ޚާއްސަ ރަސްމިއްޔާތަކާއެކު އަމީނީ މަގުގައި ތާރުއަޅަން އެމްޓީސީސީއިން ފަށައިފި އެވެ.
އަމީނީ މަގުގައި މުޅިން އަލަށް ތާރު އަޅަން ފަށާފައިވާއިރު، އެކަން ފާހަގަކުރުމަށް ބޭއްވި ރަސްމިއްޔާތުގައި ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ބައިވެރިވެވަޑައިގެންނެވި އެވެ.
ޒަމާނީ ފެންވަރަށް އަމީނީ މަގު ތަރައްގީ ކުރުމުގެ މަސައްކަތް މާލޭ ސިޓީ ކައުންސިލުން ނެގުމަށްފަހު ޕްލޭނިން މިނިސްޓްރީއިން އެ މަސައްކަތް ހަވާލުކުރީ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އާ އެވެ. އެ މަސައްކަތް އާރުޑީސީއާއި ހަވާލުކޮށްފައި ވަނީ މި ދިޔަ ސެޕްޓެމްބަރު މަހުގައެވެ. އާރުޑީސީއާއި އެ މަސައްކަތް ހަވާލުކުރީ 7 މަސްތެރޭ އަމީނީ މަގުގެ މަސައްކަތް އެއްކޮށް ނިންމާލުމަށެވެ.
އެހެން ނަމަވެސް މަގު ނުހެދި ގިނަ ލިގުލައިގެން ދިއުމާއި ގުޅިގެން ބޮޑެތި ފާޑުކިޔުންތަކެއް ސަރުކާރާއި އާރުޑީސީއަށްވެސް އަމާޒުވަމުން ދިއުމާއި ގުޅިގެން އަމީނީ މަގުގައި ތާރު އެޅުމުގެ މަސައްކަތް އެފަހުން އެމްޓީސީސީއާއި ހަވާލުކުރިއެވެ.
އެމްޓީސީސީއިން އަމީނީ މަގުގައި ތާރު އަޅާނީ އަމީނީ މަގުގެ ސްޓެލްކޯ ހުންނަ އިމާރާތް ނިމޭ ހިސާބަށެވެ. އެއީ މިހާތަނަށް އެ ކުންފުންޏާއި ހަވާލުކޮށްފައިވާ ހިސާބެވެ.
އަމީނީ މަގުގައި ތާރު އެޅުމުގެ މަސައްކަތް ކުރިއަށް ދަނީ/ ފޮޓޯ: ވޮއިސް
ޕްލޭނިން މިނިސްޓްރީއިން ބުނީ އެމްޓީސީސީއާއި ތާރު އެޅުމުގެ މަސައްކަތް ހަވާލުކުރީ ތާރު އަޅާ މެޝިން ބަހައްޓާނެ ޖާގަ އާރުޑީސީއަށް ނުލިބުމުން މަސައްކަތް އަނެއްކާވެސް އިތުރަށް ލަސްވެގެން ހިނގައިދާނެތީ، އެ މަސައްކަތް އަވަސްކުރުމަށް ކަމަށެވެ.
މިހާރުވެސް އަމީނީ މަގުގެ މަސައްކަތް ދަނީ ކުރިން ކަނޑައަޅާފައިވާ ޝެޑިއުލާއި އެއްގޮތަކަށް ނޫނެވެ. އެއާއެކު އަމީނީ މަގު ނިންމޭނެ އިތުރު ތާރީހެއް މިހާރު ޕްލޭނިން މިނިސްޓްރީއިން ވަނީ ކަނޑައަޅާ މުއްދަތް އިތުރުކޮށްދީފަ އެވެ.
އަމީނީ މަގު ޒަމާނީ ފެންވަރަށް ތަރައްގީކުރުމުގެ މަސައްކަތަށް ސަރުކާރުން 80 މިލިއަން ރުފިޔާ ޚަރަދުކުރެއެވެ.
Advertisement
This content is created and paid for by advertisers and does not involve Voice Journalists
