ޖަރުމަނު ކަޕްގެ ދެވަނަ ބުރުގައި ރޭ ރަށުންބޭރުގައި މައިންޒް ފަސޭހަކަމާއި އެކު 4-0 ގެ ތަފާތުބޮޑު ނަތީއްޖާއަކުން ބަލިކޮށް މުބާރާތުގެ ކުއާޓާ ފައިނަލުން ބަޔާން މިއުނިކް ޖާގަ ހޯދައިފިއެވެ.

ޖަނަވަރީ ޓްރާންސްފާގެ ފަހު ދުވަހު ލޯން އެއްބަސްވުމެއްގެ ދަށުން ޕްރިމިއާ ލީގުގެ މެންޗެސްޓާ ސިޓީން ބަޔާން މިއުނިކާއި ގުޅުނު ޕޯޗުގަލްގެ ޑިފެންޑަރ ކެންސެލޯ ވަނީ ރޭގެ މެޗުގެ ފުރަތަމަ އެގާރާގައި ހިމެނިގެން ކުޅެފައެވެ. އަދި މި މެޗުގައި ބާޔާނުން ކާމިޔާބުކުރި ފުރަތަމަ ލަނޑު މެޗުގެ 17 ވަނަ މިނެޓުގައި ކެމަރޫންގެ ފޯވާޑް އެރިކް މެކްސިމް ޗައުޕޯ-މޮޓިން ކާމިޔާބުކޮށްދިނީ ބަޔާން އާއި އަލަށް ގުޅުނު ފޯޗުގަލްގެ ޑިފެންޑަރ ކެންސެލޯ ތަނަވަސްކޮށްދިން ފުރުސަތެއްގައެވެ.

އަލްފަންސޯ ޑޭވިސް ލަނޑުޖެހުމަށް ފަހު އުފާ ފާޅުކުރަނީ

ބަޔާންގެ ދެވަނަ ލަނޑު ފުރަތަމަ ހާފުގެ 30 ވަނަ މިނެޓުގައި ތޯމަސް މުލާ ތަނަވަސް ކޮށްދިން ފުރުޞަތެއްގައި ކާމިޔާބު ކޮށްދީފައި ވަނީ ޖަރުމަންގެ ޒުވާން މިޑްފީލްޑަރ ޖަމާލް މުސިއާލާއެވެ. އަަދި ފުރަތަމަ ހާފު ނިމުމުގެ ކުރިން އެޓީމުގެ ތިންވަނަ ލަނޑު 44 ވަނަ މިނެޓުގައި ޗޫޕޯ މޯޓިން ތަނަވަސް ކޮށްދިން ފުރުޞަތެއްގައި ކާމިޔާބު ކޮށްދީފައި ވަނީ ސާނޭއެވެ.

މި މެޗުގައި ބަޔާނުން ކާމިޔާބުކުރި ހަތަރުވަނަ ލަނޑު  ދެވަނަ ހާފުގެ 83 ވަނަ މިނެޓުގައި ކިމިކް ތަނަވަސް ކޮށްދިން ފުރުޞަތެއްގައި ކާމިޔާބު ކޮށްދީފައި ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެންނުކުތް އެޓީމުގެ ޑިފެންޑަރ އަލްފަންސޯ ޑޭވިސްއެވެ. ރޭގެ މެޗަކީ ނިމިދިޔަ ވޯލްޑް ކަޕް ފުޓްބޯޅަ މުބާރާތައް ފަހު ކުޅުނު ހަތަރު މެޗުންވެސް މޮޅެއް ހޯދިފައިނުވާ ބާޔާން މިއުނިކް މި އަހަރު މޮޅުވި ފުރަތަމަ މެޗެވެ.

ރޭގެ މެޗު މައިންޒް އިން ނިންމާލީ އެއް ކުޅުންތެރިޔަކު މަދުކޮށެވެ. ދެވަނަ ހާފުގެ 87 ވަނަ މިނެޓުގައި އެ ޓީމްގެ އެލެކްސެންޑާ ހެކަށް ރެފްރީ ވަނީ ދެވަނަ ރީނދޫ ކާޑާއިއެކު ރަތް ކާޑު ދައްކާ ދަނޑުން ފޮނުވާލާފައެވެ.