ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމުގައިވާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގައި ވަދަކުރާ އިގުރައިދޫ ޓީމުގެ މިފަހަރުގެ ޓާގެޓަކީ ރާއްޖޭގެ ޗެންޕިއަންކަން ހޯދުން ކަމުގައި އެޓީމުގެ ކޯޗު އަހުމަދު ވިސާލް (އަންދު) ބުނެފިއެވެ.

މިދިޔަ އަހަރު ބޭއްވުނު ގޯލްޑަން ފުޓްސަލް ޗެލެންޖުގައި ގއ.ކޮނޑޭގެ ޓީމާއި އެކު ފެނިގެންދިޔަ އަންދު އަކީ ރާއްޖޭގެ ޤައުމީ ފުޓްސަލް ޓީމުގެ އެސިސްޓެންޓް ކޯޗުއެވެ. މިދިޔަ އަހަރުގެ މުބާރާތް ފެށުނުތަނާހެން ޤައުމީ ޓީމާއިއެކު ބޭރަށް ފުރަންޖެހިގެން ޓީމު ދޫކޮށްލަންޖެހުނީ، ނަމަވެސް މިފަހަރު މުބާރާތުގައި އިގުރައިދޫ ޓީމާއި އެކު ރަގަޅު ކާމިޔާބެއް ހޯދުމަށް އަންދު ހުރީ ތައްޔާރަށެވެ.

އިގުރައިދޫ ފުޓްސަލް ޓީމުގެ ކޯޗު އަހުމަދު ވިސާލް (އަންދު) 

ފުޓްސަލް ކުޅުންތެރިއެއްގެ ގޮތުގައި ޤައުމީ ޓީމަށް ގިނަމެޗުތަކެއް ކުޅެދީފައިވާ އަންދު ކުޅުން ހުއްޓާލީ ކަކުލައް ލިބުނު އަނިޔާއަކާއި ގުޅިގެންނެވެ. ކުޅުންހުއްޓާލުމަށް ފަހުވެސް ޤައުމީ ޓީމާއި އެކު އޮފިޝަލެއްގެ އިތުރުން އެސިސްޓެންޓު ކޯޗެއްގެ ގޮތުގައި ގިނަ ތަޖުރިބާތަކެއް ކޮއްފައިވާ ވިސާލް އަކީ ފުޓްސަލް ކޯޗެއްގެ ގޮތުގައި ގިނަ ކާމިޔާބީތަކެއް ހޯދައިފައިވާ ތަޖުރިބާކާރު ކޯޗެކެވެ. 

އަހުމަދު ވިސާލް (އަންދު)ގެ ކޯޗުކަމުގައި އެމްޕީއެލް އަންހެން ޓީމު ޕްރެޒިޑެންޓްސް ކަޕް ފުޓްސަލް މުބާރާތުގައި މެޗަކުން ބަލިނުވެ ޗެއްޕިއަންކަން ހޯދާފައިވާއިރު، އަންދު ވަނީ ކުލަބް މޯލްޑިވްސް ފުޓްސަލް މުބާރާތުގެ އަންހެން ޗެންޕިއަންކަން މެޗަކުން ބަލިނުވެ ޖެހިޖެހިގެން ތިން އަހަރު އެމްޕީއެލް ޓީމަށް ހޯދައިދީފައިވެއެވެ. 

އިގުރައިދޫ ފުޓްސަލް ޓީމުގެ ފަރިތަކުރުންތަކުގެ ތެރެއިން

ގޯލްޑަން ފުޓްސަލް ޗެލެންޖުގެ ގއ. އަތޮޅު ބުރުގެ ޗެންޕިއަންކަން ދާންދޫ ފުޓްސަލް ޓީމަށް ދެފަހަރަށް ހޯދައިދީފައިވާ އަންދު ވޮއިސް އަށް މައުލޫމާތް ދެމުން ބުނީ އިގުރައިދޫ ޓީމުގައި ތިބީ ވަރަށް ހުނަރުވެރި ޒުވާން ކުޅުންތެރިންތަކެއް ކަމަށާއި މިކުޅުންތެރިންނާއި އެކު މި ފަހަރުގެ މުބާރާތުގެ ޓާގެޓަކީ ރާއްޖޭގެ ޗެންޕިއަންކަން ހޯދުން.. މިކުޅުންތެރިންގެ އެ ފެންވަރު އެބަހުރު އަދި އެންމެ ގުޅިގެން ވަރަށް ބުރަކޮށް މަސައްކަތް ކުރަމުން އަންނަނީ. ހާއްސަކޮށް މެނޭޖުމަންޓުން ލިބެމުންދާ އެއްބާރުލުން ފާހަގަކުުރަން އަންދު ބުންޏެވެ.

އިގުރައިދޫ ފުޓްސަލް ޓީމުގެ ކޯޗު އަހުމަދު ވިސާލް (އަންދު) 

ޓީމުގެ ހުރިހާ ކުޅުންތެރިންގެ ވަރަށް ބޮޑު އެދުމެއް މާލެ، ހުޅުމާލެ އަދި ވިލިގިލީގައި ދިރިއުޅޭ އިގުރައިދޫގެ ހުރިހާ ރައްޔިތުންވެސް ރަށު ޓީމު ކުޅޭ ދުވަސްތަކުގައި ދަނޑަށް ވަޑައިގެން ޓީމަށް ތަރުހީބުދެއްވުމަކީ، އިގުރައިދޫ ފުޓްސަލް ޓީމުގެ ކޯޗު އަހުމަދު ވިސާލް (އަންދު) ބުންޏެވެ.

މި އަހަރުގެ މުބާރާތުގައި އަތޮޅު ބުރުގައި ރ. އަތޮޅުން ވަނީ ފަސް ޓީމު ބައިވެރިވެފައެވެ. އެއީ އިގުރައިދޫގެ އިތުރުން ދުވާފަރު، އަލިފުށި، މީދޫ އަދި އިންނަމާދޫ އެވެ. ފުރަތަމް މެޗުގައި އިގުރައިދޫ ފެބުރުއަރި 8 ވަނަ ދުވަހު ނުކުންނާނީ އިންނަމާދޫ އާއި ދެކޮޅަށެވެ. އަދި ދެވަނަ މެޗުގައި ފެބުރުއަރީ 11 ވަނަ ދުވަހު އެޓީމު ނުކުންނާނީ މީދޫ ފުޓްސަލް ޓީމާއި ދެކޮޅަށެވެ. އަދި ގުރޫޕް ތިން ވަނަ މެޗުގައި ފެބުރުއަރީ 15 ވަނަ ދުވަހު އެޓީމު ނުކުންނާނީ އަލިފުށީ ފުޓްސަލް ޓީމާއި ދެކޮޅަށެވެ. ގުރޫޕް ސްޓޭޖް ފަހު މެޗުގައި ދުވާފަރު ފުޓްސަލް ޓީމާއި ދެކޮޅަށް އިގުރައިދޫ ނުކުންނާނީ ފެބުރުއަރީ މަހުގެ 25 ވަނަ ދުވަހުގައެވެ.