ޤާނޫނު އަސާސީއާއި ޚިލާފަށް އެކުލަވާލާ އެއްވެސް ޤަވާއިދެއް ތަންފީޒުކުރަން ނުޖެހޭނެކަމަށް ރައްޔިތުންގެ މަޖިލީހުގެ މާމިނގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ޕީޖީ ލީޑަރު ޤާސިމް އިބްރާހިމް ވިދާޅުވެއްޖެ އެވެ.
ޤާސިމް މިފަދައިން ވިދާޅުވެފައިވަނީ ރާއްޖެއަށް ޑްރަގް އެތެރެކުރާ ބިދޭސީން އަނބުރާ ފޮނުވާލެވޭގޮތަށް ހަދާފައިވާ ޤަވާއިދު ބަދަލުކުރުމަށް ގޮވާލާ މަޖިލީހަށް ހުށައަޅުއްވާފައިވާ ކުއްލި މައްސަލައަށް ތާއީދުކުރައްވާ ވާހަކަފުޅު ދައްކަވަމުންނެވެ.
އެ މައްސަލައަށް ބަހުސްކުރައްވަމުން ގާސިމް ވިދާޅުވީ ކޮންމެ ބަޔަކުވެސް ވެރިކަން ކުރަނީ ޤާނޫނު އަސާސީއިން ލިބިދޭ ބާރުތަކުގެ ބޭނުން ހިފައިގެން ކަމަށެވެ. ޤާނޫނު އަސާސީގެ ބޭރުން އެއްވެސް ކަމެއް ކުރުމުގެ އިޚްތިޔާރު އެއްވެސް ބަޔަކަށް ލިބިގެން ނުވާކަމަށް ޤާސިމް ވިދާޅުވި އެވެ.
އެވާހަކަފުޅާއި ގުޅުވާ ޤާސިމް ވިދާޅުވީ ޤާނޫނުތަކާއި ޤަވާއިދުތައްވެސް ހެދެނީ ޤާނޫނު އަސާސީއާއި ފުށު ނާރާ ގޮތެއްގެ މަތިން ކަމަށެވެ. އެއާއި ޚިލާފަށް ޤާނޫނު އަސާސީއާއި ފުށުއަރާ ޤަވައިދުތައް ހެދިޔަސް، އެފަދަ ޤަވައިދަކީ އުފެދުމުގައިވެސް ބާތިލް ޤަވާއިދުތަކެއް ކަމަށާއި، އެފަދަ ޤަވާއިދެއް ތަންފީޒުކުރަން އެންގެވި ނަމަވެސް އެ ތަންފީޒު ނުކުރެވޭނެކަމަށް އޭނާ ވިދާޅުވި އެވެ.
އެއާއެކު ޤާސިމް ވަނީ މަސްތުވާތަކެތި އެތެރެކުރާ މީހުން އަނބުރާ ފޮނުވާލެވޭގޮތަށް އޮތް ގަވައިދު ބަދަލުކޮށް ޤާނޫނު އަސާސީއަށް ފެތޭގޮތަށް ޤަވައިދު ފަރުމާކުރުމަށް ގޮވާލައްވާފަ އެވެ.
"ޤާނޫނު އަސާސީއާއި ޚިލާފަށް އެއްވެސް ޤަވާއިދެއް ނެހެދޭނެ. އަދި ޤާނޫނު އަސާސީއާއި ޤާނޫނާއި ޚިލާފަށް މީހަކަށް ޤަވާއިދެއް ނެހެދޭ ތަނުގައި އަދި އޭގެ އިތުރަށް ކުރާ އަމުރަކަށްވެސް ތަބާވާކަށް ނުޖެހޭނެ އެއީ ކޮންމެ ވެރިޔަކު ކުރިޔަސްވެސް"
މަޖިލީހުގެ މާމިނގިލީ ދާއިރާގެ މެމްބަރު ޤާސިމް އިބްރާހިމް
ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ހުށައެޅުއްވި އެ ކުއްލި މައްސަލައިގައި ބުނެފައިވަނީ ރާއްޖެއަށް މަސްތުވާތަކެތި އެތެރެކުރާ މީހުން ދޫކޮށްލެވޭގޮތަށް ހަދާފައިވާ ޤަވައިދަކީ މަސްތުވާތަކެތި ޓްރެފިކްކުރަން އުޅުމާއި އެކަމުގައި އެހީތެރިވެދިނުމަކީ އަދި އެކަމުގައި އެއްވެސް ސިފައެއްގައި ބައިވެރިވުމަކީ ކުށެއްކަމަށް ގާނޫނުގައި ބަޔާންކޮށްފައިވާ މާއްދާއާއި ފުށޫއަރާ ގަވައިދެއް ކަމަށެވެ.
މަސްތުވާތަކެތި އެތެރެކޮށް ވިޔަފާރި ކުރުމަކީ ކުށެއް ކަމަށާއި އެކުށުގެ އަދަބެއްގެ ގޮތުން 18 އަހަރަށް ޖަލަށްލުމާއެކު 10 މިލިއަން ރުފިޔާއިން ޖޫރިމަނާކުރެވޭނެކަމަށް ޤާނޫނުގައި ބަޔާންކޮށްފައިވާއިރު ޤާނޫނުން ކުށެއްކަމަށް ކަނޑައަޅައި އެކަމަށް އަދަބެއް ބަޔާންކޮށްފައި އޮތް ކަމެއް ނަފީވާ ގޮތަށް ޤަވާއިދެއް ހަދައި ތަންފީޒުކުރުމަކީ ޤާނޫނީ ގޮތުން ކުރެވޭނެ ކަމެއް ނޫންކަމަށް އެ މައްސަލައިގައި ފާހަގަކުރައްވާފައި ވެއެވެ.
ރައްޔިތުންގެ މަޖިލީހުން އެ މައްސަލަ ބަލައިގަނެ ހޫނު ބަހުސެއް ކުރެވެމުންދާއިރު، މިހާތަނަށް ވާހަކަދެއްކެވި ހުރިހާ މެމްބަރުންވެސް ވަނީ އެ ގަވައިދު ބަދަލުކުރުމަށް ގޮވާލާފަ އެވެ.
Advertisement
This content is created and paid for by advertisers and does not involve Voice Journalists
