ތުރްކިޔޭ އައި ބިންހެލުމުގައި އެތައް ސަތޭކަ ބަޔަކު މަރުވުމާއި، މަރުވި މީހުންގެ އާއިލާ ތަކަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ތައުޒިޔާ ދަންނަވައިފިއެވެ. 

7.8 މެގްނެޓިޔުޓް ބާރު މިނުގައި ތުރްކިޔޭގެ ދެކުނަށާއި ސީރިޔާގެ އުތުރަށް އައި ބިންހެލުމުގައި ބޮޑެތި ޢިމާރާތް ތަކެއް ވަނީ ވެއްޓީ ބިމާއި ހަމަވެފައެވެ. މިހާދިސާގައި ތުރުކިޔޭ އިން މިހާތަނަށް 284 މީހަކު މަރުވެފައިވާ ކަމަށާއި ސޫރިޔާއިން 384 މީހަކު މަރުވެފައިވާ ކަމަށް ވަނީ ރިޕޯޓް ކުރެވިފައެވެ.

މިކަމާއި ގުޅިގެން ރައީސް ޞާލިހު ކުރެއްވި ޓްވީޓެއްގައި އެމަނިކުފާނު ވަނީ، އެ ޚަބަރު އެހީ ފުން ހިތާމަޔާއި އެކުގައިކަން ފާހަގަކުރައްވައި ހާދިސާގައި މަރުވި މީހުންގެ އާއިލާތަކަށް ތައުޒިޔާ ދަންނަވާފައެވެ. 

އަދި މި ހިތާމަވެރި ދަނޑިވަޅުގައި ދިވެހިރާއްޖެ ވަނީ ތުރުކިޔޭގެ ރައީސް ރަޖަބް ޠައްޔިބް އުރްދުޣާން އާއި އެގައުމުގެ ސަރުކާރާއި އެކުގައި ކަމަށްވެސް އެމަނިކުފާނު ވިދާޅުވިއެވެ. 

އެމެރިކާގެ ޖިއޮލޮޖިކަލް ސާވޭ އިން ދައްކާގޮތުން މި ބިންހެލުން އުފެދިފައިވަނީ ގަޒިއަންޓެޕް ކިޔާ ހިސާބާއި 20 މޭލު ކައިރިން ކަމަށާއި އަދި ބިން ހެލުން އަތުވެފައިވަނީ 11 މޭލު އަޑިން ކަމަށެވެ. 6.7 މެގްނެޓިޔުޓް ގައި އައިކަމަށް ރިކޯޑް ކުރެވިފައިވާ ބިންހެލުން ހުއްޓުމަށްފަހު އޭގެ އަސަރު 10 މިނިޓަށް ދެމިގެން ދިޔަ ކަމަށެވެ. އަދި ބިންހެލުމުގެ އިހްސާސް ސައިޕްރަސް އާއި ލުބްނާން ވަނީ ކޮށްފައިކަމަށެވެ.

ތުރްކިޔޭގެ ރައީސް ރަޖަބް ޠައްޔިބް އުރްދުޣާން ޓުވިޓާގައި ވިދާޅުވެފައިވަނީ "މީހުން ހޯދާ ފަރާތްތަކާއި ރެސްކިޔު ޓީމް ތަކުން ވަނީ ވަގުތުން އެސަރަހައްދުތަކުގައި ހަރަކާތްތެރިވާން ފަށައިފައި" މިހެނެވެ.