމީ އެއްވެސް ޙައިސިއްޔަތެއް އޮތް ޓުވިޓަރ ހޭންޑަލްއަކަށް ނޫން ކަމަށާއި، އެ ޕާޓީއިން އެފަދަ އެއްވެސް ނިންމުމެއް ނިންމާފައިވެސް ނުވާކަމަށް އެ ބަޔާނުގައި ބުނެފައިވެ އެވެ.
އެމްއާރުއެމުން ބުނީ އެ ޕާޓީއިން އެފަދަ ނިންމުމެއް ނިންމާ ނަމަ ރަސްމީކޮށް އެކަން އިއުލާނު ކުރާނެކަމަށެވެ.
އޭގެ އިތުރުން އެމްއާރުއެމުން ބުނީ ޕާޓީގެ ރަސްމީ ބަހެއް ނެތި އެނޮނިމަސް ޓުވިޓަރ އެކައުންޓަކާ ހަވާލާދީ، ވަކި ކަމެއްގައި އެއީ ޕާޓީގެ ސްޓޭންޑް ކަމަށް ބުނެ، އެ ޕާޓީގެ މެންބަރުންނާއި އެހެނިހެން ދިވެހި ރައްޔިތުންގެ މެދުގައި މިފަދައިން މަޢުލޫމާތު ފެތުރުމަކީ ވަރަށް ޒިންމާދާރުކަން ކުޑަ އަމަލެއްކަމަށެވެ.
އެމްއާރުއެމްއަކީ މި ސަރުކާރު ފެށުނިއްސުރެ ސަރުކާރަށް ވަފާތެރި ޕާޓީއެކެވެ. އޭގެ އިތުރުން އެ ޕާޓީއަކީ ސަރުކާރު ކޯލިޝަންގެ ހިއްސާދާރެކެވެ. މިހާތަނަށް އައިރު ކޯލިޝަން ރޫޅާލަން ޖެހޭފަދަ ބޮޑު އެއްވެސް މައްސަލައެއް ސަރުކާރު ހިންގާ މައި ޕާޓީ އެމްޑީޕީއާއި އެމްއާރުއެމް އާއި ދެމެދު ހިނގާފައި ނުވާކަންވެސް ފާހަގަކޮށްލެވެ އެވެ.
Advertisement
This content is created and paid for by advertisers and does not involve Voice Journalists