އިހުލާސްތެރި ކަމުގެ ވާހަކަ ދައްކަން ހޯމް މިނިސްޓަރު ޝެއިޚް އިމްރާން ލަދުގަންނަން ޖެހޭ ކަމަށް ދީނީ ޢިލްމުވެރިޔާ ޝެއިޚް ސައުދާން ވިދާޅުވެއްޖެއެވެ.

ސައުދާން މިހެން ވިދާޅުވީ، އިމްރާން ކުރެއްވި ޓުވީޓަކަށް ރައްދު ދެއްވަމުންނެވެ.

އިމްރާން ވިދާޅުވެފައި ވަނީ އިހުލާސްތެރި ކަމާއެކު ރައީސް ޔާމީން ސަލާމަތް ކުރުމަށް އުޅުއްވާ ބޭފުޅުންނަށްވުރެ، ލީޑަރޝިޕްގައި ގިނައީ އެހެން މަގުސަދެއް ހާސިލު ކުރައްވަން އުޅުއްވާ ބޭފުޅުންކަން އެއްދުވަހުން އަނެއްދުވަހަށް ހާމަވާ މިންވަރު ބޮޑުވަމުން ދާކަމަށެވެ.

Advertisement

އިމްރާންގެ އެ ޓުވީޓު ރީޓުވީޓު ކުރައްވަމުން ސައުދާން ވިދާޅުވީ، އިހުލާސްތެރިކަމުގެ ވާހަކަ ދައްކަން އިމްރާން ލަދުގަންނަން ޖެހޭ ކަމަށެވެ. އަދި އިމްރާން މިހާރު ހުންނެވި މަގާމަށް އައީ އިހުލާސްތެރި ކަރުދާސްތަކެއް ދައްކައިގެންތޯ ސައުދާން ވަނީ ސުވާލު އުފައްދާފައެވެ.

"ދީނާ ހިލާފު އެތައްކަމެއް ސަރުކާރުން ކުރާއިރު، ސަނާ ކިޔުންމަތީ ތި ހުންނަވަނީ އިހުލާސްތެރި ވީމަތޯ ނޫނީ އެހެން މަގުސަދެއް އޮތްކަން އިލްހާމް ވީތޯ؟" ސައުދާން ސުވާލު ކުރައްވާފައިވެއެވެ.