އިންކަމް ޓެކްސްގެ ގޮތުގައި މިދިޔަމަހު މީރާ އަށް ރިކޯޑް އަދަދަކަށް ފައިސާ ލިބިއްޖެއެވެ. 

މީރާއިން އާއްމުކޮށްފައިވާ މިދިޔަ މަހުގެ ޓެކްސް އާމްދަނީ ރިޕޯޓުގައިވާގޮތުން، އެ މަހުގެތެރޭ އިންކަމް ޓެކްސްގެ ގޮތުގައި 1.3 ބިލިއަން ރުފިޔާ ލިބިފައިވާއިރު، މި އަދަދަކީ މިދިޔަ އަހަރުގެ މި މުއްދަތުގައި އިންކަމް ޓެކްސްގެ ގޮތުގައި ލިބުނު 864 މިލިއަން ރުފިޔާ އާއި އަޅާ ބަލާއިރު، ގާތްގަނޑަކަށް 50 އިންސައްތަ އިތުރު އަދަދެކެވެ. އަދި މިއީ މިހާތަނަށް އެންމެ މަހެއްގެ ތެރޭގައި އެންމެ ގިނައިން އިންކަމް ޓެކްސް ލިބިފައިވާ މަސް ކަމަށް މިވަނީ ވެފައެވެ. 

ޖަނަވަރީމަހު އިންކަމް ޓެކްސްގެ ގޮތުގައި ލިބުނު އާމްދަނީގެ ތެރެއިން، 1.18 މިލިއަން ރުފިޔާ ހިމެނެއެވެ. އަދި 7 ލައްކަ އެމެރިކާ ޑޮލަރު ހިމެނެއެވެ.

އިންކަމް ޓެކްސްގެ ގޮތުގައި އެންމެ ބޮޑު އަދަދަކަށް ދައުލަތަށް އާމްދަނީ ލިބިފައިވަނީ ކުންފުނިތަކާއި އަމިއްލަ ފަރުދުން ނޫން ފަރާތްތަކުގެ އަތުން ނަގާ ޓެކްސްގެ ގޮތުގައި ލިބުނު އާމްދަނީ ކަަމަށްވާއިރު، އެގޮތުން، ދައުލަތަށް 724 މިލިއަން ރުފިޔާ ލިބިފައިވާ ކަމަށް މީރާގެ ތަފާސް ހިސާބުތަކުން ދައްކައެވެ. 

މިއީ މިދިޔަ އަހަރުގެ ޖަނަވަރީމަހު ލިބިފައިވާ 362 މިލިއަން ރުފިޔާ އާއި އަޅާ ބަލާއިރު، ގާތްގަނޑަކަށް 100 އިންސައްތަ އިތުރު އަދަދެކެވެ.

މީގެ އިތުރުން މިދިޔަ މަހު ވަކި ވަކި ފަރުދުންގެ އަތުން ނަގާ އިންކަމް ޓެކްސްގެ ގޮތުގައި ދައުލަތަށް 52.2 މިލިއަން ރުފިޔާ ލިބިފައިވާ ކަމަށް ތަފާސްހިސާބުތައް ދައްކައެވެ. 

ރާއްޖޭގައި ފަރުދުންގެ ޢާމްދަނީން ޓެކްސް ނަގަން ފެށީ 1 ޖެނުއަރީ 2020 ގައެވެ. އިންކަމް ޓެކްސް ނަގަނީ މަހެއްގެ މައްޗަށް 60،000 އަށްވުރެ މަތީ އާމްދަނީއެއް ލިބޭ ފަރާތްތަކުންނެވެ. އުޖޫރައިގެ އާމްދަނީން ޓެކްސް ނަގަން ފަށައިފައިވަނީ 1 އެޕްރީލް 2020 އިން ފެށިގެންނެވެ.