އިންޑިއާގެ މަތިންދާ ބޯޓުތައް ހަނިމާދޫ އިންޓަރނޭޝަނަލް އެއަރޕޯޓަށް އަންނަން ފެށުމުން އެ ސަރަހައްދުގެ ފަތުރުވެރިކަން ބާރަށް ކުރި އަރައިގެން ދާނެ ކަމަށް ފަތުރުވެރިކަމާއި ބެހޭ ވަޒީރު ޑރ. މައުސޫމް ވިދާޅުވެއްޖެ އެވެ. 

މިއަދު ކުރިއަށް ދިޔަ ރައްޔިތުންގެ މަޖްލީހުގެ ޖަލްސާ ގައި ހޯރަފުށީ ދާއިރާގެ މެންބަރު އަހުމަދު ސަލީމް ވަނީ ފަތުރުވެރިކަން ކުރާ ފަރާތްތަކަށް ޓެކްސް ދެއްކުމުގައި ލުއި ތަކެއް ދޭނެ ސިޔާސަތަކާއި، ފަތުރުވެރިންނަށް ދަތުރު ފަތުރު ކުރުމުގައި ލުއިތަކެއް ދިނުމުގެ ސިޔާސަތެއް ފެންނަށް ނެތް ކަމަށް ވިދާޅުވެފައެވެ. އެހެން ކަމުން، އެ ދެ މައްސަލަ ހައްލުކޮށް ފަތުރުވެރިކަން ކުރިއެރުވުމަށް މިނިސްޓަރު ގެ ވިސްނުންފުޅުހުރީ ކޮންގޮތަކަށްތޯ އޭނާ ވަނީ ސުވާލު ކުރައްވާފައެވެ. 

ސަލީމް ގެ ސުވާލަށް ޖަވާބު ދެއްވަމުން މިނިސްޓަރު މައުސޫމް ވިދާޅުވީ، ސަރުކާރުގެ ފަތުރުވެރިކަމުގެ ސިޔާސަތަކީ އެ ދާއިރާގެ ކުރިއެރުމަށް ހުރި މައްސަލަތައް ހައްލު ކުރުމުގެ ސިޔާސަތަކަށް ވާންޖެހޭ ކަމަށެވެ. 

Advertisement

މިއާއެކު މައުސޫމް ވިދާޅުވީ، ރާއްޖޭގެ ފަތުރުވެރިކަން ރައްޔިތުންނާއި ހަމައަށް ގެންދިޔުމަށްޓަކައި "ކޮމިޔުނިޓީ ބޭސްޑް" ފަތުރުވެރިކަން ކުރިއަށް ގެންދާއިރު އޮތް އެންމެ ބޮޑު ގޮންޖެހުމަކީ ދަތުރުފަތުރުކަން ފާހަގަކުރައްވާފައެވެ.

އެހެންކަމުން، އެ މައްސަލަ ހައްލުވުމުން، ބޮޑުތިލަދުންމައްޗާއި އެންމެ ކައިރީގައި އޮތް އިންޑިއާއިން އެ ސަރަހައްދަށް އަންނަ ފަތުރުވެރިންގެ އަދަދު ބޮޑުތަނުން އިތުރުވެގެންދާނެ ކަމަށާ، ނަތީޖާއެއްގެ ގޮތުން ސަރަހައްދުގައި ފަތުރުވެރިކަން ކުރިއަރައިގެންދާނެ ކަމަށްވެސް މިނިސްޓަރު ވިދާޅުވި އެވެ.

"ކައިރީގައި އޮތް އެންމެ ބޮޑު މާކެޓް. މިހާރު އަޅުގަނޑުމެންގެ މިއަހަރުގެ ދެވަނަ މާކެޓް. އިންޑިއާ. އިންޑިއާ އާއި އެންމެ ގާތް ރަށް ހއ. ކެލާ. އެއީ ދެން ހަނިމާދޫއާއި ކެލާ އާއި ވެސް މާ ދުރެއް ނޫން. އެހިސާބަށް މަތިންދާބޯޓުތައް އަންނަންފެށީމާ، އެ ބޮޑު މާކެޓުން ވަރަށް ބާރަށް ފަތުރުވެރިން އަންނަން ފަށާނެ." 

"އިންޑިއާ މީހުން އާއްމުކޮށް ދަތުރު މިކުރަނީ 4 ދުވަހަށް ގިނައިން. މާލެ ސަރަހައްދަށް ބަތިންދާ ބޯޓެއްގައި އައިއްސަ، އަޅުގަނޑުމެންގެ މިވަގުތު އެތޭރެގެ އުދުހުންތައް ހުރިގޮތުން، އެތައް ގަޑިއިރެއް މަޑުކޮށްފައި، ބޮޑު އަގެއްދީފައި، ގެސްޓްހައުސް ހުންނަ ރަށަކަށް ދަތުރު ކުރުމަކީ އެހާ ރަނގަޅު ހައްލެއް ނޫން." ޑރ. މައުސޫމް ވިދާޅުވި އެވެ. 

މައުސޫމް އިތުރަށް ވިދާޅުވީ، ހަނިމާދޫ އެއާޕޯޓް ބޭނުންވަނީ އެ މައްސަލަ ހައްލު ކުރުމަށް ކަމަށާ، އިންޑިޔާއިން އަންނަ މަތިންދާ ބޯޓު ތަށް، މާލެއަށް ދާން ނަގާ ވަގުތަށްވުރެ 40 މިނެޓް ކުރިން ހަނިމާދޫ އެއާޕޯޓަށް ޖެއްސޭނެ ކަމަށެވެ. އެހެންކަމުން، އޭގެ ސަބަބުން، ވަގުތާއި ފައިސާ ސަލާމަތްވެގެންދާނެ ކަމަށާ، ފަތުރުވެރިކަން ކުރި އެރުވުމަށް އެންމެ މުހިން ދެ ކަންތަކަކީ އެއީ ކަމަށްވެސް މިނިސްޓަރު ފާހަގަކުރެއްވިއެވެ.

އެއާޕޯޓް ގެ އިތުރުން، ބޮޑުތިލަދުންމަތީގައި މިހާރުވެސް ހިނގަމުންދާ އާރްޓީއެލް ފެރީގެ ޚިދުމަތުން ފަތުރުވެރިންނަށްވެސް ނަގަމުންދަނީ ދިވެހިންނަށް ނަގަމުންދާ އަގުކަން ފާހަގަކުރައްވައި މައުސޫމް އިތުރަށް ވިދާޅުވީ، އެކަމާއި، އަދި އެ ސަރަހައްދުގެ ރަށް ރަށުގެ ބަނދަރާއި ފެނާއި ނަރުދަމާގެ އިތުރުން، އިޖުތީމާއީ އެހެން ކަންކަން ވެސް ކުރިއަރުވަމުންދަނީ ފަތުރުވެރިކަން ކުރިއަރުވަން ކަމަށެވެ. އަދި ސަރުކާރުގެ އެ ސިޔާސަތުގެ ދަށުން ކުރަމުންދާ މަސައްކަތްތައް ދުރު ރާސްތާއެއްގައި ނިމިގެންދާނެ ކަމަށާ، ދުރު ރާސްތާއޭ ދެންނެވިނަމަވެސް އެއީ ކުރިއަށް އޮތް ދެ އަހަރެއްހާ ދުވަސް ކަމަށްވެސް ވިދާޅުވި އެވެ.